Ministeri quiassuaaneq akerleriissutaasoq pillugu nalileerusunngitsoq
Kulturimut ministeri DR-ip quiassuaarinnilluni qanoq suliaqarsinnaaneranut “naliliisartoorusunnani” allakkatigut akissuteqarluni ilisimatitsivoq.
Tusagassiorfiup, innuttaasunik kiffartuussisup naalagaaffimmit tapiiffigineqartup, killissanik qaangiisunik isummanik pigiliuteriikkanik suliaqartarnera Kalaallit Nunaata Danmarkillu suleqatigiinnerannut iluaqutaanersoq Folketingimut ilaasortap Aaja Chemnitzip (IA) kulturimut ministerimut apeqqutigaa. Politikikkummi tamakku akiorniarneqarput.
Assi toqqorsivimmit: Leiff Josefsen
DR-ip quiassuaarilluni aallakaatitassiaani "Tæt på sandheden"-imi februaarip naanerani ilanngutassiaq takutinneqartoq isornartorsiorneqangaatsiarpoq. DR-iluallaat arlaleriarluni politiinut unnerluutigineqarpoq, inuppassuit ilanngutassiaq ammip qalipaataa tunngavigalugu nikassaanerarlugu kalaallinullu isummanik pigiliuteriikkanik siammarterisutut isigaat.
Ilanngutassiaq folketingimi ilaasortap Aaja Chemnitzip (IA) politikkikkut aamma sammivaa, tamannalu pillugu kulturimut ministerimut apeqquteqarluni.
Kulturimut ministeri Jakob Engel-Schmidt ilanngutassiamut tunngatillugu iliuuseqassanani Aaja Chemnitzimut akissuteqarnermini allappoq.
Naalagaaffiup DR-imut akuliuttussaannginnera unioqqutinneqassasoq taassuma tunngavilersuutigaa.
- DR-ip ilanngutassiami pineqartumi killissaq qaangerlugu iliuuseqarsimaneranik isiginninneq tusaatissatut tiguara. Aamma DR-ip ilanngutassiami piviusulersaarummut ”Grønlands hvide guld”-imut atatillugu DR-ip inissisimaffianik illaruaatiginninneq siunertarisimallugu nalunaaruteqarnera maluginiarpara, ministeri akissummini allappoq, nangillunilu:
Naliliisartutut inissikkusunngitsoq
- Kalaallit pillugit isummiuteriikkat pineqartut amerlavallaat isumaqarpata apeqqutigineqarsinnaavoq siunertaq naammassineqarnersoq. Uangali kulturimut ministeritut DR-ip quiassuaaraluni DR-illuunniit allanik sammisaqarneranut tunngatillugu naliliisartuusussaannginnera allanngortinngilaa.
DR-ip aallakaatitassiai ammip qalipaataa pissutigalugu allalluunniit pissutigalugit immikkoortitsisussaannginnerat Jakob Engel-Schmidtip erseqqissarpaa, tamanna DR-ip innuttaasunik kiffartuussinissamik isumaqatigiissutaani allassimammat: "DR-ip aallakaatitassiai ammip qalipaataa, suiaassutsit, upperisaq, inuiaassuseq imaluunniit suaassutsikkut kajungaerfigisat pissutigalugit uumissuinermik siammarterisusssaanngillat.“
Kulturimut ministerip DR-ip pisortaanera siulersuisuilu DR-ip aallakaatitassiaasa inatsisinut naapertuunnissaannut akisussaasuunerat innersuuppai.
DR: Kalaallit Nunaata illaruaatigineqarnissaa siunertaanngilaq
DR naapertorlugu „Tæt på sandheden“-imi ilanngutassiami siunertarineqartoq tassaavoq DR-ip piviusulersaarummut isornartorsiorneqartumut „Grønlands hvide guld“-imut tunngatillugu iliuusiinik quiasaarinissaq.
- Kalaallit Nunaata kalaallilluunniit quiasaarutiginissaat siunertaanngisaannarput. Tamanna ersarilluinnarsoraarput, DR-ip aallakaatitassiornermi pisortaa Anne Garlich DR Nyhederimut allakkatigut akissuteqarnermini ilisimatitsivoq.
Aaja Chemnitzip quiassuaarinninneq sakkortuumik isornartorsiorpaa:
- Mitalliisumik quiasaarutiginninneq qanga oqartussaasut uperuartorniarlugit atorneqartarpoq, isumaqarpungalu tamanna akuersaarsinnaasariaqaripput. Kisianni inuit politikkikkut uivileruttornerup nalaani ikinnerussuteqartunik taama nikassaaneq allaavoq. Sianiitsuliorneruvoq, folketingimi ilaasortaq oqarpoq.
