Angalasoqarnerulerneratigut takornariaqarnermi nutaanik periarfissaqalerpoq

Denverimi peqataanermi ataatsimut isigaluni uppernarsaataavoq Amerikami niuerfimmi periarfissaqartoq, eqqaasitsinerullunilu Kalaallit Nunaanni misigisassarsiortitsisarnerup nukittuumik inissisimanissaa qanoq pingaartigisoq – ingerlatsinikkut isumannaatsuunermi, ersarissumillu ataatsimut sammiveqarluni, maajip naalernerani Denver Coloradomi Adventure Elevate North America 2025-mi Hotel SØMA-mit peqataasoq oqarpoq.

 USA-mi attavissat

Hotel SØMA-mili aamma maluginiarneqarpoq USA-mi angalatitsivinneersut Kalaallit Nunaannut timmisartornermi missinnaajuarnissaq ernummatigineqartoq naammassisinnaasallu takornariarpassuarnik sullissinissamut naammannersut.

 – Maajip naalernerani Denver Coloradomi Adventure Elevate North America 2025-mi Kalaallit Nunaat soqutigineqarluartoq takuara. Takornariaqarnermi saqqummersitsineq misigisassarsiortarnermut tunngatinneqarpoq, takornariarpassuit allat ornittanngisaanni immikkuullarissunik ornigassarsiortartunut, Ilulissani, Aasianni, Sisimiuni Nuummilu Hotel SØMA-mi ingerlatsinermut pisortaq Magnus R. Elleby oqarpoq.

 Angalanissamut saqqummersitsineruvoq attaveqatigiinnillu naapittarfiulluni, Kalaallit Nunaanni peqataasunut soqutiginarlunilu pissarsinartoq. Kalaallit Nunaanni niuerfimmut tulluartupilussuuvoq, misigisassarsiorneq, piviusuuneq pinngortitarsuarlu qitiummata.

 – Hotel SØMA suleqatissanik nutaanik 3-4-nik pissarsivoq, siunissamilu suleqatigisinnaasanik arlalinnik pissarsilluni, Elleby oqarpoq.

 Soqutiginninneq naleqartitallu

USA-mi niuerfik pissanganarpoq, annertoqigami, angalasunillu ilisimaneqarluartunit ingerlanneqarluni, suut kissaatiginerlugit ilisimaarinnittunik: Misigisassat immikkuullarissut, pitsaassuseq annertooq, ilorrisimaarnissaq oqaluttuallu pikkunartut.

 – Tamanna Hotel SØMA-mit Nuummi, Ilulissani, Sisimiuni Aasiannilu kusanartumik inissisimanermigut misigisassarsiortitsinissarlu qitiutillugu naammassineqarsinnaalluartut, Magnus R. Elleby naliliivoq.

 Takornariaqarnermut saqqummersitsineq SØMA-mi naleqartitanut aamma tulluarpoq.

Saqqummersitsinermi ersarippoq peqataasut piujuartitsilluni suliat takornariaqarnermut inuiaqatigiinnut utertitsilluni takornariaqarneq pingaartikkaat, tassalu Hotel SØMA-mi iluanaaruteqarnissamik siunertaqanngitsumi ingerlanneqartut umiartortut inuiaqatigiinnilu akuuffigisami isumaginninnikkut suliaqartoqarfiusumi. Hotel SØMA taaguutaavoq nutaaq, siusinnerusukkut umiartortut angerlarsimaffiisut Danmarkimilu umiartortut akornanni ajoqersuinermut tunngatillugu ingerlanneqartoq.

 – Tamanna oqaloqatigiinnermik niuernerinnarmut tunngasuunngitsunik pilersitsivoq – tamannalu USA-mi takornarialerisut peqataasut iluaraat, Elleby oqarpoq.

 Kinguaattoornerit

Ersaripporli aamma USA-mi takornarialerisut akornanni ernummatigineqariartortoq Kalaallit Nunaannut takornariartitsinissamut timmisartut minngittoorsinnaasarnerat peqqutigalugu kiisalu Kalaallit Nunaata ornigassatut attaveqaatit tamatigut angalasinnaasanngimmata.

Angalatitsisartut sullerissuupput sukumiisumillu piareersarsimallutik, takuaa.

– Angalatitsisorpassuit takornarianik angalaqatigiinnik namminerlu angalasunik Kalaallit Nunaaliartitsinissartik eqqarsarnartoqartippaat, ingammik takornariaqarnerpaap siornagut kingornagullu angalasukinnerpaaffiullu nalaani, attaveqarsinnaaneq tatigineqarsinnaanngippat, Magnus R. Elleby Sermitsiamut oqarpoq.

 Naammassisinnaasat

Ernumassutigineqartoq alla pingaaruteqartoq tassaavoq Kalaallit Nunaanni naammassisinnaasat takornarialerinermilu aningaasaliinissamut pisariaqartumik piumassuseqarneq.

 – Niuerfinnit soorlu USA-mit soqutigineqarnerujartorneq naammassisinnaasatigut atortulersuutinut amerlanerillu ataatsikkut takornariarsinnaanerisa piorsarneranut aningaasaliisariaqarpoq. Hotel SØMA-lli maluginiarpaa inuiaqatigiinni sammineqartut ilaat siunissami aningaasaliinissamut nalornilersitsisut, Magnus R. Elleby suna pinerlugu erseqqissanngikkaluarlugu oqarpoq.

 Patajaassuseq utaqqineqarpoq

Kalaallit Nunaanni attaveqaasersuutini ingerlatsinermilu tamatikkarnera niuerfimmut tuniluutipallappoq, ingammik siunissaq ungasinnerusoq eqqarsaatigalugu angalatitsisut tunuarsimaarnerulersimammata, oqarpoq nangillunilu:

– Ilarpassuisa Kalaallit Nunaata saqqumilaartinniarnera uteqqittarpaat, namminneq takoqqaarusuttaramikku ornigassaq patajaatsumik pilersuisinnaasoq, assartuussinikkut, unnuisarfitsigut misigisassatigullu, Magnus R. Elleby oqarpoq.

Kalaallit Nunaata kisimiilluni piumaneqassuseq naammassiuminaatsippaa, suleqatigiinnissamut aningaasaliinissamullu ammasumik periuseqartinnagu taama annertutigusunik, nunanit tamalaanit tikeraartunik angalatitsisunillu naatsorsuutigineqartut naammassinissaannut. Oqimaaqatigiissaarineruvoq uagut suliassaqarfitsinni inuiaqatigiinnilu isummerfigineqartariaqartoq, Hotel SØMA-mi ingerlatsinermi pisortaq naliliivoq.