Orla Isaksen Mølgaardip 3.500 kilometerisut isorartutigisoq maajimi arpassavaa
Orla Isaksen Mølgaard arpattartuusoq misilittagaqarluartoq, timikkut tarnikkullu imminut unammillerujussualerpoq: maajip qaammataani 3.500 km arpanniarpaa. Tamanna isumaqarpoq ullormut ullut tamaasa 113 km arpattassagaa.
Orla Isaksen Mølgaard 2020-imi maajimi 600 km arpappai.
Assi: Kim Rosing Photography
Nunatsinni maaji peqqissuutittarparput. Orla Isaksen Mølgaardilli maaji ingasattuutinniarpaa.
Taassumami timikkut tarnikkullu imminut unammillerluarniani takisuumut Nuummi arpassaaq.
3.500 km maajimi arpanniarpaa. Tamatta isumaqarpoq ullut tamaasa 113 km arpattassagaa.
Orla Isaksen Mølgaard 31-inik ukioqartoq 2020-imi maajip qaammataani 600 km arpappaa. 2021-imilu 1.000 km aamma maajip qaammataani arpallugu. Taanna aamma 2022-imi augustusip qaammataani Ironmanimut peqataavoq. Taakkuinnaanngillalli, taassumammi maratonit arlallit aamma peqataaffigisarerpai. Maannali suli sakkortunerusumik misigisaqarusuppoq.
- Takorluukkama killiffiffaariffia angorusuppara.
Orla Isaksen Mølgaardip anguniagaa pillugu Sermitsiap oqaloqatigaa:
- Apeqqut "sooruna?" akiuminaatsippara. Kisianni anguniagaqarlunga arpakkusuppunga. Takorluukkama killiffiffaariffia takorusuppara. 1.000 km arpannikuuara. 2.000 km arpassinnaassavara? Ajunngilaq ullormut 100 km arpassinnaavara, taava aalajangerpunga 3.500 km arpanniarlugu. Upperivara angusinnaassallugu.
Taassuma ilanngullugu oqaluttuaraa eqqarsartaatsikkut nukittoreerluni, nuannaralugulu eqqarsartaatsikkut imminut tamaviaartinnissani.
Illoqarfimmi suliffeqarfinniit tapersersorneqartoq
Arpannissaminut tapersersortissarsiorpoq. Arpanninilu filminngortikkusuppaa piviusulersaarusiaralugu. Suliffeqarfiit allat, soorlu IttuNET atisanik arpaatinik tunniussaqarpoq. FitnessGL aaningaasaliiniarpoq. Allanullu aamma aningaasaliisussarsiorluni qinnuteqareerpoq.
Nunarsuarmi ilisimaneqartumit siunnersorneqartoq
Orla Isaksen Mølgaardip piareersarnini pitsaanerpaamik ingerlanniassagamiuk Canadamiu arpattartoq nunarsuarmilu rekordiliisimasoq Dave Proctor arlaleriarluni oqaloqatigisimavaa. Dave Proctor siornatigut Canadami ulluni 67-ini 7.200 kilometerit arpaffigai. Orlap Dave Proctorip atuakkiaa aamma isumassarsiorfigisimavaa.
