Inuussutissarsiortut naalakkersuisoqatigiinnissamik isumaqatigiissummi qitiulluinnarput

Aningaasaqarnikkut

siunissaq piujuartitsisoq qularnaarniarlugu Kalaallit Nunaat aningaasaliisartunik namminersortunik amerlanerusunik pilerilersitsillunilu inuussutissarsiornikkut ineriartortitsinermik nukittorsaassaaq. Namminersorlutik inuussutissarsiortut amerliartussapput.”

 Demokraatit, Inuit Ataqatigiit, Siumup Atassutillu naalakkersuisoqatigiinnissamut isumaqatigiissutaani quppernermi 3-mi allassimavoq. Ilami inuussutissarsiuteqartut atugaat naalakkersuisoqatigiinnissamut isumaqatigiissummi qitiulluinnarput, tamannalu pissusissamisoorluinnartoq Sulisitsisut aperigaanni.

 Maleruagassat pisariillisarnissaat

– Isumaqatigiissummi arlalitsigut inuussutissarsiortut qitiusumi inissisimasutut oqaluuserinerat ajunngilluinnarpoq, Sulisitsisut pisortaat Christian Keldsen oqarpoq, ilaatigut maluginiarsimallugu naalakkersuisoqatigiit maleruagassanik pisariillisaanissamik anguniagaqartut.

 – Tamanna pingaarluinnartuuvoq. Maleruagassalli pisariillisagassat taamaallaat pinnagit aamma allaffissorneq. Arlalitsigut inatsisit pisariipput, allaffissornermi toqqaannartumillu naalakkersuinikkut akuliunneq ilungersunartarpoq. Assersuutigineqarsinnaavoq aatsitassanut inatsisit, ilarparujussui namminerminni ajornatik, naalakkersuinikkulli oqariartuutit, Kalaallit Nunaat aningaasaliinissanut qalluinermullu ammassanersoq atorfilittat inatsimmik suliaqarnerannik nalornilersitsivoq. Assersuut alla tassaasinnaavoq immikkut akuersissuteqarnissamik periarfissaqarmat soorlu takornarialerinermut inatsimmi, naalakkersuinikkut immikkut akuersisoqarsinnaalluni ilitsersuutissaqanngitsumik maleruagassaqaraniluunniit, taamaalilluni naapertuuttumik ingerlasoqarani, sullissinerlu naalakkersuinermik tunngaveqarluni.

 Akileraartarnikkut iluarsaaqqinneq

Naalakkersuisoqatigiit isumaqatigiissutigaattaaq inuussutissarsiornikkut akileraartarnermi iluarsaaqqittoqassasoq, taamaalilluni nunatsinni suliffeqarfimmik ingerlatsineq ajornannginnerullunilu akilersinnaanerulluni.

 – Suliffeqarfimmik ingerlatsinerup akilersinnaanerunissaanik anguniagaq pingaartupilussuuvoq. Kissaatigisimavarputtaaq akileraarnermi iluarsaaqqinneq ataatsimoortuussasoq, taamaalilluni ingerlatseqatigiiffiit akileraartarnikkut iluarsaaqqinneq inuttullu akileraaratarnikkut iluarsaaqqinneq imminnut atallutik, ataqatigiimmata. Tamanna naalakkersuisuusimasut pilersaarutiginngilaat, Christian Keldsen oqarpoq, maluginiarsimalluguttaaq naalakkersuisoqatigiinnissamik isumaqatigiissummi allassimasoq ingerlatseqatigiiffiit akileraarutaaat apparneqassasoq:

- Ingerlatseqatigiiffiit akileraarutaasa apparnissaat pitsaaqquteqarlunilu ajoqutitaqarpoq. Pingaarluinnassaaq akileraarutit appartinnerat aningaasalerneqartussaammat, oqarpoq.

Aningaasaliinissanut periusissiaq

Naalakkersuisoqatigiit aningaasaliinissanut periusissiornissamik anguniagaat Sulisitsisut aamma ilassilluarpaat.

 - Qujanaq, pingaarnerpaatut isigaarput akuerissallugu naammanngitsoq oqassalluni aningaasaliinissat ammaffigineqartut. Periutsivut, allaffissorneq minnerunngitsumillu inatsisit pimoorussinerusariaqarput. Tamanna Jens-Frederik Nielsenip Naalakkersuisuisa nutaat pingaarnertut suliassaasa ilagissavaat, aaqqitassaallunilu siulittaasup toqqaannaq akuliuffigisassaa, naak akisussaaffiup ilarujussua naalakkersuisoqarfinni allaniikkaluartut. Maannakkut periuserineqartup ingerlatiinnarnissaa annertuumik ajornartorsiutaassaaq, Christian Keldsen oqarpoq, erseqqissarlugulu maannakkut Namminersorlutik Oqartussanut pingasunik eqqartuussivimmi suliaqartoqartoq, ingerlatseqatigiiffiit Greenland Minerals, London Mining aamma Polar Seafood eqqartuussivilersuussillutik, tamarmik isumaqarlutik aatsitassanut aalisarnermullu inatsisip kingunerisaanik naapertuutinngitsumik pineqarlutik.

