Qarsoq Høegh-Damip danskit naalagaaffiat Greenland Airportsimit peersikkusukkaa

Ilulissani mittarfiup nutaap oktobarip 29-ani atoqqaarfissiorneqarnerani, danskit naalagaaffiata Greenland Airports International A/S-imi piginneqataassutai Kalaallit Nunaata tigusariaqarai, Naleqqami folketingimut ilaasortaatitaata Qarsoq Høegh-Damip naqissuserpaa. Piumasaqaat tamanna aamma Naleqqap Folketingimi politikkimik suliaqarneranut ilaavoq, Inatsisartunilu tapersersorneqarluni. Aningaasaqarnikkulli qanoq kinguneqarsinnaanera takujuminaappoq.

- Nunatsinni inuiaqatigiit mittarfiutitsinnut akiliisussaapput. Ingammik Kalaallit Nunaata iluani angalanernut tunngatillugu isertitat Kalaallit Nunaannut iluaqutaasassapput. Kalaallit Nunaat tamakkerlugu piginnittunngussasoq siunissami qaninnermi siunertaraarput, Qarsoq Høegh-Dam oqarpoq.
Saqqummersinneqarpoq

Qarsoq Høegh-Damip (N) Tuukkaq Ilulissani mittarfiup nutaap oktobarip 29-ani atoqqaartinneqarneranut atatillugu nuannaarutigalugu ilaaffigaa. Angalanissamut nutaanik periarfissaqalerneq tamatumalu Avannaani takornariaqarnermut pingaaruteqarnera erseqqissarpai.

– Toqqaannartumik angalalluni tikissinnaanngorneq inuttut soorunami nuanneqaaq. Uanga Iluliarmiunik soraluaqarama, taanna timmisartumi apersorneqarnermini oqarpoq.

Qarsoq Høegh-Damip (N) Tuukkaq Ilulissani mittarfiup nutaap oktobarip 29-ani atoqqaartinneqarneranut atatillugu nuannaarutigalugu ilaaffigaa. Angalanissamut nutaanik periarfissaqalerneq tamatumalu Avannaani takornariaqarnermut pingaaruteqarnera erseqqissarpai.

– Toqqaannartumik angalalluni tikissinnaanngorneq inuttut soorunami nuanneqaaq. Uanga Iluliarmiunik soraluaqarama, taanna timmisartumi apersorneqarnermini oqarpoq.

Aammattaaq timmisartukkut aqqutit nutaat takornariaqarnermut iluaqutaassasut taassuma ilimagaa.

– Minnerunngitsumik avannaanut aqqutissat takornariaqarneq eqqarsaatigalugu iluaqutaanissaat naatsorsuutigaarput. Ilulissat Kalaallit Nunaanni takornariaqarfissuit ilagaat.

Qarsoq Høegh-Damip mittarfiup ammarneqarnera nuannaarutigigaluarlugu politikkikkut apeqqutip aaqqinneqarnissaa kissaatigaa: Kalaallit Nunaanni mittarfiit kimit pigineqassappat?

Kalaallit Nunaata tamakkiisumik piginnttuulernissaanik kissaateqartoq

Greenland Airports International A/S-ip kalaallinit tamakkiisumik pigineqalernissaa Naleqqap sulissutigigaa Qarsoq Høegh-Damip erseqqissarpaa.

– Taanna anguniarlugu Folketingimi sulissutigaarput.

Tamatumunnga atatillugu, tassa danskit naalagaaffiata Greenland Airports International A/S-imi piginneqataassutai tamaasa tiguneqarnissaanut tunngasumi, Naleqqap siunnersuutaa Inatsisartuni partiinit tamanit taperserneqartoq innersuussutigaa.

Suliffeqarfiup pingajorarterutaata danskit naalagaaffiannit suli pigineqarnera akuerineqarsinnaanngitsoq Qarsoq Høegh-Damip oqaatigaa.

– Miffissarput inuiaqatigiit kalaallit akilersugassaat, minnerunngitsumik Nunatta iluani angalasoqartillugu akileraarfigisassaat Kalaallit Nunaata tamakkiisumik piffissami qanittumi pigilernissaa anguniagassaraarput.

Danskit naalagaaffiata Kalaallit Nunaanni piginneqataassutai Kalaallit Nunaata tigusariaqarai Naleqqap piumasarigaa taassuma ilaatigut ilisimatitsissutigaa.

