Oqaluttuaq una angummut inuusuttumut Tunumiumut piumassuseqarluartumut anguniakkanillu annertuunik ujartuisumut tunngavoq. Taanna Aqqaluk Christensenimik ateqarpoq, Tasiilami inunngorsimallunilu peroriartorsimasoq.
– Kilisaammi naalaganngornissaq anguniarpara. Iluatsissinnaasoraara, 31-nik ukiulik Aqqaluk Christensen Sermitsiamut oqarpoq. Naalagaq umiarsuarmi aalisariummi qaffasinnerpaatut akisussaasuuvoq.
Angakkoq ilisimaneqarluartoq Maratse, 1800-kkut naalerneranni 1900-kkullu aallartinneranni Tasiilap eqqaani inuusoq, Aqqaluup siuaasaasa ilagaat.
Aqqaluk Christensen 2019-imiilli Polar Pelagicip kilisaataataanni marlunni, Polar Amarumi Polar Ammassammilu aquttuuvoq. Taakku tamarmik Tasiilamiipput. Polar Seafood Greenland Polar Pelagicimi piginneqataanerpaallunilu Islandimiut suliffeqarfiutaat ikinnerussuteqarluni piginneqataavoq.
Umiarsuarmi siullermi aquttuusarlunilu umiarsuup aappaani aquttut aappaattut inuttaasarpoq.
Umiartortunngorniarluni ilinniarnermut ilaasoq
Polar Seafood piginnaanilinnik nutaanik umiarsuaatileqatigiiffiup ilinniartitsinissamut pilersaarutaanut peqataasussarsiortuaannarpoq. Ilinniartitsineq, akisussaaneq, ukiorpassuarnilu imarsiorluni sulisinnaanissaq ukkatarineqarput.
Taamaammat inuusuttut namminneq programmimut peqataanissamut qinnuteqarsinnaallutillu umiarsuarmi naalakkamit innersuunneqarsinnaapput, Steve Sonberg Egede Polar Seafoodimeersoq ingerlatseqatigiiffiup Facebookimi quppernerani allappoq.
Aqqaluk Christensen inuusuttut Tasiilameersup ingerlalluartut ilagaat, taannalu Polar Amarumi naalagaasup kajumissaarineratigut Polar Seafoodillu tapersersuineratigut Kalaallit Nunaanni imarsiornermi aqutsisutut ilinniarsimavoq. Aqqaluk 2019-imiilli Polarimi angusarissaarpoq.
Kilisaammi aquttoq 31-iinnarnik ukioqarluni qanoq ililluni taama siumukartigisimanersoq aperaarput.
Akissutaa erseqqippoq:
- Ilungersorlunga sulivunga. Sumiikkaluaraanni qanorluunniillu ilioraanni sapinngisamik pitsaanerpaamik iliuuseqartuaannarnissaq pingaaruteqartoq akkama maanna toqukkut qimagutereersup oqarfigaanga. Taava angusaqarluartoqarsinnaavoq. Taamaammat sapinngisara tamaat iliuuseqartassallunga oqariaaseqarpunga.
– Tasiilarmiunut Tunumilu inuusuttunut allanut maligassiuiumavunga, Aqqaluk Christensen oqarpoq.
Oqaatsit sisamat oqalussinnaagai
Umiarsuarmi aquttuussagaanni ilinniarluarsimasariaqarluni, sumiissusersiorluarsinnaallunilu aqutsillaqqissuusariaqarpoq.
Polar Amarumi Polar Ammassammilu aquttut naalakkallu amerlanersaat islandimiuupput, taanna oqaluttuarpoq.
Aqqaluk Christensenip aqutsisutut ilinniagaqarnermi saniatigut kalaallisut qallunaatullu oqalussinnaajutigaluni tuluttut islandimiusullu oqalussinnaanini nukittoqqutigaa. Tamanna isertuutinngilaa.
Aqqaluk Christensen ukiuni arlalinni Atlantikup avannaani avaleraasartoorniarluni, saarullernarniarluni, ammassassuarniarluni ammassanniarlunilu aalisaqataasarsimavoq.
