Nuup avataani ineriartortitsineq politikkikkut aalajangiinernik pisariaqartitsiffiuvoq

Illoqarfinni najugaqartut amerliartornerat nunallu immikkoortuini assigiinngissuteqartoqarnera aningaasaqarnerup nikinganeranik pissuteqartoq, kommuninilu inoqarfinnilu tamani assigiimmik periarfissaqartitsinissaq piviusorsiornerunngitsoq, Aningaasaqarnermut Siunnersuisooqatigiit 2025-mi ukiup affaanut siullermut nalunaarusiaanni uppernarsarneqarpoq. 

”Illoqarfinni najugaqartut amerliartornerat Kalaallit Nunaanni aamma atuuppoq“, nalunaarusiap immikkoortuani najugaqarfinnut nunallu immikkoortuini pissutsinut tunngatillugu oqariartuut pingaarnerpaaq taama nipeqarpoq.

Nalunaarusiaq naapertorlugu inuit illoqarfinni anginerusuni, ingammik Nuummi, najugaqarnerujartuinnarput. Suliffeqarfiit aaqqissuussaanerat, ilinniartitaanissamut periarfissat aamma peqqinnissaqarfimmut, kulturimut pisortallu sullissiviinut attaveqarnerit – pissutsit nunani aningaasarsiorluarfiusuni tamangajanni atuuttut – pissutaapput.

Aningaasaqarnermut Siunnersuisooqatigiit siulittaasuata Torben M. Andersenip Kalaallit Nunaata sineriaani isorartuumi inukinnera ajornakusoortitsinerulersartoq erseqqissarpaa: - Najugaqarfimmut suliffimmullu angalasinnaanngikkaanni kommunit assigiinngissutaat erseqqinnerusarput, aamma nutsernerit kinguneqarnerusarlutik, oqarpoq.

AAMMA ATUARUK

– Kommunit aningaasaqarnikkut naligiinnginnerujussuat isiginngitsuusaarneqaannarsin-naajunnaarpoq

Aqutsinermi annikitsuit naligiinngissutsinut pissutaapput

Nalunaarusiami nunap immikkoortuini assigiinngissuteqarnermut pissutaanerpaasutut ingerlatsinermi aporfeeqqat tikkuarneqarput, tamannalu aamma Aningaasaqarnermut Naalakkersuisup Múte Bourup Egedep (IA) Inatsisartunut ilaasortamut Anders Olsenimut (S) akissutaani uppernarsarneqarpoq, tassani aningaasaqarnikkut inuillu amerlassusiisigut assigiinngissutit ersersinneqaramik.

Kommunini najugaqarfinnilu ikittuinnarnik inulimmi agguaqatigiissillugu aningaasartuutit qaffasipput, tassami atuarfeqarnermut, peqqinnissaqarfimmut, utoqqarnut paaqqutarinninnermut pilersuinermullu aningaasartuutit aalajangersimasut innuttaasunut amerlanngitsunut agguaanneqartarmata.

- Kommunit aaqqissuussaanerat ajornartorsiummut pissutaanngilaq. Unamminiarnartorli tassaavoq kommunit mikisut innuttaasorpassuaqanngitsut avinngarusimanerusunilu inoqarfillit aningaasartuuteqarnerulerlutillu periarfissakinnerujussuummata, Torben M. Andersen oqarpoq.

Kommunit inoqarfiillu amerlasuut mianernartut

Aningaasaqarnermut Siunnersuisooqatigiit nalunaarusiaanni najugaqarfiit amerlasuut — ingammik mikinerit — ullumikkut aningaasaqarnikkut isumaginninnermullu tunngasuni mianernartumiittut erserpoq.

Siulittaasoq naapertorlugu inuussutissarsiuteqarnissamut tunngavissaqannginneq mianernartumiinnera attuumassuteqarluinnartoq: 

- Aalisarsinnaanerup piniarsinnaanerullu ikiliartorfiani allanik inuussutissarsiuteqarnissaq ajornakusoorsinnaavoq. Tamanna kikkut nuuttarnerannut kikkullu nunaqaannarnissaannut sunniuteqartarpoq, Torben M. Andersen oqarpoq

Ineriartorneq inuussutissarsiuteqarnermut attuumassuteqarpoq

Kommunini amerlasuuni inuussutissarsiutinik ataavartunik amigaateqarneq najugaqalernissamut unammillernartoq annerpaajusoq, nalunaarusiami erseqqissarneqarpoq. 

Aalisarfiusinnaasuni, takornariartitsisarfiusuni aatsitassarsiorfiusinnaasuniluunniit najukkami ineriartornissamut periarfissat pitsaanerupput. 

- Inuussutissarsiuteqarnissamut periarfissaqarpianngippat nuunnissaq pinngitsoorneqarsinnaanngilaq. Tamanna nunarsuaq tamakkerlugu atuuppoq, Torben M. Andersen oqarpoq.

