Minik Rosingip marrarmik sermersuarmeersumik suliniutaa millionilinnik aningaasaliiffigineqartoq

Ingerlatseqatigiiffik Rock Flour Company ungasinnerusoq isigalugu marrarmik sermersuarmeersumik naggorissaatitut CO2-millu piiaanermik iluaquteqarnissamut 45,5 millionit koruuninik aningaasassarsivoq.

Sermersuup kaanngartarneranit qaarsumik sermip naqqaniittumik aserorterillunilu mangiaanermigut qajuusaasamik pilersitsisarpoq, taakkulu sermip aanneratigut tatsinut kangerlunnullu kuugunneqarlutik kinninnguuttarput. Ukiuni tuusindilinni kingullerni marraq taanna sequmilasoq inuussutissaqarluartorlu annertoorujussuaq katersuinnariaq sumiiffinnut nunaatinut naggorluffinnut aassartuutiinnariaavoq. Kalaallit Nunaata aatsitassai amerlasuut assiginagit marraq nutaaq pilertuarpoq, avatangiisinut inunnullu mingutsitsinissamik navialisitsinani iluaqutigineqarsinnaasoq.

Rock Flour Companymut aningaasaliisuupput Nalik Ventures, Soraarnerussutisiassanik katersivik SISA, tyskeq aallarnisaasartunut aningaasaliisartoq Carbon Drawdown Initiative, Novo Holding kiisalu Danmarks Eksport-og Investeringsfond EIFO.

Isumassarsiamit tunisassiornermut 

Aningaasaliissutit nutaat ingerlatseqatigiiffiup suliummi siullermeerluni niuernermik atuutilersitsinissaq aallarnisassavaa, oqartussat akuersissutissaannik suliaqassalluni, nalitusiartortitsineq akimorlugu suleqatissanik pingaarutilinnik pissarsilluni ilisimatusarnerlu, tunisassiorneq suleriaatsinillu teknologimik ineriartortitsineq sukkatsisassallugu. 

– Manna nuannerluinnartuuvoq, Kalaallillu Nunaanni marrarmik sermersuarmeersumik tunisassiornermik pisinnaanngortitsinissaq, nunalerisunullu avammut tunisassiorsinnaalernissaq neriunarpoq, ujarassiornermi professori Rock Flour Companymillu pilersitsisoq, Minik Rosing Sermitsiamut oqarpoq.

 Nunalerinermik annertoorsuakkaartumik misileraaneq 

Rock Flour Company Nuup Kangerluani Ilulialimmi, Sermilimmi kiisalu Paamiut eqqaani Sioqqami pingasunik ujarlernissamut akuersissutaateqarpoq. – Suli misissuinissamik akuersissutit atorneqarput. Alloriarneq tulleq tassaassaaq qalluinissamut akuersissummik qinnuteqarneq. Qaqugu tamatuma pinissaa oqaatigisinnaanngilara, aatsitassaqarnermulli oqartussat oqaloqatigilluarpagut. 2026-mi piffissami naatitsiffimmi Danmarkimi nunalerinermik ingerlatsisunik annertoorsuakkaanik misileraanerit siulliit ingerlassinnaaneri neriuutigaarput, Minik Rosing oqarpoq, imalu nangilluni: 

– Afrikami, Australiami, Frankrigimi Portugalimilu misileraanernik atortussiat naatitsinerni pitsaasumik sunniuteqarnerannik takutitsisunik ingerlatsisimavugut. CO2-mik piiaanermik pitsaasumik sunniuteqarnerata takussutissinnissaa sivisunerusumik ingerlanneqartussaavoq, naammassineqassaarli. Marrarmik sermersuarmeersumik nunalerinermi atorneqartussatut annertussusilimmik nussuisinnaaneq, nunalerisullu ilumut soqutiginninnersut, unammilligassat tullerissavaat. Taamaalilluta isumassarsiamit ajornartorsiummik tigussaasumik aaqqiinissamut misileraanermut ikaarsaassaagut. Sunniuteqarnera qularutiginngilarput, imminulli akilersinnaanera suli qularnartoqartipparput, Minik Rosing oqarpoq.

Aningaasaqarnikkut naatsorsuinerit 

Rock Flour Company Danmarkimi nunaatilinnik arlalialunnik, tunisassiamik pisisinnaanermik soqutiginnittunik, ingerlatseqatigiiffiullu marraap sermersuarmeersup qanoq naatitsinermut sunniinerannik alaatsinaannissaanik akuersisunik attaveqareerpoq. 

– Taamaalilluni aamma nunaatillit tamanna aningaasartuutinut naapertuunnersoq malugisinnaassavaat. Peqatigisaanillu tamanna uatsinnut aningaasaqarnikkut naatsorsuinermik pingaarutilinnik suliaqarsinnaanissatsinnut periarfissiissaaq, taakkulu suliniummik ingerlariaqqissinnaanitsinnut pingaarutilimmik takussutissiissapput, Minik Rosing oqarpoq. 

Danmarkimi nuna Afrikamisulli naggorlutsiginngilaq, taamaattorli naammassisaqarfiulluartumik nunalerinerup kinguneranik nunaatit naggorikkunnaaqqapput. 

– Nunaatit piffissami sivisuumi naammassisaqarfiulluartumik nunalerinermik ingerlatsinerup kingorna naggorissiseqqinnissaat matumani siunertarineqarpoq, tassungalu marraq sermersuarmeersoq iluaqutaasinnaavoq, Minik Rosing oqarpoq.

Christiana Dietzen, Dr. Erik Oppong Danso Ghanami Universitetimeersup Minik Rosingillu Ghanami marrarmik sermersuarmeersumik misileraanertik pillugu ilisimatuussutsikkut allaaserisartik atugassiamut ” Nutient Cycling in Agroecosystems”-mut ilannguteqqammivaat.