Pissaaneqarpallaarput
Mexico Citymi nunarsuarmi pissartanngorniunnissamut anngunniunnermi kalaallit marloriarlutik ajugaasareerlutik, pingajussaani unamminermi Cubamiunut nukittuunut unammilluartunut ajorsarput.
Minik Dahl Høegh Mexico Citymi timigissartarfimmi.
Berit Duus
Kalaallit Nunaat aallaqqaataaniit aallartilluarpoq. Unammineq saassussisumik illersuisoqarluni aallartissasoq, nunanut allanut unammisartut sungiusaasuat Johannes Groth aalajangersimavoq. Kalaallit Nunaat naggataani arfineq-marluniit tallimanut unammivoq.
- Ajoraluartumik arfineq-marluunnik unammisoqarluta arfinilinnut unammineq iluatsinngilaq. Periarfissarsiorsimavugut, kisianni cubamiut målmandiat nukittuallaarpoq, pillarneqartarpugullu Cubamiut målimik isertitsigaangata, måleriaraangatta målmandiata arsaq annaattaramiuk, Johannes Groth oqarpoq.
Unamminermi siullermi Cuba 21-inik isertitaqarpoq, nunarpullu aqqaneq-marlunnik isertitaqarluni.
Unamminerup aappaa
Unamminerup immikkoortuata aappaani siullermik minutsit 30-it kingulliit naligiinnerulerput.
Nunarput målinik arfinilinnik kinguarsimavoq, 29-23-imi inissisimallutik. Cubamiulli ingerlarsulerput, unamminerlu 35-26-imik inerneqarluni naammassivoq.
Cuba assammik arsartartunik nukittuunik pikkorissunillu peqartuaannarpoq. Piginnaasaqaqaat, Kalaallit Nunaannullu unammillernarluni.
Qallunaat assammik arsartartuinik malinnaagaanni aamma naluneqanngilaq Fredericia HK-mi arsaattartut pitsaanerpaat ilaat Cubamiu Reiner Taboada, Danmarkimi pissartanngorniunnermi ajugaaniutivinnissamut aalajangiisuusinnaasoq.
Eqqissisimaarfik
Assammik arsartartut Mexico Citymi ullumi sisamanngornermi qasuersaarput. Tallimanngorneq Puerto Ricomut unammiffiussaaq, arfininngornermilu USA unamminermi kingulleq unammissallugu. Sapaammi inissinniunneq unammissutigineqassaaq, tassanilu aalajangerneqassaaq kikkut nunarsuarmi pissartanngorniunnissamut anngutissanersut.
