Misigisaq puigunaatsoq

Kalaallit inuusuttut 130-t inuunerminni puigugassarinngisaminnik Hjørringimi Dana Cupimi ulluni makkunani peqataapput. Inuusuttut isikkamik arsaallutik Danmarkimi unammiuaarnerisa annersaat, nunarsuarmilu unammiuaarnerit annersaasa ilaat, nunanit 57-ineersunit 14.000-init peqataaffigineqarpoq.

B-67-imi U13-ininngaanneersut nukappiarartaasa Jens Jørgenip, Miniup aamma Lucasip sapaatit akunnera nuannerluinnartutut misigaat.

- Misigisarujussuuvoq - ivigaaqqani perngaammik aatsaat arsaratta. Soorlu TV-kkut arsaattut isiginnaartakka arsaaffigisartagaanni. Arsaattarfik aamma angisoorujussuuvoq, nalinginnaasumimmi futsalertaratta. Arpannerulaartariaqarnerli qunuginngilara, Minik oqarpoq.

- Nuanneqaaq, ulloq naallugu nuannisarpugut. Kiannera ajoqutiginngilara — siallerneralu eqqartortagaat misiginngilarput. Minisaqattaarnera kisimi, Lucas ilassuteqarluni oqarpoq.

Angerlarsernissamut piffissaqanngitsoq

- Pisoqarpallaarnera angerlarsernissamut piffissaqartitsinngilaq. Ilagut angerlarserfiginngiivippagut, Jens Jørgen oqarpoq.

Nukappiaqqat sungiusaasuata Ungaaq Abelsenip Hjørringimiinneq aamma naammagisimaarpaa.

- Arsaattarferujussuarmi nunanit tamalaanit arsaaffigineqartartut assiganni misiliisinnaagatta nuannaarutigeqaarput. Nuummi qaqutigut taamaaliorsinnaagatta, Ungaaq Abelsen nassuiaavoq.

- Unammisartunut inuusuttunut peqataasinnaaneq pingaaruteqartorujussuuvoq, inuunerminni puigugassarinngisaminnik misigisaqarput. Angajoqqaat aningaasaliisullu qujassutissaqarfigeqaagut, meeqqammi nuannersumik misigisaqartinniarlugit ilungersorsimammata. Inuunerminni misigisaanni nuannernerpaat ilaattut puigunngisaannagassaminnik misigisaqartut qularinngilara.

- Dana Cupip naammassereerpat B-67-imi unammisartut pingasunngornermi timmisartumik angerlannginnerminni ulluni marlunni Københavnimiissapput, tassani suleqatigiinnermik ineriartortitsissapput katerisimaaqatigiinnermilu peqataassallutik, Ungaaq Abelsen oqaluttuarpoq.

B-67-immersut iligiiaat qulit ukioq manna peqataapput. Nuummiit IT-79-imiit marluk aamma Qaqortormiut K1933-imiit ataatsit peqataallutik.

Aaqqissuussarujussuaq

- Peqataasut Hjørringimut Dana Cuperiarnerminni atuarfinni najugaqarput – tassa Jyllandip avannaani atuarfiit tamangajammik timersorianit unnuisarfittut atorneqarlutik. Peqataasut kajumissutsiminnillu ikiuuttut ullut tamaasa nerisaqartinneqarput – nerisitsinerit tamaasa 15.000-ingajannik sassaallertoqartarluni, Dana Cupimi paasissutissiinermut pisortaq Torben Vandsted oqaluttuarpoq.

Iligiit tamarmik minnerpaamik sungiusaatigalugu ataasiarlutik unammipput, aamma unamminerit pingaarutillit pingasut kiisalu playoff-imi unamminerit Dana Cupimi unammiuaarnermi tunngaviusumi unammissutiginissaat qulakkeerneqartarput. 15-it inorlugit ukiullit unamminerit immikkoortuini marlunnik 20 minutsinik tamarmik sivisussusilinni unammisarput, angajulliunerusullu marloriarlutik minutsini 25-ni unammisarlutik.

Sapaatit akunnerani ataatsimi unammisaqattaarnerit arsaattarfinni 63-ini katillugit 2542-riarluni unammisoqassaaq.