AAMMA ATUARUK

Nuup avataani pitsaasumik inuusoqarsinnaannginneranik oqartoqartarnera allanngortinneqartariaqarpoq

Politikkikkut aalajangiinerit akisussaaffiit agguataarnerinut tunngassuteqartut

Aningaasaqarnermut Siunnersuisoqatigiit naapertorlugit aaqqiissutissat politikkikkut aalajangiiffigineqartarput. Kommuninut qanoq agguataarisoqassanersoq aamma tapiissutit qanoq aaqqissuunneqartassanersut apeqqutaasarput. 

Nalunaarusiami erseqqissarneqarpoq tapiissutit takussaasariaqartut inuussutissarsiornermullu suliffissaqartitsinermullu attuumassuteqartussaallutik.

- Aningaasanik agguaassineq politikkikkut aalajangiineruvoq. Suna anguniarneqarnersoq aningaasallu qanoq akisussaaffilerneqarnersut apeqqutaavoq, Aningaasaqarnermut Siunnersuisoqatigiit siulittaasuat oqarpoq.

Eqiterineq sumiiffinnilu allani akisussaaffiit

Suliassat ilaat digitalinngortinneqarsinnaasut qitiusumik ingerlatsivimmut nuunneqarsinnaasut, taamaalilluni annertussutsikkut sipaarniuteqarsinnaallunilu nukissanik pissarsisoqarsinnaalluni, aamma nalunaarusiami erseqqissarneqarpoq.

 Suut tamarmik qitiusumik ingerlatsivimmut nuunneqartariaqarnerat pineqarani, suliassalli immikkoortiternerisigut najukkami ineriartorneq tapersersorneqarsinnaavoq.

- Suut tamarmik najukkami aaqqinneqassappata akisuallaassaaq, agguaqatigiissillugu atugarissaarnikkut ajorseriartoqassaaq. Oqimaaqatigiissaarisoqartariaqarpoq suliassat ilaat qitiusumik suliarineqartarlutik, allallu innuttaasunut qaninnerusumi suliarineqartarlutik, taamaalilluni nukiit najukkami ineriartornermut suliffissanillu pilersitsinissamut atorneqartassallutik, Torben M. Andersen oqarpoq, najukkamilu iliuuseqarsinnaaneq pingaaruteqartoq tikkuarlugu:

- Ineriartorneq qulaaniinnaq aqunneqarpat iluatsikkunnanngilaq. Kommunit inoqarfiillu periarfissallu najukkamiittut atorluarlugit piginnittunngortariaqarput.

Politikkikkut oqallinneq avaqqunneqarsinnaanngitsoq

Aningaasaqarnermut Siunnersuisooqatigiit najugaqariaaseq maanna atuuttoq attanneqaannarsinnaanngitsoq inerniliissutigaat, kommuninilu tamani assigiimmik periarfissaqartitsinissaq piviusorsiornerunngitsoq. Oqallinnissaq pisariaqartoq siulittaasoq oqarpoq:

- Politikkikkut aalajangiisoqassanersoq apeqqutaanngilaq, apeqqutaavorli qanoq aalajangertoqassanersoq. Politikkikkut aalajangiinerit kommunit siunissami qanoq ineriartornissaat aalajangertarpaat, Torben M. Andersen oqarpoq.

Aammattaaq illoqarfiit annerit avataanni inuussutissarsiornerup ineriartortinnissaanut politikkikkut tapersersuiniaraanni akileraartarnermut politikki atorneqarsinnaasoq oqaatigaa. 

Aningaasaqarnermut Siunnersuisooqatigiit periutsit aalajangersimasut misissorsimanngilaat, Torben M. Andersenilli nunat tamalaat akornanni nunap immikkoortuinut assigiinngitsunut akileraarutitigut tapiissuteqartarnikkullu aaqqissuussinerit misilittagaqarfiusut erseqqissarpaa.

- Taamatulli aaqqissuussinerit atornerlunneqarnaveerlugit ilusilerneqassapput, tassa suliaqarfinnut najugaqariaatsimullu tapersersuinissamik siunnerfilerlugit, oqarpoq.

Erseqqissumik pingaarnersiuisoqarnissaa pisariaqartoq

Naalakkersuisut Nuup avataani kommunini allani ineriartortitsisussamik inuussutissarsiornermut politikkimik atuutilersitsipput.

- Takornariaqarneq, aatsitassarsiorneq aalisarnerullu ilaa illoqarfiit pingaarnersaata avataani inuussutissarsiutaapput, oqarpoq. Politikkikkut anguniagaqannginneq unammillernartuunngitsoq tikkuarpaa, erseqqissumilli pingaarnersiuineq, akisussaaffeqarneq aamma inuussutissarsiornermut politikkip, akileraartarnermut politikkip kommunillu akornanni agguataarnerup ataqatigiinnerat unammillernartutut taallugu.