Air Greenlandip timmisartuisa kinguaattoorneri inuttat unamminiarnartikkaat
Nuummi mittarfittaap ammarneqarneraniilli Air Greenlandip Københavnip Nuullu akornanni timmisartuussinerisa 41-t ilaat 29-t kinguaattoorsimapput, tamannalu timmisartumi inuttanut suli ilungersunarnerulersimavoq.
Timmisartumi inuttat naapertorlugit Københavnip Nuullu akornanni timmisartuussinerit 2024-mi novembarip 28-ani mittarfik ammarneqarmalli kinguaattoortarsimapput.
Arkivfoto: Jesper Hansen
Timmisartut Danmarkip Kalaallit Nunaatalu akornanni illoqarfiit pingaarnersaasa marluk akornanni angallassisartut kinguaattoortarmata timmisartumi saqisut sivisuumik sulisarlutillu sivikitsumik qasuersaartarput, taama allappoq atuagassiaq Fagbladet Luftfart, Air Greenlandimi timmisartumi saqisut kattuffianni (ACU) sinniisumik Naduk Themotheussenimik oqaloqatiginnissimasoq.
- Suliassavut amerliartuinnarput. Kingusinaarnerit pissutigalugit kingusissukkut angerlartarpugut, mittarfimmilu nutaami timmisartortartut inaannut pisunnissarput sivisuallaartarpoq, taamaammat ullormi kinguaattoorfiusumi qauersaarfissaqarpianngilagut, Naduk Themoteussen Fagbladet Luftfart naapertorlugu oqarpoq.
Immersuisitsilluni misissuineq
Taamatut oqarneq timmisartumi inuttat kattuffiata FPU-p ilaasortaminik apersuinera tunngavigalugu pivoq. Misissuinermi timmisartumi inuttat 90 procentiisa suliassat allanngornerat misigisimagaat, tamarmillu kinguaattoortarsimasut paasinarsivoq.
- Inuppassuit sulinngiffeqarnertik atorlugu qasuerniarsarisarput, aamma ullormut suliffik qanoq issanersoq qaqugulu angerlaqqinnissaq nalullugu aalajangersimanngitsumik suliartortarneq isumakkut tatineqaatigaat, Naduk Themotheussen Air Greenlandimi aqutsisunut saaffiginnittoq oqarpoq.
Naduk Themotheussenip suliniut aallartittoq paasisinnaavaa, “ilaasortammi taama amerlatigisut sivisuumik sulisariaqarmata peqatigiiffik aamma qisuariartariaqarpoq”.
Sulisitsisut kattuffiat ajornartorsiummut “aaqqiissutissarsiorniarluni” angallannermut aqutsisoqarfik attaveqarfigisimagaa nalunaarutigineqarpoq.
