Kalaallit Nunaata CONCACAF-imut ilaasortanngorniarnera itigartinneqarpoq

Kalaallit Nunaanni Arsaattartut Kattuffiat, KAK, ataasinngornermi unnukkut nalunaarpoq Kalaallit Nunaata Concacafimut ilaasortanngorusulluni qinnuteqaataa itigartitsissutigineqarsimasoq. KAK Facebookimini taama ilisimatitsivoq.

KAK ukioq manna aallartilaartoq Concacafimut, nunat Amerikap avannaani, Amerikap qeqqani Caribiamilu arsaattartut kattuffiinut, ilaasortanngorniarluni qinnuteqarpoq.Ilaasortanngoruni KAK ineriartortitsinerulersinnaanermut periarfissaqalissaaq, arsaattartut nunanut allanut unammisarnissaannut periarfissaqarnerulissallutik.

- Akunnerit 24-it tulliuttut pisoq pillugu ilutsinni nalilersuillutalu oqallisigissavarput, aalajagiussamut qanoq iliortariaqassanerluta, KAK-p siulittaasua Kenneth Kleist tusagassiuutinut nalunaarummi oqarpoq nangillunilu:

- Maannamulli aalajagiusimavarput aalajagiineq arsarnermi demokratiimut ajugaanerunngitsoq, tassami aalajagiineq una nunarsuatsinni arsarnermut tamanut periarfissiinngilaq, aamma aalajagiinerup takutippaa nunat minnerit namminneq erfalasortik atorlugu arsarsinnaalernissaminnut unammillernartumik annertoorujussuarmik inissisimasut, oqarpoq.