– Soorunami uannut aningaasarsiutaalluartarpoq. Avaleraasartuunik ammassannillu aalisaraangatta akissarsinerpaasarpunga. Aalisarnerit taakku ukioq manna aningaasarsiutaalluarput, taanna oqarpoq.
Maratse
Tunumi angakkoq tusaamasaq pissaaneqartorlu Maratse, kingorna kuisissimasoq, anaanaminit aataqqeeqqeeraa. Taanna 1900-mi kuisippoq.
- Anaanama aanamalu taanna pillugu oqaluttuuttaqaannga, Aqqaluk Christensen oqarpoq.
Aqqaluup ataataa danskiusoq Tasiilami napparsimmavimmi peqqissaasuusimavoq. Aqqalu qaammatialuinnaqartoq ataataata umiatsiaaqqaminik illoqarfiup eqqaani aalisariaqatigisarpaa.
- Meeraallungali ataataga piniariaqatigalugulu aalisariaqatigisarpara. Kingumut qiviaraangama inuunera tamaat imaani angalasarsimavunga. 14-inik ukioqarlunga ataatama angallataani attartortittakkami takornarianik angallassisarlunga aallartippunga, Aqqaluk Christensen oqaluttuarpoq.
Polar Pelagic-mi aningaasarsiat pitsaanerujussuanngorsinnaanerat pissutigalugu 2015-imi Polar Amaroq-mi, qatanngutaa nukarleq tassani suliffigisaani, aalisartunngorpoq. Qatanngutaata trawlerimi suliffissamik soqutiginninnersoq aperaa.
Foto: Privat
Sanasutut ilinniarsimasoq
Taanna 2014-imi sanasutut ilinniarsimasunngorami Tasiilami sanasumit nalunaaquttap-akunneranut 125 koruuninik akissarsiffigineqarnissamik neqeroorfigineqarpoq, sanasullu danskit nalunaaquttap-akunneranut 200 koruunit sinnerlugit akissarsisinneqartarput. Tamanna qujaannarfigaa.
Polar Pelagicimi akissarsiaqarnerulersinnaanini pissutigalugu Polar Amarumi, nukkami suliffiani, 2015-imi aalisartutut sulilerpoq. Kilisaammi sulilerusunnersoq nukaata aperisimavaa.
– Tassani atorfininnissara eqqarsaatigilluaqqaarnagu qinnuteqarpunga. Akissarsiakitsillunga sanasutut sulinissaq kajumiginngilara, aalisarnermilu naqqaniit aallartikkusunneruvunga. Qaammatit marluk qaangiummata poortuisoorusunnersunga umiarsuarmi naalagaq aperivoq. Akuersivunga. Polar Amarumi sulisut aqutsisuattut ingerlaasaannaq qaffatsinneqarpunga. Tamatuma kingorna ilinniarfimmut atuariartorlungalu aquttutut ilinnialerusunnersunga umiarsuup naalagaa aperaaq, taanna oqaluttuarpoq.
Polar Seafood ilaatigut kilisaaterpassuamini aquttussanik, ilinniartitsinermik ineriartortitsinermillu 2016-imi ilinniartitsisalerpoq.
Polarip ilinniartitsinermut aaqqissuussaa
Aqqaluk Christensenip Polar Seafoodimit tapersersorneqarluni Kalaallit Nunaanni Imarsiornermik Ilinniarfimmi umiarsuup naalagaatut ilinniarnissamut periarfissaq atorluarsimavaa.
Polarip ilinniartitsinermut aaqqissuussaani inuusuttut imarsiornermi ilinniarnissamut, suliatigut, inuttut aningaasaqarnikkullu, tapersersorlugit periarfissaqartinneqarput.
Aqqaluup aquttuunngorniarnini 2019-imi naammassivaa, ukiullu tulliani Polar Pelagicimi aquttut aappaattut atorfinippoq.