Pingajorarterutaasoq danskit naalagaaffiannit pigineqartoq

Oqallinnermut tunuliaqutaasut 2018-imi Naalakkersuisut, aamma danskit naalakkersuisuisa Nuummi Ilulissanilu mittarfiliortiternissamut Danmarkimit peqataaffigineqarnissaa pillugu isumaqatigiissuteqarfigineqarnerannut tunngassuteqarput.

Isumaqatigiissutip tamatuma kingorna danskit naalagaaffiat Greenland Airports International A/S-imi piginneqataassutit pingajorarterutaannik aningaasaliivoq, Namminersorlutillu Oqartussat suliffeqarfiutaata Greenland Airports A/S-ip piginneqataassutit sinneri marluk aningaasaliiffigai.

Taamaalilluni danskit naalagaaffiat ingerlatseqatigiiffimmi 33 procentinik piginneqataalerpoq.

Mittarfiliornissaq itigartinneqanngitoq

Qarsoq Høegh-Dam Naleqqap danskit naalagaaffiata mittarfiliortiternissamut aningaassaliineranut siornatigut akerliusimanera pillugu aperaarput.

Danskit naalagaaffiata 700 millionit koruuninik aningaasaliinissaa isumaqatigiissutigineqarmat Naleraq Hans Egedep Illuata saavani akerliussutsimik takutitsivoq. Tamanna 2018-imi ataasinngornermi septembarip qulingani pivoq.

Qarsoq Høegh-Dam Ilulissani mittarfiup nutaap atoqqaarfissiorneqarneranut peqataavoq.

Taava pilersaarummut suliami akerliujunnaarpa?

– Sunaluunniit Nunatsinni sanaartugaq iluaqutaavoq. Kisianni danskit naalagaaffianiit aningaasaliiffigineqarnera Naleqaamit ulloq manna tikillugu akerleriuaannarnikuuarput. Uagut nammineerluta Nunatsinni attaveqaasersuutigut nunap allap pigisussaanngilai, kalaallit inuiaqatigiit pigisussaavaat.

Taassuma Naleqqap akerlilersuinera mittarfiliornermut tunngassuteqannginnerarpaa, piginneqataassusermulli danskillu naalagaaffiata inissisimaffianut tunngassuteqarnerarlugu.

Aningaasaqarneq pillugu apeqqutit akineqarsimanngitsorpassuit

Greenland Airports International A/S-ip tamakkiisumik kalaallinit pigineqarnissaa kissaatigineqartoq ersarippoq, pisinerulli aningaasaqarnikkut kingunerinut apeqqutit arlallit suli akineqarsimanngillat.

Danskit naalagaaffiata 33 procentinik piginneqataassutaata pisiarineqarnera qanoq aningaasalersorneqassanersoq Sermitsiap Qarsoq Høegh-Damimut apeqqutigaa.

Kalaallit Nunaata nammineq aningaasatigut pisussaaffimminik isumaginnissinnaalernissaa anguniarlugu danskit naalagaaffiata piginneqataassutaanik pisineq qanoq akeqassanersoq, aamma Greenland Airports siunissaq ungasinnerusoq eqqarsaatigalugu aningaasatigut imminut qanoq napatissinnaalissanersoq, ilaatigut apeqqutigaarput.

Danmarkip Greenland Airports ukiuni pingasuni tulliuttuni ukiumut 125 millionit koruuninik tapiissuteqarfigissavaa. Taamaalilluni mittarfiutileqatigiiffik ilaasunik isertitaqarneq aqqutigalugu aningaasartuutit tamakkiisumik matussusersinnaanerai, aamma Danmarkimit tapiissutit atorunnaarpata aningaasaqarneq qanoq ingerlassanersoq apeqqutaalerpoq.

Danmarkip Greenland Airportsimut piginneqataassutsini tunippagit, ilutigisaanillu ingerlatseqatigiiffimmiit aniguni, aningasatigut tapersersuiinnassanersoq, Qarsoq Høegh-Dam apeqquteqarfigaarput.

Qarsoq Høegh-Damillu allaaserisap matuma allanneqarnerata nalaani apeqquterput suli akinngilaa.

INATSISARTUT APEQQUT SULIARAAT

Greenland Airports International A/S-ip kimit pigineqarnera pillugu apeqqut Inatsisartuni oqaluuserineqareerpoq.

Naalakkersuisut danskit naalagaaffiata Greenland Airports International A/S-imi piginneqataassutai tamaasa pisiarinissaat siunertaralugu naalagaaffiup oqartussaasuinut saaffiginninnissaanik peqquneqassasut Naleqqami Inatsisartunut ilaasortaq Pele Broberg 2025-mi oktobarip 21-anni siunnersuuteqarpoq.

