Nuup avataani pitsaasumik inuusoqarsinnaannginneranik oqartoqartarnera allanngortinneqartariaqarpoq

Kommunit aningaasaqarnermikkut assigiinngissuteqarnerat isiginngitsuusaaginnarneqarsinnaajunnaarpoq, Inatsisartunut ilaasortaq Anders Olsen (S) oqarpoq, taassuma paragraf 37 naapertorlugu apeqqutit arlallit kommunit tallimat aningaasaqarnerannik innuttaasalu atugaannik qulaajaasut apeqquteqaatigereerlugit Naalakkersuisunit iliuuseqartoqarnissaa piumasaqaatigaa, Naalakkersuisummi kommunit naligiimmik inissisimanissaat nunallu ineriartorneranut peqataatinneqarnissaat akisussaaffigaat.

Qeqqata Kommuniani borgmesteri Malik Berthelsen (S) tamatumunnga isumaqataavoq, kommunimmi aningaasaqarnerat qiviaraanni 2020-mit 2024-mut ataatsimoortumik isertitaat aamma assigiinngilluinnarput.

Aningaasaqarnermut naalakkersuisup Múte Bourup Egedep (IA) paragraf 37 naapertorlugu apeqquteqaammut akissutaa naapertorlugu, Kommuneqarfik Sermersooq piffissami pineqartumi 11,8 milliardit koruuninik isertitaqarsimavoq, kommunilli allat piffissami pineqartumi tamatumani 3,2 aamma 5,1 milliardit koruunit akornanni isertitaqarsimallutik.

Kisitsisillu § 37 naapertorlugu akissutini ingerlatseqatigiiffinnut aamma iluanaarutinit akileraarutitigut isertitat pillugit akissutini taakkunani takuneqarsinnaavoq, Kommuneqarfik Sermersooq piffissami tassani 795 millionit koruuninik isertitaqartoq, kommunillu allat 14 aamma 152 millionit koruunit akornanni isertitaqarsimallutik.

- Innuttaasut akornanni naligiinnginnerup annertusiartornera ulorianartutut Naalakkersuisut oqaatigisarpaat. Kisianni kommunit akornanni naligiinnginnerup taamatulli ulorianartiginerata oqaatiginissaa sooruna Naalakkersuisunit taama ajornakusoortinneqartigisoq? Malik Berthelsen aperivoq tikkuarlugulu naligiinnginneq uppernarsarneqareermat.

Isorliunerusuni utoqqaat amerlanerusut

Múte Bourup Egedep paragraf 37 naapertorlugu Anders Olsenip apeqqutaanut akissummini ilisimatitsissutigaa, 2025-mi innuttaasut 65-it sinnerlugit ukiullit nuna tamakkerlugu innuttaasut 9,4 procenterigaat. Kommune Kujallermi innuttaasut 65-it sinnerlugit ukiullit amerlanersaapput, Kommuneqarfik Sermersuumilu ikinnerpaallutik. Tamatuma saniatigut Kommuneqarfik Sermersuumi innuttaasut sulisinnaasut 17-init 64-inut ukiullit amerlanersaapput.

AAMMA ATUARUK

– Kommunit aningaasaqarnikkut naligiinnginnerujussuat isiginngitsuusaarneqaan-narsinnaajunnaarpoq

- Kommunit akunnerminni aningaasaqarnikkut innuttaqarnikkullu assigiinngissusiat § 37 najoqqutaralugu apeqquteqaammut akissummi erseqqissumik uppernarsarneqartoq piviusuuvoq pingaaruteqarlunilu. Tamanna Naalakkersuisut ammasumik nassuerutigisariaqarpaat, borgmester Malik Berthelsen taama qisuariaateqarpoq, sulliviillu Nuummiittut sinerissamut siammarneqarnissaat piumasaralugu.

Eqqarsartaatsitsinnik allannguisariaqarpugut

Qeqqata Kommuniani borgmesteri isumaqarpoq, naligiinnginneq annikillisinneqassappat, Namminersorlutik Oqartussat naalagaaffiullu suliffeqarfiutaasa Nuummiinnaaq inissisimanissaat eqqarsaatigeqqinneqartariaqartoq.

- Tamannaavormi innuttaasut sinerissamit Nuummut eqiterutsinneqarnerannut patsisaanerpaasoq. Inuusuttut ilinniakkaminnut tulluartumik aningaasarsiarissaarnerusumillu atorfeqassagunik, annerusumik taamaallaat Nuummi periarfissinneqarnikuugamik, borgmesteri oqarpoq, assersuutitullu tikkuarlugu Royal Greenlandip Aalborgimi sulisorpassuisa Nuummut nuunneqarnissaannik politikikkut piumasaqartoqarnera aamma Issittumi Sakkutooqarfiup qullersaqarfissaanik Nuummi sanasoqarnissaanik politikikkut isumaqatigiissuteqartoqarnera.

- Taakkuinnaalluunniit kommunimi allami inissinneqarsimagaluarpata, kommuninut pineqartunut sumiiffimmullu annertoorujussuarmik iluaqutaasimassagaluarput – aningaasarsiornikkuinnaanngitsoq, kisianni aamma sumiiffimmi ulluinnarni inooqataanermut, Malik Berthelsen oqarpoq piumasaralugulu Nuup avataani pitsaasumik inuusoqarsinnaannginneranik takorluuisarneq allanngortinneqartariaqartoq.

- Naalakkersuisugut Nuup avataani inuusoqarsinnaannginneranik uppertinneqartarnerat allanngortinneqanngippat, ukiorpassuunngitsut qaangiuppata nunatta sinnera inuusuttunit ilinniarsimasuniillu najugaqarfigineerussimanissaa isumaqarpunga ernumanartuusoq, Malik Berthelsen oqarpoq.

Nalimmassaanermik aaqqissuussineq aamma akileraartarnermut tunngasut

Borgmesteri isumaqarpoq, siullertut sullivinnik Nuummut eqiterutsitsineq allanngortillugu pisortat suliffeqarfiutaat kommuninut allanut nuutsinneqartariaqartut, aammali nalimmassaanermik aaqqissuussineq akileraartarnermullu tunngasut allanngortinneqartariaqartut.

Kommuneqarfik Sermersuup nalimmassaanermut akiliutigisartagaata annertussusaa ukiorpassuarni nikisinneqarnikuunngitsoq, piaartumik nalilersorneqaqqittariaqarpoq, aammali akileraartarnikkut periarfissanik misissuisoqartariaqarluni, taamaalilluni illoqarfinni mikinerusuni nunaqarfinnilu najugaqarnissaq pilerinarnerusunngortinniarlugu.

- Naalakkersuisunut kaammattuutigerusuppara Nunarput tamaat sullittussaanera eqqaamaniarlugu ilaannikkut tikertik apummut mangulaartassagaat, Malik Berthelsen naggasiivoq.