Nunanut allanut unammisartunut sungiusaasup isumaqatigiissutaa sivitsorneqartoq – Kalaallit Nunaat sinnerlugu sukataarniartoq
Nunanut allanut unammisartunut sungiusaasup Morten Rutkjærip Kalaallit Arsaattartut Kattuffiatalu (KAK) suleqatigiinnertik sivitsorpaat.
KAK-p allaffeqarfiani pisortaq Aqissiaq Ludvigsen nunanullu allanut unammisartunut sungiusaasoq Morten Rutkjær.
Assi: KAK
KAK-p nunanullu allanut unammisartunut sungiusaasup Morten Rutkjærip suleqatigiinnissamik isumaqatigiissut 2027-p tungaanut sivitsorpaat, KAK tusagassiuutinut nalunaarummi allappoq.
Morten Rutkjær 2019-imiilli nunanut allanut unammisartunut sungiusaasuuvoq, sivisunerusumik sungiusaasuunissamik neqeroorfigineqarami qulanngilaq. Kalaallit arsaattartut pillugit suli sukataarnissamut piareersimavoq:
- Kalaallit Nunaanni arsaattartut nunanut allanut unammisartuinut 2019-imiilli sungiusaasuuvunga. Misigisaq nuannerluinnartoq, Kalaallit Nunaanni arsaannermik siuarsaanissamut suliniuterpassuarnik aallartitsiffiusoq.
- Nunami suliniutissanik isumassarsianiit nunarsuup sinneranut attaveqarneq ukiuni kingullerni marlunnit suliniutigisimavagut. Misigisaq immikkorluinnaq ittoq. Kalaallit Nunaata timersornikkut nunarsuup sinnerani akuulernissaa soqutigineqartorujussuusoq takuarput, Morten Rutkjær oqarpoq, nangipporlu:
- Arsaannermi aqqusaakkanik unammilligassanik nalaataqarnikuuvugut, KAK-miillu isumaqatigiissutima 2027-mut sivitsorneqarnissaanik neqeroorfigineqarama qulanngilanga. Kalaallit Nunaat pillugu arsaannermi naapertuilluarneq sulissutigiuassavara, aamma nunanut allanut unammisartut akornanni arsaannermi kulturi pitsanngorsartuassallugu. Piffissaq ungasinnerusoq eqqarsaatigalugu unammiuaarnerni annerusuni, soorlu VM-imut anngunniunnerni, peqataasinnaanngorniassammata.
KAK-p siulittaasuata Kenneth Kleistip isumaqatigiissutip sivitsornera aamma nuannaarutigaa:
- Morten sungiusaasuinnaanngilaq pikkorissoq – aammali Kalaallit Nunaanni arsaattartunut ilaqutaalerpoq. Kulturerput, unammisartuvut unammilligassallut nalaattakkavut paasilluarpai, sulianilu uummateqarfigalugit iluunngarluni suliaralugit. Unammisartut tatigigaat ersarippoq, ineriartorneralu takusinnaalereerparput, Kenneth Kleist oqarpoq.
