Ullut ilaanni allaneq ajorpoq kikkut tamarmik avannaanut malinnaasut. Kalaallit Nunaat pillugu quleqquttat aasit sungaartut - BREAKING NEWSIP qalipaataa.
Taamaattumik naalakkersuisuni partiit siulittaasui nunanut allanut attaveqarneq suliassaraat annertusiartortoq.
Ullut ilaanni allaneq ajorpoq kikkut tamarmik avannaanut malinnaasut. Kalaallit Nunaat pillugu quleqquttat aasit sungaartut - BREAKING NEWSIP qalipaataa.
Taamaattumik naalakkersuisuni partiit siulittaasui nunanut allanut attaveqarneq suliassaraat annertusiartortoq.
Attaveqarnermulli sulisut amerlanerusut pisariaqarpata, taava taakku suminngaanneertariaqarpat?
- Attaveqarsinnaanerup pitsanngorsarneqarnissaa eqqarsaatigisariaqarunarpoq. Taamaattumik misilittagallit nunallu allat pillugit ilisimasallit atorneqassapput. Aammali inuit ilinniarsimasut amerlanerit pisariaqarput. Amerlavallaarunanngillalli, Sermitsiami oqallitsitsisartoq Tusagassiutilerinermillu suliaqartut Peqatigiiffianni siulittaasoq Arnaq Nielsen oqarpoq.
Politikkikkuinnaq nunanit allanit tatineqarneq misigineqanngitsoq aamma oqaatigaa.
- Kikkut tamarmik misigaat. Tusagassiorfimmi aamma malinnaasinnaanngilagut. Aamma saaffiginnittartut amerlassusaannut piginnaasagut killeqarput, tusagassiiviullu nutaarsiassanik suliaqarneq ulapputigereerpaa, Arnaq Nielsen oqarpoq.
Malinnaasinnaannginneq
Politikerit nunani tamalaani tusagassiuutitigut qanoq akulikitsigisumik saqqummiuttarnissartik aamma tusaaneqarnissartik qanoq qulakkeertassaneraat apeqqutaavoq.
Marc Jacobsen, illersornissamut ilinniarfiup lektoria, naapertorlugu kalaallit politikeriisa oqariartuutitik qanoq pitsaanerusumik annittarsinnaanerlugit qulakkeerniarnissaat ilimanarpoq. Tassa oqariartorfigiumasatik qanoq angulluarsinnaanerunerlugit.
- Kalaallit politikerii aqqutit eqqortut, tassa atorfilittatigut, atorlugit saqqummiunnikkatik saqqummiuttarnissaat ilimanarpoq. Kisianni avataaniittunut attaveqarneq sakkortunerusumik pingaartissavaat, Marc Jacobsen oqarpoq. Taassuma naalagaaffiit Issittumi sunniuteqarniarlutik qanoq ilillutik periusissiamik tunngaveqartumik attaveqarneq atortarneraat misissuiffiginikuuaa.
Arnaq Nielsen qimussimik sukkaniunneq pillugu suliaqarluni sapaatip akunnerata naanerani Sisimiuniippoq, tassanilu maanna pissutsit pissutaallutik tusagassiutit pillugit siunnersorteqartariaqarnerup annertunerulersikkaa qanimut misigaa - aamma politikkip avataani.
- Qimussertartut peqatigiiffiat tusagassiutilerisussamik atorfinitsitsigallarsimapput, taassumalu ilaatigut nunanit allanit tusagassiortunit soqutigineqarnerujussuaq suliarisussaallugu, oqarpoq.
Tusagassiuutinit tatineqarnermut assersuutissaq alla tassaavoq Ilisimatusarfik. Nunarsuarmit tamarmeersut tusagassiortut soqutiginninnerat annertummat saaffiginnissutit tamarmik akineqarsinnaanngitsut taakku nittartakkamik saqqaani allassimapput. Sapinngisamilli akiniartarlutik.
Naak nunanut allanut sanilliullugu piginnaasat killeqaraluartut politikerit attaveqartarnerat lektori Marc Jacobsenip tupigusuutigingaarpaa. Múte B. Egedep Fox News-imi apersorneqarluni isiginnaartorpassuarnut USA-p præsidentianik Trumpimik tapersersuisunut Kalaallit Nunaata inissisimaffianik — “Kalaallit Nunaat kalaallit pigigaat” — erseqqissaanissaq siunertaralugu apersorneqarnera eqqaavaa.