 – Eqqartuussivilersuussinerit ilungersunartutut isigineqartariaqarput, inatsisillu tunngavigineqartut misissorlugit, ingammik eqqartuussivilersuussinerit aningaasaliinissamik silaannarmut sunniutaat, Christian Keldsen oqarpoq.

 Sulineq akilersinnaasariaqarpoq

Naalakkersuisoqatigiinnissamik isumaqatigiissummi aamma allassimavoq suliffeqarnikkut iluarsaaqqinnissaq aallartinneqartariaqartoq qulakkeerniarlugu suliartortarneq tamatigut orniginarnerusoq. Allatut oqaatigalugu sulinissaq akilersinnaasariaqarpoq, inatsimmilu tunngavissaqassaaq sulisinnaasut tamarmik sulisinnaanissaat. Suliffeqarnikkut iluarsaaqqinnissamut atatillugu suliffissarsiortunut sullissinerup nalilersoqqinnissaa.

 – Aap, soorunami sulineq akilersinnaasariaqarpoq. Tamannalu arlalinni ajornartorsiutaasoq nassuerutigineqarpoq, iluarsiivigineqallaqisoq. Inuit suliffeqarnermi ilaasinnaanngitsut isumagineqarnissaat iluaraarput, aammali inuit pisinnaasut unittoorsimallutik ingerlariaqqinnissaminnik ajornakusoortitsisut ikiornissaat eqqumaffigisariaqarpavut. Suliffeqarfippassuit isumaginnikkut tunniusimasuupput, taamaattumillu aamma aaqqiiniarnerup ilaaniillutik, Christian Keldsen oqarpoq, isumaqarluni sulisussarsiuussisarneq nalilersuiffissaqqissoq.

 Nukissiuutit minguitsut

Naalakkersuisoqatigiinnissamik isumaqatigiissut aamma takkajaamik immikkoortoqarpoq, Kalaallit Nunaata minguitsumik nukissiornermi siuttunngussutigisinnaasaani. Naalakkersuisoqatigiinnit siunnersuutigineqarpoq aningaasaliinissamut periutsit aallaavigalugit erngup nukinganik nukiliorneq aningaasaqarnikkut misissuiffigineqartariaqartoq, ilaatigut pisortat namminersortullu peqatigiillutik aningaasaliisinnaanerat.

 Sulisitsisuni Christian Keldsenip aamma nalilerpaa, nukimmik pilersuinermi aaqqissuussineq tamarmiusoq nalilersussallugu pissanganarsinnaasoq, ilaatigut qanoq kajumilersitsisoqarsinnaanersoq inuussutissarsioriaatsinik suliffeqarfinnillu nutaanik pilersitsilluni, inuiaqatigiinni nuttarsinnaaneq annertusillugu nukissiornermilu sinneruttoq atorluarlugu.

 – Aningaasaliisussarsiornermi iliuuserisat annertusinissaanni taamaallaat ussassaarineq oqaatsillu eqqortut atorneqarnerat apeqqutaanngilaq. Aamma nammineq atugassarititatta nunanilu tamalaani soqutiginnittut akornanni pissutsit paasineqartariaqarput. Ingammik aatsitassarsiornissamut aqqut ingerlatseqatigiiffiit aqqutigalugit pisartoq, aningaasaliinernilu suniluunniit tunngaviummat politikerisap inatsisitigut allanngujaatsuunissaa.

 Naalakkersuisoqatigiit siammasissuunerat akeqarpoq

Sulisitsisunut pingaartuuvoq Naalakkersuisut aningaasatigut patajaatsumik ingerlanissaat, naalagaaffeqatigiittoqarluni nunanillu tamalaanit suleqateqarluni, inuussutissarsiortunut aningaasaliinissamilu tunngavissaqarluni.

– Isumaqarpungalu naalakkersuisoqatigiinnissamik isumaqatigiissut aamma taamaattunik imaqartoq. Kingunerisaatalu takunissaat qilanaaraarput, Christian Keldsen oqarpoq, innersuussutigalugu Sulisitsisuni arlaleriartumik ilungersunartut tikkuarneqartarsimasut, ukiuni kingullerni sisamani inuussutissarsiortunut inatsisit eqqarsaatigalugit.

– Neriuppugut Demokraatit siuttoralugit naalakkersuisuulersut tamanna sulissutigissagaat aammali ilisimaaraarput atituumik naalakkersuisoqatigiinnerusoq, tamannalu aamma akeqarsinnaasoq, Christian Keldsen oqarpoq.