Kilisaatit Polar Amaroq Polar Ammassallu qaammatini arlalinni ulapissimareerlutik avaleraasartoortassiissutitik tamakkersimagaat, taamaalillunilu ukioq manna avaleraasartoorniarneq naammassisoq Polar Seafood oktobarip aallartinnerani Facebookimi allappoq.
Umiarsuit taakku marluk Atlantikup avannaani Kalaallit Nunaata, Islandip, Norgep Savalimmiullu akornanni juunip naaneraniilli avaleraasartoorniarput. Aammattaaq ammassaat saarullernallu aalisarfissanngoraangat aalisartarpaat.
Avaleraasartoorniarnermi kingullermi Polar Amarumi Polar Ammassammilu inuttat 18-it aalisarput, matumanittaaq Aqqaluk Christensen aalisaqataavoq.
Inuttat amerlanersaat Tasiilameersuupput, inuttalli misilittagartuunik ilaqarlutillu inuusuttunik suli imarsiornermik ilinniartunik ilaqarput.
- Maanna pisassiissutit tamakkerneqarput, avaleraasartoorniarnerlu iluatsilluartumik naammassisinnaavarput, Polar Seafood allappoq.
Aqqaluk Christensen maannakkut sulinngiffeqarluni Nuummi ilaquttaminiippoq, tassanilu aappani meeqqatillu marluk inissiami piginneqatigiiffimmi najugaqarput. Meeraat tassaapput niviarsiaraq arfinilinnik ukiulik nukappiararlu arfineq-pingasunik ukiulik.
- Sapaatit-akunneri arfinillit arfineq-pingasullu sulisarpunga, taavalu piffissami taama sivisutigisumi angerlarsimasarlunga. Ukiumi ilivitsumi affaa imaaniillutalu affaa sulinngiffeqartarpugut. Aningaasarsiorluarpugut, taamaammat annerusumik initaarnissamut akissaqarpugut, taanna oqarpoq.
Aqqaluk Christensen aappani qitortillu marluk Nuummi piginneqatigiilluni inissiami najugaqarput.
Assi: Nammineq pigisaq
Illuserusuttoq
Aqqaluk Christensenip aappani Nuummi nammineq illuseqatigisinnaassallugu neriuutigaa.
Aalisartuugaanni aalisartuujuaannartoqartarunarpoq. Kalaallit Nunaata illoqarfiisa pingaarnersaanni angerlarsimagaangami sunngiffimi ilaa umiatsiaaqqaminit saarullinniartarpoq.
Aqqaluk Christensen ilaquttanilu Danmarkimi ulluni arlaqanngitsuni feeriareerlutik Gran Canariamut ingerlaqqipput.
– Ukiumut marloriarluta taqqavungartarpugut. 2025-mi juullikkunni Gran Canariamiippugut. Nuummilu apeqqammerpoq. Taamaammat kiassioriartulaarnissaq nuannissaqaaq, taanna oqaluttuarpoq.
Ilaqutariit aasaq manna Danmarkimi Frankrigimilu feeriarput. Taamaammat Aqqaluk Christensenip aningaasarsiagissaarnera nunatta avataani nuannisaarnissaminut periarfissaqarnerulersitsivoq.
Apersuineq naatinnagu inuusuttunut Tasiilamiittunut pitsaasumik siunnersuutissaqarnersoq aperaara:
– Ittuutuujunallu tunuarsimaartuussanngilatit. Ilinniarnissaq pingaaruteqarpoq. Ilisimasat ilikkagaqarfigisariaqarlugillu sapinngisamik ilikkagaqarluarniarsarissaatit. Imminut oqaluttuarissaguma Polar Seafoodip tamanik tunivaanga, aalisarnerli ajoraangat aamma najuuttarpunga, Aqqaluk Christensen oqarpoq.
Tasiilami inuusuttut uummamminiitippai. Illoqarfimmi arsaattartut ATA-meersut angalagaangata nammineq aningaasaatiminik tapersersortarpai.
- U-13, U-15 aamma U-18 pizzatorniartarfinni nerilluataarniassammata pinnguarfinnullu ornigussinnaaniassammata aningaasatigut tapersersortarpakka, Aqqaluk Christensen oqarpoq.
