Innarluutillit pillugit inatsimmut nutaamut kommunit: Aningaasat suminngaaniissappat?

Peqqissutsimut Inunnullu Innarluutilinnut Naalakkersuisup Anna Wangenheimip (D) ukiakkut ataatsimiinnermi, inuit innarluutillit tapersersorneqarnissaat pillugu inatsisissatut siunnersuut saqqummiuppaa.

Siunnersuutit ilaat tassaapput, ikiorserneqarnissamut periarfissat nutaat, sulianik pitsaanerusumik ingerlatsineq, pitsaaliuinerup pingaartinnerulernissaa, qanigisat isumaginnissinnaanissaannut periarfissaqarneq, inuusuttuunermiit inersimasunngornermut ikaarsaarneq pitsaanerusoq, pulaarneqarsinnaanermullu pisinnaatitaaffiit nukittorsarneqarnerat.

Kommunillu innarluutillit pisinnaatitaaffiinik pitsanngorsaanissamik anguniagaqarnermik tapersersuigaluartut, aningaasalersorneqarnissaanut qularutiginnittoqarpoq.

Kommunit tusarniaanermut akissutaanni tamanna erserpoq.

Aningaasartuutit amerlanerusut Naalakkersuisut missingersuutaannit qaffasinnerujussuunissaat kommunit ernumassutigaat.

Siusissukkut iliuuseqarnissamut aningaasat naammanngillat

Inatsissatut siunnersuummi erseqqissarneqarpoq, ajornartorsiuteqalertinnagu ajornerulersoqartinnagulu kommunit siusissukkut pinaveersaartitsinermillu iliuuseqartarnissaat. Kommunit ilaatigut innarluutilinnut taakkualu ilaqutaannut ornigulluni siunnersuineq neqeroorutigissavaat.

Avannaata Kommuniata siusissukkut iliuuseqarnissamut 2 millionit koruuninik aningaasaliissuteqarneq, tassa kommunini tallimani siunnersortinut sisamanut aningaasat atorneqartussat, naammaginanngitsut tusarniaanermut akissummini allappoq.

”Nalinginnaasumik suliassat siunnersuutigineqartut aningaasaliiffigineqarnerinilu pitsaanerusumik ataqatigiittoqarnissaa amigaataavoq.”

Kommuneqarfik Sermersooq aningaasaqarneq pillugu aamma isornartorsiuivoq. Suliassat siunnersuutigineqartut arlallit naammattumik aningaasaliiffigineqarsimanngitsut, naatsorsuinernilu pisariaqartitat annertusiartortut eqqarsaatigineqarsimanngitsut tusarniaanermut akissutaanni allassimavoq.

Siusissukkut iliuuseqartarnermut atatillugu suliassat, pingaartumik nunap immikkoortuisa akornanni isorartussuseq pissutigalugu aningaasartuutaasorujussuusinnaasut oqaatigaat.

”Kommunit ataatsimut isigalugit suliniummut ukiumut 2 million koruuninik immikkoortitsisoqarsimavoq. Kommuni isumaqarpoq missingersuutigineqartoq kommuninut suliassanngortinneqartunut naatsorsuutigineqartoq appasippallaartoq. Kommuneqarfik Sermersuumiinnaq immikkut aningaasartuutit ukiumut 2-3 million koruuniujumaartut missingerneqarsimavoq,” Kommuneqarfik Sermersooq taama allappoq.

Kommune Qeqertalimmi Qeqqatalu Kommuniani tusarniaanermut akissuteqaammi aningaasanik amigaateqarneq eqqaaneqarportaaq, tamannali Kommuni Kujallerup tusarniaanermut akissutaani annerusumik eqqaaneqanngilaq.

Kommunit akiliipput

Siunnersuut Inatsisartuni septembarip 25-ani oqaluuserineqareerpoq. Aappassaanik suliarineqarnissaa kinguartinneqarpoq qaqugulu suliarineqassanersoq suli aalajangerneqanngilaq, siullermeerinninnerulli kingorna Ilaqutariinnut Peqqissutsimullu Ataatsimiititaliamit isumaliutissiissummik saqqummiussisoqareerpoq.

Ataatsimiititaliami amerlanerussuteqartut siunnersuutip akuerineqarnissaanik innersuuteqarput. Piumasaraalli pingajussaaneerneqartinnagu ataatsimiititaliamut uterteqqinneqassasoq, Naalakkersuisut allannguutissatut siunnersuutaannut isumaliutissiissutigineqarsinnaaqqullugu.

Naleqqalli inatsisissatut siunnersuutip siunertaa, tassaasoq inuit innarluutillit pisinnaatitaaffiinik nukittorsaasoqarnissaa, tapersersorlugu ikinnerussuteqarlutik oqaaseqaamminni allapput, kommunilli aningaasatigut amigaateqarpata ajornartorsiulersinnaanerat ernummatigaat.

Inatsisissatut siunnersuutip aappassaaneerneqarnissaanut Inatsisartut nittartagaannut Anna Wangenheimip akissutini ilassuserpaa, tassanilu atuarneqarsinnaavoq innarluutilinnut isumaginninnermut kommunit ataatsimut tapiissutinut milliardit affaasa missaat ilanngunneqareersut.

"Innarluutillit aningaasatigut qanoq atuitiginerat nalornissutigineqartarpoq, tamannalu innarluutillit pillugit paasissutissat amigaataanerannik pissuteqarpoq, taakkumi amigaataareerput," taama allappoq.

Inatsisissatut siunnersuutip aningaasaqarnikkut kinguneri qanorluunniit ikkaluarpata, kommunit innarluutillit isumagineqarnerannut aningaasartuutit akilertassagaat Inunnut Innarluutilinnut Naalakkersuisoq ataatsimiititaliamut allakkatigut akissuteqarnermini allappoq .

Najugaq tunngavigalugu assigiinngisitsinerit, akisussaaffiillu erseqqissumik agguataarneqannginneri

Inatsisissatut siunnersuummi kommunit unammilligassanik allanik arlalinnik tikkuagaqarput, ilaatigut sulisut ilinniarsimasut amigaataanerat tikkuarpaat.

Sulisut maanna amerlassusii tunngavigalugit isumaginninnermut, siunnersuinermut ikiorteqarnermullu piumasaqaatit nutaat atuutilersinneqarnissaat ajornakusoorsinnaavoq.

Taakkuttaaq nunap immikkoortuini assigiinngissutsit tikkuarpaat. Isorartussutsit annertuut immikkullu ilisimasalinnut periarfissaqarnikkut killeqarnerit, nunami tamarmi neqeroorutit assingusut qulakkeerneqarnissaat ajornakusoortippaat.

Taakkua saniatigut akisussaaffiit ersarinnerusumik agguataarneqarnissaat kissaatigaat. Innarluutilinnut immikkoortortaqarfiup, peqqinnissaqarfiup, utoqqarnut immikkoortortaqarfiup meeqqanullu immikkoortortaqarfiup akornanni killiliussat ersarinnerusut kommunit arlallit pisariaqartippaat.

Kommunittaaq erseqqarinnerusumik ilitsersuutit, qarasaasiatigut periutsit pitsaanerusut, piginnaasanik ineriartortitsineq inatsisillu atuutilersinneqarnissaannut piffissaqarneruneq kissaatigaat.

Inatsisip januaarip aallaqqaataani 2027-mi atuutilernissaa, inatsisissatut siunnersuummi allassimavoq.