Meeqqat innarluutillit unammillernartitaat nalunaarusiami nutaami sammineqartut
Kalaallit Nunaanni meeqqat innarluutillit atuarfimmi qinngasaarneqartarlutillu ikiaroornartumik atuinermik misilittagaqarnerusarput. Misissuinerli naapertorlugu allatigut assigiinngissuteqartoqarpallaanngilaq.
Meeqqat innarluutillit sunngiffimmi sammisartakkat pinngortitamilu misigisassarsiornerit peqataaffigilluartarpaat.
Assi pisuusaatitaq: Leif Josefsen
Nalunaarusiami nutaami meeqqat timikkut tarnikkullu innarluuteqarlutik oqarsimasut atugaat unamminiagaallu misissorneqarput. Timikkut tarnikkulluunniit atugaasinnaapput.
Kalaallit Nunaanni atuartut pillugit misissuinermi meeqqat 5.-10. klassini atuartut 2.180-it 9 procentii apersorneqartut taama isumaqarput.
- Meeqqat amerlanerit nalinginnaasumik ingerlalluartarput, meeqqalli innarluutillit timikkut eqqarsartaatsikkullu ajornartorsiuteqarnerulertartut ersarippoq. Assersuutigalugu niaqorlukulanerusarlutik, naarlukulanerusarlutillu sinnarluttarput, aamma isumalunnerusarput, Birgit Niclasen, atuartunik misissuinermi akisussaasoq nalunaarusiamilu atuakkiortoq oqarpoq.
HBSC Greenland, Kalaallit Nunaanni Innuttaasut Peqqissusiannik Ilisimatusarfik aamma Statens Institut for Folkesundhed, misissuinermik ingerlatsisuupput. Misissuineq innarluutillit oqaaseqartartoqarfiat Tilioq suleqatigalugu ingerlanneqarpoq.
Meeqqat innarluutillit 66 procentii qinngasaarneqartarsimasut kisitsisit takutippaat. Tassaapput meeqqat allat 54 procentii. Meeqqat innarluutillit aamma kiserliukkajunnerullutillu hashimik pujortarneq misilikkajunnerusarpaat.
Pinngortitamiinneruneq
Meeqqalli taakku marluk pillugit kisitsisit sanilliukkaanni amerlasuutigut assigiissuteqarput. Sunngiffimmi sammisartakkanut peqataanermut tunngatillugu meeqqat innarluutillit innarluuteqanngitsullu malunnaatilimmik assigiinngissuteqanngillat. Meeqqat innarluutillit pinngortitamiinnerusartut aammattaaq erserpoq.
Inerniliinaveersaaqqissaartariaqarpugulli, atuakkiortut oqarput. Ilaatigut nalunaarusiaq meeqqat innarluuteqarnerminnik namminneq nassuerutiginnittut tunngavigalugit suliarineqarmat.
Meeqqat ilaqutariinni atugarissaarfiusuni peroriartortut nappaammik suussusersineqarnissamut nalunnginnissaannullu periarfissaqarnerusarput. Tamatuma eqimattamut tamarmut kisitsisit qaffatsissinnaavai.
Neriuppugulli nalunaarusiaq meeqqat innarluutillit atugaasa pitsaanerulernissaannut alloriarnerusoq, Birgit Niclasen aamma atuakkioqataasoq Mie Mølgaard Andersenip neriuutigaat.
Neriuppugut meeqqat tamarmik iluaqutigisaannik pitsanngorsaanissamut kajumississutigissallugu,“ Birgit Niclasen oqarpoq.
Nalunaarusiaq tamaat kalaallisut qallunaatullu uani takusinnaavat.
