Qulutak Møller Arctic Circle Racemi ajugaarusuppoq: Martin Møller unamminissaanut piareerpoq

Qulutak Mølleri ujakkaarutini atinissaanut piareeqqavoq, anguniagaqarlunilu: Arctic Circle Race 2025-imi ajugaanissaq. 

Akunnerit arlallit ilungersorluni sungiusareerluni piumassuseqarluarlunilu pissartaasartoq Martin Møller unammillernissaanut piareeqqalluinnarpoq. 

- Arctic Circle Race 2025-ip aaqqissuunneqarnissaanut sungiusarluarsimanera misilittagaqarlualersimaneralu neriuuteqarluarfigaakka. Ukioq kingulleq peqataaninni nr. 5-itut katinnerani inissippunga pitsaanerusumik inississinnaagaluarlunga.

- Ullormi siullermi ingerlanerlunnera minutserpassuarnik unammisannut annaasaqaatigaara. Ullormili siullermi kukkussutikka allattaavinnut allanikuuakka iluarsisassatut. Ullormi aappassaani siulliit pingasut akornaniillunga apuuppunga, kiisalu ulloq kingulleq ajugaasuusoq Martin Møller apuunniuteqatigalugu siulliup tulliatut apuuttarfimmut apuullunga.

Kukkussutsini ilinniarfigigai - maanna piareeqqavoq

Arctic Circle Race nunarsuarmi sisoraatinik oqilaniunnerit sakkortunerpaat ilaattut ilisimaneqarpoq, Qulutalli tamanna nikalluutiginngilaa.

Siorna ullormi siullermi aallartilluannginnermigut minutsinik pingaarutilinnik annaasaqarsimavoq, kisianni ingerlalluaqqilerpoq ullormilu tulliuttumi angusarissaarnerpaat pingasut akornanniilluni.

-  Neriuuteqarlualersitsivoq. Ullormi kingullermi sukkanerpaajusartoq qulissaanilu ajugaasoq ingerlaaqatiginerani aqqutaani arpattuniik imertitsisuniillu tapersersorluarneqarneq misigaara, imminullu upperinerulerneq misigalugu. Apuuteqatiginerami tulluusimaarutigeqaara assut, tapersersorluarneqarneralu nunaqqatinniik ingiaqatigisanniillumi nukittuallaatigisimaqaakka. Ukioq mannamullu sungiusarluarnissannut kaammattuutaalluarsimapput.

Aallarterlaamiit unammisartutut

Qulutak Mølleri 2019-imi sisoraatinik piseqqaarpoq, taamanilu anguniagaa ataasiuvoq: Arctic Circle Racemi peqataaniarluni. 

Taamanimiilli aallartikkami maanna unammisartuuvoq. Ukiut kingulliit sisoraatinik arpannermi ajugaajumalluni nukissaqarnissani nikallujuinissanilu sulissutigisimavaa.

- Aatsaat taamak nukittutigivunga sisorartalerninniilli. Misigisimavunga aatsaat taamak nukittutigalunga sisorarnerup silarsuaani sungiusarluarnermalu imminut upperinerulersillunga, taamaattumik unammillerluarsinnaallunga misigisimavunga.

- Pitsaanerit pingasut akornanni inissinnissaq siunertaavoq ajugaasinnaanerli soorunami aamma siunertaassalluni. Aasaq sungiusaqatigiinnermi oqaatigisimasara Martin Møllerimut isertuutissanngilara, ajugaaffigerusullugumi oqarfiginikuuara.

Maanna apeqqutaaginnalerpoq Qulutak Møller unammillertini Martin Møller ukioq manna Arctic Circle Racemi ajugaaffigissaneraa.

- Unamminissap qanillinerani unamminerulluunniit nalaani napparsimalernissaq pinngitsoorsinnaagaanni, isumaqarpunga unammillerluarsinnaallunga.