Martin Møller sisoraatinik oqilaniunnermi nunanut allanut unammisartunut sungiusaasunngoqqittoq
Arctic Circle Racemi ajugaaqqammersoq OL-imilu peqataasimasoq Martin Møller nunatsinni sisoraatinik oqilaniunnermi ukiuni tulliuttuni siulersuisuussaaq.
Martin Møller Arctic Circle Racemi aqqanilissaanik ajugaqqammerpoq.
Assi: Sisorartartut Kattuffiat
Kalaallit Nunaanni sisoraatinik oqilaniuttartut sungiusaasortaaqqipput. Sungiusaasussaq tassaavoq 44-nik ukiulik Martin Møller, sisoraatinik oqilaniunnermi ilisimaneqarluartoq.
Kalaallit Nunaanni Sisorartartut Kattuffiat taama tusagassiutitigut nalunaaruteqarpoq.
Martin Møller Danmark sinnerlugu ukiuunerani OL-ertoqarnerani marloriarluni peqataasimavoq.
Nunanut allanut unammisartunut sungiusaasutut suliassaasa pingaarnerit ilagaat sisorartartut inuusuttut piginnaanillit ineriartortinneqarluarnissaannik qulakkeerinninnissaq. Tamatuma saniatigut illoqarfinni sungiusarfissanik pitsaasunik pilersitseqataanissaq, sungiusaasut attaveqaqatigiinnerisa siuarsarnissaa ataatsimullu killiffiup qaffannissaa peqataaffigissavaa.
- Martin Møllerip isumaqatigiissuteqarfigineratigut siunissamut nutaanik nukissaqarfiulersussamut, ataatsimoorfiulluartumut Kalaallit Nunaannilu sisoraatinik arpannerup ineriartortinneqarnissaanut qilanaarpugut, Ujakkaartartut Ataatsimiititaliaanni siulittaasoq Marie Fleischer tusagassiutitigut nalunaarummi oqarpoq.
Nunanut allanut unammisartunut sungiusaasunngoqqittoq
Martin Møller aatsaat sisoraatinik oqilaniuttartunut sungiusaasunngunngilaq.
2021-mi nunanut allanut unammisartunut sungiusaasunngorpoq. Ukioq ataasiinnaq qaangiummat isumaqatigiissutaa 2024-mi aasap tungaanut atuutilersussanngorlugu ukiunik marlunnik sivitsorneqarpoq.
Allanilli sammisaqarniarnini pissutigalugu 2022-mi oktobarimi nunanut allanut unammisartunut sungiusaasuujunnaarniarluni aalajangerpoq.
Maanna sungiusaasunngoqqippoq. Arctic Circle Racemi, nunarsuarmi sisorarluni unamminerit sakkortunerpaartaasa ilaanni, aqqanilissaanik ajugaanerata kingorna sapaatip-akunnera ataaseq qaangiuttoq tamanna nalunaarutigineqarpoq.
Nunanut allanut unammisartunut sungiusaasortaamut isumaqatigiissut 2025-mi apriilip 14-ianni atuutilerpoq, aallaqqaammullu ukiumi ataatsimi atuutissaaq.