75 procentit
Nunanit allanit Kalaallit Nunaat taama sammineqartigitillugu nunap politikerii oqariartuutiminnik tusaaneqarnerulernerat aamma pivoq. Oqariartuuteqarunik maluginiarneqassapput. Tamanna ilaatigut sapaatip-akunnerata naanerani takuneqarsinnaavoq, tassa tusagassiorfiit annerit arlallit Naalakkersuisut siulittaasortaavata amerikamiut Kalaallit Nunaannik soqutiginninnerat oqaaseqarfigalugu Facebookimi saqqummiussaa issuaaffigimmassuk.
- Nunarput pigaarput. Ippassaq tamanna ersarissumik inissisimaffigaarput. Ullumikkut suli ersarissumik inissisimaffigaarput. Aamma siunissami allanngornavianngilaq, Jens-Frederik Nielsen (D) oqarpoq.
Naalakkersuisunngortut naalakkersuisoqatigiinnermullu isumaqatigiissut nunani allani tusagassiuutit sapaatip-akunnerata naanerani aamma sammivaat. Allaaserisat naalakkersuisoqatigiinnermut amerlanerussuteqarluartut tunuliaqutaasut sammivaat. Inatsisartuni partiinit tallimaasunit sisamat: Demokraatit, IA, Siumut aamma Atassut.
Katuap inersuaaraani Nuummiittumi saqqummiussineq pivoq, tassani partiit siuttui oqaaseqaqqaariarlutik Naalakkersuisunut ilaasortanngortut ilisaritinneqarput ersaattaanneqaqalutillu.
- Ulloq manna qilanaarisimavarput, ulloq inuiaqatigiinnut kalaallinut pingaaruteqarluinnartoq. Inuiaqatigiinnut kalaallinut ataatsimoornissaq pingaaruteqarluinnarpoq, innuttaasullu 75 procentii naalakkersuisoqatigiit uku aqqutigalugit ataatsimoortinneqarput,, Jens-Frederik Nielsen oqarpoq nangillunilu:
- Isumaqatigiinngissutit akerleriissutillu qimallugit inuiaqatigiinni ataasiussuseqarnissarput pingaaruteqarluinnarpoq, piffissamimi uani suleqatigiinneq suli nukittunerusoq avatitsinnut pilersittariaqarparput, Sermitsiamut oqarpoq.
Inatsisartunut qinigaaqqammersut ataasinngornermi apriilip arfineq-appaani 2025-mi inissitsiternissamut aggersarneqartut Sermitsiami aamma allaaserineqarpoq. Tamatuma kingorna Naalakkersuisut nutaat ivertinneqarlutik inatsisartunit akuerineqassapput.
Oqimaaqatigiissaarilluarnissaq
Politikerit nunaminni innuttaasunut taamaallaat attaveqartarunnaarlutik nunarsuup sinneranut aamma attaveqartalerunik qanoq oqimaaqatigiissaarisoqassanersoq malinnaaviginissaa soqutiginassasoq Marc Jacobsen oqarpoq.
- Malinnaaffigineqarneruneq pissutaalluni qanoq oqassanerluni eqqarsaatigilluaqqaartariaqarpoq – aamma qanoq nutserneqassanersut. Oqaatsit ilaat tuluttut sakkortusarnerusarput. Taamaattumik oqimaaqatigiissaarinissaq pingaaruteqarpoq, eqqissisimasumik qisuariarnertulli akissuteqapallannaveersaarluni tusaamanerlugaaleqqunani, oqarpoq. Kalaallillu politikerii ajortunik pisoqartillugu killiliilluartartut maluginiarsimallugu oqarpoq.
Nunani allani naalakkersuisut immikkut ittumik siunnersorterpassuaqartarput, politikkerinik siunnersuisartunik taaneqartartunik. Namminersorlutik Oqartussat aamma siunnersorteqarput, tusagassiortut naalakkersuisullu allattaannik attaveqaqatigiinnermut ikiuutaasartunik peqarlutik. Nunaniilli allaniit isumalluuteqarnerusuniit sulisukinnerupput.
- Nuna mikisupilussuuvugut, isumalluutinik atuinissaq kikkut tamarmik eqqarsaatigeqqissaartariaqarpaat, partiimmi namminneq aamma inuttaqarput, Arnaq Nielsen nassuiaavoq.
