Politiiusimasoq pinngitsaaliisimasutut isumapiloqarlunilu tatiginnilersitsiniaasimasutut pineqaatissinneqarpoq
Peqatigiiffimmi suleqataasimasoq politiiusimasorlu niviarsiaqqanik ukiukitsunik kinguaassiuutitigut atornerluisimasutut ukiuni arfinilinni qaammatinilu arfinilinni pineqaatissinneqarsimasunut inissiisarfimmiittussanngortinneqarpoq. Pineqaatissinneqarnini suliareqqitassanngortippaa.
Suliaq Eqqartuussisoqarfik Sermersuumi Nuummiittumi sapaatip-akunnerata missaani suliarineqarpoq.
Assi: Morten Okkels
Angut niviarsiaqqanut pingasunut peqatigiiffimmi sulinermini naapissimasaminut pinngitsaaliisimasutut allatigullu kannguttaatsuliorsimasutut unnerluutigineqartoq Sermitsiami allaaserisavut sapaatip-akunnerani kingullermi arlallit saqqummerput. Angut piffissami tassani politiitut aamma atorfeqarpoq.
Eqqartuussisoqarfik Sermersuumi maanna eqqartuussut saqqummiunneqarpoq: Ukiuni arfinilinni qaammatinilu arfinilinni pineqaatissinneqarsimasunut inissiisarfimmiittussanngortinneqarpoq. Niviarsiaqqanut marlunnut pinngitsaaliisimasutut allatigullu kannguttaatsuliorsimasutut pisuutinneqarpoq.
Angut peqatigiiffimmi suleqataanermini niviarsiaqqanut akisussaaffimmik paarisaqarsimanera pineqaatissinneqarnissaanut aalajangernermi sunniuteqarpoq. Aamma angut niviarsiaqqamut 15-ileereeraluartumik atoqateqarsimanera aamma inerteqqutaaneranik naliliinermut pissutaaqataavoq.
Politiitut atorfeqarnermini tatigineqarsinnaanini atornerlussimagaa eqqartuussisup naqissuserpaa.
Isumapiloqarluni tatiginnilersitsiniaasoqarneranut pineqaatissiissut siulleq
Angut aamma isumapiloqarluni tatiginnilersitsiniaasimasutut pineqataatissinneqarpoq. Eqqartuussiviup aalajangiinera naapertorlugu niviarsiaqqamut inuusuttumut allamut isumapiloqarluni tatiginnilersitsiniaasimavoq kingusinnerusukkut atornerlunnissaa siunertaralugu. Angut isumapiloqarluni tatiginnilersitsiniaasimasutut Kalaallit Nunaanni siullersaalluni pineqaatissinneqarpoq.
Niviarsiaqqanut marlunnut 150.000 koruuninik pingajuannullu 2.500 koruuninik akiliisussanngortinneqarpoq.
Angutip pineqaatissinneqartup aalajangiineq Nunatta Eqqartuussivianut suliareqqitassanngortippaa. Unnerluussisup sakkortunerusumik pineqaatissiisoqarnissaa neriuutigigaluarpaa, suliarlu Nunatta Eqqartuussivianut ingerlateqqikkusullugu. Illersuisup atermik saqqummiusseqqusinnginneq suli piumasaraa, politiiusimasorlu suli tigummigallarneqassaaq.
