Nunanut allanut unammisartunut sungiusaasoq Concacafimit itigartitsisoqareersorlu: Naapertuilluanngilaq
Miamimi juunip 9-ani immikkut ittumik ataatsimeersuarnermi nunat 41-t tamarmik Kalaallit Nunaata ilaasortanngornissaa itigartippaat.
Itigartitsinermut tunngavilersuutit eqqortut Concacafimeersut amigaataasut nunanut allanut unammisartunut sungiusaasoq Morten Rutkjær ilaatigut isumaqarpoq. (Toqqorsivimmit assi).
Assi: Leiff Josefsen
Amerikap avannaani arsaattartut kattuffiata (Concacafip) juunip aallartinnerani Kalaallit Nunaata peqataanissaanik akuersinninnginnera Morten Rutkjærip, Kalaallit Nunaanni arsaattartut nunanut allanut unammisartut sungiusaasuata, suli eqqaamavaa.
Taama nunanut allanut unammisartunut sungiusaasoq TV 2 Sportimut oqarpoq.
- Kalaallit Nunaat nunanut allanut unammisartussaajunnaarpoq. Tamanna upperiuminaappoq. Maannakkut arsaannissamut takorluugaqarfissaqannginnera Kalaallit Nunaanni meeqqanut inuusuttunullu ajuusaarnarpoq. Arsaannermi peqataasinnaajunnaarnerput naapertuilluanngitsuusoq isumaqarpugut, Morten Rutkjær oqarpoq.
Concacafip Miamimi USA-miittumi juunip 9-ani immikkut ittumik ataatsimeersuarnerani nunat ilaasortat 41-t Kalaallit Nunaata ilaasortanngornissaa taasissutigaat. Concacaf Amerika Avannarlermi, Qiterlermi kiisalu Caribiami ilaasortaqarpoq.
Tunngavilersuutissaqanngitsumik itigartinneqarneq
Nunanut allanut unammisartunut sungiusaasoq naapertorlugu nunat 41-t tamarmik itigartitsipput.
- Piffissap ingerlanerani ilaasortanngornissarput anguniarlugu suut suliarissanerlugit paasitinneqarumaartugut ilimagigaluarpara, kisiannili tunngavissaqanngitsumik naatsumik allagaqarluni itigartinneqarnerput tupaallaatigaara, taanna TV 2 Sportimut oqarpoq.
Sungiusaasoq naapertorlugu tamatuma kingorna Kalaallit Nunaata arsaattartut kattuffiat pitsaanerusumik inissisimalernissamut allatut iliuuseqarsimasinnaanersoq paasiniarpaa.
- Periuseq malissimallugu akipput, tassa nunat ilaasortaasut tamarmik ataatsimeersuarnermi taasinissamut periarfissinneqarput. Taamaammat suut tamarmik eqqortumik suliarineqarput. Siunissamilu „ingerlalluarnissatsinnik“ kissaappaatigut, Rutkjær oqarpoq.
Taamaalilluni Kalaallit Nunaat nunarsuarmi arsaattartut kattuffianut sumulluunniit ilaasortaajunnaarpoq, taamaallaallu sungiusaatitut unamminerit nunat tamalaat arsaattartut kattuffiannit (FIFA-mit) akuerineqarsimanngitsut unammiffigisinnaavai.
Uefa FN-imi ilaasortaanissamut piumasaqaateqartoq
Aamma anngunniunnerit peqataaffigineqarsinnaanngillat.
Danmarkimut atassuteqarnermi Kalaallit Nunaata Savalimmiut assigalugit Europami arsaattartut kattuffiannut (Uefa) ilaasortaanissaa pissusissamisooraluarpoq.
Uefa-mili nunat ilaasortaasut FN-imut ilaasortaasariaqartut piumasaqaataavoq. Kalaallit Nunaalli ilaasortaanngilaq.
Concacafip tamanna piumasaqaatiginngilaa, taamaammallu Kalaallit Nunaat ilaasortanngornissamut qinnuteqarsimavoq, iluatsinngitsumilli.
/ritzau/
