MOTOORI
Umiatsiaqarama kiffaanngissuseqarpunga
Umiatsiaqarneq Nunatsinniittunut arlalinnut kiffaanngissuseqartitsillunilu pinngortitamut kusanartumut toqqaannartumik attaveqaataavoq. Aamma Ulrik Maratsemut taamaappoq, taassumalu umiatsiani Beneteau Antares 8 nuannareqaa.
Ulrik Maratse umiatsiaqarami kiffaanngissuseqarlunilu pinngortitamiittarpoq. Umiatsiarsinnaanngikkunilu pikkunaalliussaaq.
Foto: Privat
Umiatsiaqanngikkaanni arlaannukarniarneq ajornakusoorpoq – minnerunngitsumik
Tasiilami najugaraanni nunaqarfinnullu Kuummiinut, Sermiligaamut, Kulusummut,
Tiilerilaamut Isertumullu tikikulagaanni.
Sanasoq Ulrik Maratse ataasiinnarmik umiatsiaqanngilaq, pingasunilli
umiatsiaqarpoq. Taakkulu nuannareqai. Minnerunngitsumik umiatsiani angisooq
Beneteau Antares 8, paniminut Aviaanamut atsiussimasani.
Beneteau Antares ukioq manna nutaamik motoorilerneqassaaq. Motoori umiarsuarmi Tasiilamut tikittumi siullermi nassiussanut ilaavoq.
Assi: Privat
– Grønlands Bådcenterimi ukiut marluk-pingasut matuma
siorna pisiaraara, nuannareqaaralu. Ilaquttakkalu angalaaraangatta, piniaraangama
aamma Kommuneqarfik Sermersuumi sulisunik maanimiunillu Tasiilamiit
nunaqarfinnut angallassigaangama atortarpara, Ulrik Maretse, inuunini
tamapajaat Tasiilami najugaqarlunilu sulisimasoq, oqaluttuarpoq.
Pinngortitamiinneq nuannarigaa
Umiatsialiortarfik franskinit pigineqartoq Beneteau ukiut 130-t sinnerlugit
nunarsuaq tamakkerlugu tunineqartartunik umiatsialiortarpoq.
Grønlands Bådcenterip umiatsiaq tassanngaaneersoq 2022-mi
Nunatsinnut siullermik tikisippaa. Taanna tassaavoq Antares 7, aappaaguanilu 8
tikisippaat. Tassa taanna Ulrik Maratsep pisiaraa.
Umiatsiap pisinnaasaqarluarnini imarsiullaqqinninilu
ilisimaneqaatigai. Taakkununnga ilanngullugu akimmisaarfeerullugu
sanaajullunilu sukkasuuliaagami ilorrisimaarnaqalunilu assigiinngitsutigut
atorneqarsinnaavoq. Inunnut arfineq-pingasunut inissaqarpoq.
Ulrik Maratse umiatsiami saniatigut aamma Poca 600-imik Poca 400-millu umiatsiaaraqarpoq, taakkuli ukioq manna sikoqarpallaarnera pissutigalugu nunaqarfiit ilaanni nunami qaqeqqapput.
Foto: Privat
Umiatsiaaqqat ulluinnarsiutigigai
– Meeraallungali umiatsiartalerpunga. Pinngortitamiinnissaq nuannaraara, taamatuttaarlu
umiatsiannik puiserpassuit, aalisakkat nannullu pisarinikuuakka, Ulrik Maretse,
Beneteau-imik umiatsiaqarnermi saniatigut aamma Poca 600-mik Poca 400-millu
umiatsiaaraqartoq, oqarpoq. – Umiatsiaaqqat ukioq naallugu angallatigisarpakka, umiatsiarli novembarimi
sikugaangat qaqittarpara. Sikueraangat ningeqqittarpara. Umiatsiamut motoori
nutaaq utaqqeqqaarnikuugakku ukioq manna ninginnera pilersaarutaasumit
kingusinnerulaarpoq.
– Meeraallungali umiatsiartalerpunga, Ulrik Maratse Tasiilameersoq oqarpoq.
Foto: Privat
Motoori umiarsuarmi siullermi nassiussanut ilaavoq, Ulrik
Maratse, piffissap ingerlanerani assigiinngitsorpassuarnik angallateqarsimasoq,
oqarpoq. – Nuummi najugaqarallarama Flipper 630 umiatsiaq motoorilik pigaara, aamma
Minor 750-imik peqarnikuuvunga. – Umiatsiaqarnani inuuneq pikkunaattoq isumaqarpunga, taanna oqarpoq.
Ulrik Maratsep innuttaasut ilaat nutsertoq siorna ikiorpaa, taamaalilluni umiatsiaa pisattanik karsinillu ulikkaarpoq.
Assi: Privat