Aningaasaqarnermut Akileraartarnermullu Ataatsimiititaliap siunnersuut suliaralugulu 2026-mi apriilip qulingani isumaliutissiissuteqarpoq.

Attaveqaasersuutit pingaarutillit najukkami nakkutiginissaat Kalaallit Nunaata sulissutigisariaqaraa Inatsisartuni isumaqatigiissutigineqartoq isumaliutissiissummi allassimavoq.

Kalaallit Nunaanni attaveqaasersuutit pingaarutillit siunissaq ungasinnerusoq eqqarsaatigalugu kisermaassilluni piginnittunngornissamik anguniagaqartoqarnissaa Naalakkersuisut isumaqatigiissutigaat, aningaasaqarnikkulli pissutsit illersorneqarsinnaalerpata aatsaat taama iliortoqassasoq nalilerneqarpoq.

Danskit naalagaaffiata piginneqataanerata pisiarinissaanut aaqqiissutissaqarpallaanngitsoq ataatsimiititaliap maluginiarpaa.

Taamaammat Greenland Airports International A/S-ip tamakkiisumik pigilernissaa siunertaralugu, Naalakkersuisut naalagaaffiup oqartussannut saaffiginnissasut piumaffigineqassasut Aningaasaqarnermut Akileraartarnermullu Ataatsimiititaliaq allannguutissatut siunnersuuteqarpoq.

Ataatsimiititaliap allannguutissatut siunnersuutaa naapertorlugu Naalakkersuisut kingusinnerpaamik 2027-mi januaarip aallaqqaataani  naalagaaffiup oqartussai saaffigissavaat.

Kalaallit Nunaata piginneqataassutinik tigusinissaanik ataatsimiititaliap inassuteqaataani toqqaannartumik aalajangiisoqannginnera maluginiassallugu pingaaruteqarpoq, suliamik aallartitsinissaq, danskillu oqartussaanut saaffiginninnissaq matumani pineqarpoq.

Ataatsimiititaliap isumaqatigiittup allannguutissatut siunnersuummi akuerineqarnissaa inassutigaa, Naalakkersuisulli Inuit Ataqatigiillu allannguutissatut siunnersuutaat, taamatuttaaq aalajangiiffigisassatut siunnersuutigineqartoq itigartitsissutigineqassaasoq aamma inassutigineqarpoq.

Isumaliutissiissut naapertorlugu Namminersorlutik Oqartussat piginneqataanerminni ingerlatseqatigiiffimmik annertuumik aqutsilereerput. Kalaallit Nunaat tamakkiisumik piginneqataalerpat tamanna piginneqataassuteqartunut allanut pisussaaffiliinngitsumik kinguneqassasoq ataatsimiititaliaq erseqqissaavoq.

Aammattaaq pisinerup aningaasaqarnikkut kinguneri suli naammaginartumik paasineqarsimanngitsut ataatsimiititaliap erseqqissarpaa.

Pisartagaqarneq

Allaaserisaq tamaat atuarniarukku atuisunngortariaqarputit! Iserit!

Sermitsiaq.gl – Nittartagaq

  • Sermitsiaq.gl-imi allaaserisat tamakkiisumik atuarsinnaalissavatit
  • Qaammammut kr. 59.00
  • Ukiumut kr. 650.00
ATUISUNNGORIT

Asasarput atuartartoq, Sermitsiaq.gl-imut – Kalaallit Nunaanni nutaarsiassanik isornartorsiuisumillu tusagassiornermik saqqummiussiffimmut – tikilluarit. Kiffaanngissuseqarluni tusagassiornerup siuarsarneqarneranik suliniuteqartuarsinnaajumalluta, itisiliillutalu isornartorsiuilluta tusagassiortuarsinnaajumalluta, allaaserisat aalajangersimasut akeqalersippavut. Tamanna iluaqutigalugu allaaserisat pitsaassusaat qulakkeersinnaavarput, tusagassiortuttalu pikkorissut oqaluttuanik pingaarnerpaanik saqqummiussinissaannut tapersersorsinnaavavut. Allaaserisat akillit qaammammut taamaallaat 59 koruuninit akeqarput. Pisineq ajornanngitsuararsuuvoq – ataaniittoq toorlugu saqqummiussavut tamakkiisumik iserfigisalersinnaavatit. Paasinninnerit tapersersuinerillu qujamasuutigaavut. Pituttorsimanngitsumik isornartorsiuisumillu Kalaallit Nunaannut tusagassiortarnissamik suliniuteqartuarnissamut akiliutivit ikiorpaatigut.

Powered by Labrador CMS