Sisimiuni aallussaqartut takornarianut sammisaqartitsiniarlutik suleqatigiilersut

Takornariat Sisimiut illoqarfittaa kisiat misigisassarsiorfigissanngilaat, aammali illoqarfiup timaani misigisassarsiussapput.

Magnus Rejkjær Elleby Sisimiuni Hotel SØMA-meersoq aamma Minik Sachse Sisimiuni pisiniarfimmi Arctic Starimeersoq isumaqarput.

Misigisassarsiornissamut neqeroorutit 

Taakku maanna ukiorpassuarni attaveqatigiinnermik ataatsimullu takorluukkamik tunngaveqarlutik pisortatigoortumik suleqatigiilerput: Piviusorpalaartunik aaqqissuussanillu misigisaqarneq Kalaallit Nunaata pinngortitaanik kulturiannillu nuannarinnilluni qanilaarnermik qaffasissumillu pitsaassusilimmik misigisaqarfiusoq. Piffissami Kalaallit Nunaanni takornariaqarnerup ineriartorfiani ataatsimoornissaq najukkamilu aallussinissaq tamanit pingaarnerpaavoq – aamma misigisassat annertunerusut pillugit neqerooruteqarnermi, taakku tusagassiutitigut nalunaarummi allapput.

“Kalaallit Nunaat takutikkusupparput, takornarianullu eqqaamassutissanik puigunaatsunik nuannersunik pilersitsisussanik misigisitsilluta. Ataatsimoorluta anguniagaqaqatigiimmik suleqatigiissinnaalluta nuannaarutigeqaarput – taanna iluarisimaarinninnermut tunissutaavoq. Arctic Star suleqatigilerlugu nukittunerulersimavugut, tamannalu tunngavigalugu takornariat amerlanerit Sisimiunut Kalaallit Nunaallu sinneranut tikilluaqqussallugit qilanaarivarput,” Magnus Rejkjær Elleby oqarpoq.

Annertuumik iliuuseqarneq 

Suleqatigiinneq Hotel SØMA-p Sisimiuniittup annertuumik ilaneqareernerata kingorna aallartinneqarpoq. Akunnittarfik Ineeqqanik ininillu nutaanik 22-nik peqalernermigut, nutaaliaasunik ataatsimiittarfeqarnermigut, sutorniartarfeqarnermigut, neriniartarfeqarnermigut, kinittarfeqarnermigut isersimaartarfeqarnermigullu angalasut ataasiakkaat eqimattakkaallu tikilluaqqussallugit piareersimavoq – taamaalillunilu misigisassarsiornissamut sinaakkutissanik pitsaanerusunik neqeroorsinnaalerluni.

Arctic Starimi suleqatigiinnikkut nutaamik iliuuseqartoqarportaaq. Suleqatigiit ataatsimoorlutik atortussaatitik annertusingaatsiarlugillu ilaatigut sikkilit innaallagiatortut Scott-imeersut qulingiluat, ATV-t arfinillit Arctic Cat-imeersut, UTV-t marluk Arctic Cat-imeersut, qamuteralaat aqqanillit kiisalu Targa 32 fods takornariartitsissut siornatigut allamit pigineqarsimasoq, maanna Danmarkimi piareersarneqaleruttortoq aasallu ingerlanerani tunniunneqartussatut naatsorsuutigineqartoq, pigilerpaat.

“Hotel SØMA suleqatigilerlugu tulluusimaarutigaarput. Suleqatigiinneq angisuumik ataatsimut eqqarsarnikkut aallartippoq – Tamannalu sumiiffimmut ataqqinninneq tunngavigalugu. Anguniagassat annertuut pigaagut – aammalu suli amerlanerusunik piviusunngortitsisinnaavugut,” Minik Sachse Arctic Star-imeersoq oqarpoq.

Sisimiuni Arctic Star Hotel SØMA-lu ilaatigut takornariartitsisulerluni innaallagiatortunik sikkilernernik, ATV-nik UTV-nillu qaqqaliarnernik, ukiukkut qamuteralalluni angalaarnernik umiatsiamillu takornariartitsissummik angalaarnernik neqerooruteqassaaq.

Sikkilinik innaallagiatortunik ATV-nillu angalaarnerit juulip aallaqqaataaniit inniminnerneqarsinnaalissasut aammalu Hotel SØMA ukiorpaalunni kingullerni qamuteralalluni angalaartitsisareersoq allarpassuarnillu neqerooruteqartareersoq Arctic Star Sermitsiamut ilisimatitsivoq.