Sisimiuni takusat qaqutigoortut: Mittarfiup eqqaani kigaallassaaserluni pissinneq annaassiniarnermillu sungiusarneq
Illersornissaqarfiup qulimiguulianiit sakkutuut arfinillit kigaallassaaserlutik pissimmata, qulimiguulimmiillu annaassiniaanermik Sisimiuni mittarfiup eqqaani takutitsisoqarmat, Sisimiuni innuttaasut qaqutigoortumik isiginnaarput.
Foto: Tôrtia Reimer-Johansen
Sisimiuni mittarfiup eqqaa marlunngornermi ualigaa biilinik inunnillu ulikkaarpoq. Tamarmik aarlungapput, qummullu qiviaraanni qulimiguulik qorsuk inuillu arfinillit kigaallassaaserlutik pississimallutik nunap tungaanukartut takuneqarsinnaapput.
Sisimiuni isigisaq alutornartoq qaqutigoortorlu. Nunamiittut nipaapput, qulimiguulillu timmiuaarpaluttoq tusarsaavoq.
Assiliisoq: Tôrtia Reimer-Johansen
Illersornissaqarfiup qaammatini aggersuni Kalaallit Nunaanni Kalaallillu Nunaata eqqaani suliani annertusiniarpai, taamaattumillu Sisimiuni takutitsisoqarpoq.
Kigaalassaaserluni pissittoqareermat SAR-imik annaassiniaanermik sungiusarneq takutinneqarpoq. Tassani inuk helikopterimit EH101 Merlinimit qaqinneqarpoq.
Assiliisoq: Tôrtia Reimer-Johansen
Qulimiguulik annaassiniartoq, ulluinnarni Illersornissaqarfiup Issittumi upalungaarsimaneranut ilaasuusoq, immap qulaani appasissumik timmivoq, timmisartortartoq annaassiniartorlu suleqatigiinnerat takutinneqarluni.
Sakkutuut isiginnaartunut aalaterisarput, isiginnaartuniillut akineqarlutik aalateriffigineqartarlutik.
Assiliisoq: Tôrtia Reimer-Johansen
Illersornissaqarfiup nalunaarutaa naapertorlugu sungiusarneq Kalaallit Nunaanni upalungaarsimanerup sakkutuullu sakkutooqarfigisaata nukittorsarnissaannut pilersaarutinut ilaavoq.
Assiliisoq: Tôrtia Reimer-Johansen
