B-67 Polar Entreprise Supercupimi ajugaavoq

Unamminermi pissanganartuni unammisaqattaareerlutik B-67 ajugaavoq. Tassani pokalinnapput tæppilu kuultiusoq atillugu. Taakku ajugaasut, SAK1 aappaattut inissipput, N-48-lu pingajuattut inissilluni.

Pokalinnattut saniatigut,  Disko 76, I-69, T-41, S-68, Kaassassuk, IT-79 aamma K-33 unammersuaarnermi peqataapput. 

Meeqqat nuannaartut sungiusaasullu tulluusimaartut

Ole Lange, pingaarnertut aaqqissuusisuuvoq sungiusaasuullunilu, taassuma aaqqissuussaq iluatsilluartutut nalilerpaa:

- Nuannivataarpoq! Pissarsiaqarnavataarpoq! Meeqqat nuannisarnissaat ikinngutitaartornissaallu siunertaanikuuvoq, tamannalu anguarput. Malunnarpoq unamminerup naajatornerani klubbit assigiinngitsut imminnut qanilliartortut.

- Soorlu omklædninginut iseraanni klubbeqatigiinngitsut ataatsimut sammisaqarujoortut pinnguaqatigiillutik. Assorujussuaq nuannerpoq!

Meeqqat peqataasut teknikkikkut taktikkikkullu piginnaasaat nersualaarpai. Ilanngullugulu oqaluttuaralugu tupaallannartunik naammattuuisarsimallutik.

Toqqaannarnermi ajornartorsiortut, suukkiarli

Naak unammersuaarneq iluatsilluaraluartoq, toqqaannartumik Youtubekkut aallakaatitsiniarneq ilungersunarsimavoq, naammagittaalliortoqartarlunilu. Kisianni soqutaanngilaq, Ole Lange oqarpoq:

-  Youtubekkut aallakaatitsineq ajornalaarnikuuvoq, attaviit ajornartorsiutigigamikkit. Naammagittaalliortoqarpoq, kisianni soqutiginagit pingaartinnerpaasakka tassaapput meeqqat nuannisarnissaat, maaniinnerminni puigunaatsumik misigiusaqarnissaat pingaartinnerpaagakku, ilinniutaavorli, Ole Lange naggasiivoq.