Avannamut ingerlaartoqalersoq

Disko Linep umiarsuartaava nutaaq Maliina Ittuk Fynip kujataanit umiarsualivimmit sapaatit akunnerani kingullermi aallarpoq, tassani umiarsuarnik nakkutilliisunit misilinneqarluni akuerineqarsimallunilu.

Maliina Ittuk Qaqortup Narsarsuullu akornanni aalajangersimasumik angallassilernissaanut piareersaatit kingulliit inuttat Aarhusip talittarfiani maanna suliaraat.

Kalaallit Nunaanni pissutsinut naleqqiullugu umiarsuaq angisoorujussuuvoq – Disko Linellu Najaaraq Ittuummik 1999-imi peqalernerani kingorna umiarsuaq saviminermik sanaaq sisamanik inuttalik siullersaalluni Kalaallit Nunaannut tunniunneqartoq. Najaaraq Ittuk 60-inik ilaasoqarsinnaavoq – Maliina Ittullu marloriaatingajaanik – tassa 113-inik ilaasoqarsinnaavoq.

- Maliina Ittuk atorlugu ilaasut Targanit maanna Kujataani atortakkatsinnit ilorrisimaarnarnerungaartumik neqeroorfigisinnaavavut, Disko Linemi pisortaq Michael Højgaard oqarpoq.

- Maliina Ittuup Qaqortumi mittarfik aappaagu upernaakkut atulereerpat Kujataani angalasarnissaa pilersaarutaavoq. Mittarfik atulereerpat umiarsuarmik taama angitigisumik sumiiffimmi angallassisarnissaq silatusaarnerussanngilaq – Qeqertarsuup eqqaani angallassissutigisalissavarput, tassanilu mittarfik nutaaq 2027-mi ammarneqarpat ilaasunik takornarianillu angallassinerit amerleriarujussuarnissaat naatsorsuutigaarput.

Atlantikoq ikaarlugu sivisuumik angalaneq

Maliina Ittuup tallimanik inuttaqarpoq. Qaqortumut angalanissamut taakku piareersaleruttorput, aqqutigippat ulluni qulingiluani ingerlaartoqassalluni.

- Annikitsukkuutaarlugilli pissaagut. Maliina Ittuk nutaarluinnaammat ilikkarniaqqaartussaavarput. Shetlandip qeqertaasa tungaanut ingerlaqqitsigata Aarhusimiit Skagenimut imaluunniit Hanstholmimut angalaqqaassaagut, umiarsuup naalagaa Harry Bolt oqarpoq.

- Savalimmiunukariarluta Reykjavikikoorluta Kalaallit Nunaannut ingerlaqqinnissarput pilersaarutigaarput, tassani Nanortalimmukaqqaartussaassalluta.

Kalaallit Nunaannukaarnermi unnuinerit amerlanerpaat talittarfimmiinnissaat siunniunneqarpoq. Maliina Ittuk ullukkut angallataavoq, taamaattumillu initaqaranilu igaffeqanngilaq.

- Umiarsuarmi sininnissaq avaqqussinnaanngilarput, aqqummi takeqaaq. Unnuami siniffigissagaangatsigu patittakkani sinittassaagut. Angalanitsinni nerilluataarumalluta nillataartitsivimmik siatsivimmillu gasitortumik aamma pisinikuuvugut.

- Leirvik, Tórshavn, Reykjavik aamma Nanortalimmi unnuinissarput siunniupparput.

Sila naalagaavoq

Atlantikoq ikaarlugu angalanissamut piffissaliussat aamma aalajangersimalluinnartuuneq ajorput, pingaartumik Islandip Kalaallit Nunaatalu akornanni angalanerup naggataa sila sermersuarlu pissutigalugit unammillernartuusinnaasarlutik.

- Taamaattumik Kap Farvel kujammut ingerlavigissanerlugu imaluunniit Prins Christian Sund aqqusaarlugu ingerlavigissanerlugu suli aalajangersimanngilagut. Kalaallit Nunaanni taamaappoq. Sila sikulu apeqqutaasarput.

Kalaallit Nunaanni angallassisarnermi siullermi Maliina Ittummi inuttat tallimat tassaapput aquttut Allan Rasmussen aamma Rene Lyberth, mistaliuneq Lennie Ellegaard Mathiassen aamma umiartortoq Karl Petersen. Umiarsuullu naalagaa Harry Bolt.

Maliina Ittuup angissusiata saniatigut Kalaallit Nunaannut tunngatillugu immikkuullarissuuvoq, tassami umiarsuaq hybridiuvoq. Tassa imaappoq dieselimik innaallagissamillu ingerlasinnaavoq. Batterii akunnerit marluk missaanni ingerlasinnaapput. Taamatut ingerlasarnera pissutaalluni ingerlanerani motooria innaallagiartortoq atorneqartarpoq, taannalu batteriniit imaluunniit motoorimiit dieselitortumiit pilersorneqartarpoq.

Umiarsuit hybridinik atortorissaaruteqartut nutaajupput, taamaattumillu Maliina Ittuup sananeqarnerani unammilligassaqarfiusimalluni. Sanaartornera arlaleriarluni kinguaattoorfiusarluni.

Maliina Ittummi ilaasut inini marlunni issiavinni timmisartuni atorneqartartuni issiasinnaapput imaluunniit angallatip qaani qaqqat arferillu isikkivigisinnaallugit.

Maliina Ittuup ilua Julie Berthelsenimit, aamma kalaallit umiarsuaannut nutaamut kuisisumiit, eqqumiitsulianik pinnersaasersugaavoq.