KL

DK

Amaroq Maarmorilimmi periarfissanik nutaanik takusaqartoq

Canadamiut aatsitassarsiornermik ingerlatseqatigiiffiata  Maarmorilimmi aatsitassarsiorfiup Inngili Qernertup eqqaani misissuinissamut akuersissutit marluk 2025-imi tiguai, sumiiffimmilu tassani aatsitassarsiornissamut periarfissallit minnerusut arlallit iluaqutiginiarlugit pilersaaruteqarpoq.

Aatsitassarsiornermik ingerlatseqatigiiffik Amaroq ukiup siuliani Maarmorilimmi nunaminertami 154 km²-inik annertussusilimmi misissuinissamut akuersissutinik marlunnik tigusivoq. Ingerlatseqatigiiffik nunami misissuilluni suliniutinik, ilaatigut qillerilluni misissuinernik aallartitsinissamut, 2027-mi pilersaaruteqarpoq.
Trine Juncher Jørgensen Tusagassiortoq / tusagassiortoq
Saqqummersinneqarpoq

Canadamiut aatsitassarsiornermik ingerlatseqatigiiffiata Amaroq-ip Uummannap eqqaani aatsitassarsiorfiup Inngili Qernertup siusinnerusukkut ingerlanneqartup nutaamik ineriartortinnissaa anguniarpaa. Ingerlatseqatigiiffik Kujataani akuersissutinik arlalinnik peqarpoq, ilaatigut Nalunami kuultisiorfimmut piiaanissamut akuersissut pigaa. Amaroq-ip Maarmorilimmi nunaminertamut 154 km²-inik annertussusilimmut misissuinissamut akuersissutit marluk 2025-imi tiguai. Nunaminertaq aatsitassarsiorfiup Inngili Qernertup sumiiffianik ilaatigut ilaqarpoq. Aatsitassarsiorfik kingullermik 1973-imiit 1990-imut ingerlanneqarpoq. Ingerlatseqatigiiffiup nammineq paasissutissiissutai naapertorlugit akuersissutit 10,5 millionit USA-mi dollarinik, tassa koruuninngorlugu 70 millionit missaannik akeqarput.

Børsimik nalunaarusiaq nutaaq naapertorlugu Amaroq zinkimik, aqerlumik, sølvimik kiisalu saviminernik pingaarutilinnik allanik annertuunik akuiaassuseqartunik nassaarsimavoq. Nassaat taakku immikkoortumi aatsitassarsiorfissatut periarfissanik arlalinnik ammaassissapput. Suliffeqarfik nunami annertunerusumik misissuinissamik, ilaatigut immikkoortumi qillerilluni misissuinernik nutaanik ingerlatsinissamik 2027-mi pilersaaruteqarpoq.

Amaroq Uummannap eqqaata immikkoortuani misissuinissamut akuersissutinik marlunnik 2025-mi pisivoq.

Ineriartortitsinissamut periusissarsiorpoq 

Immikkoortup ineriartortinneqarnissaanut pitsaanerpaamik periusissarsiornermik maanna suliaqarnertik Amaroq-mi pisortaanerup Eldur Olafssonip børsimut nalunaarummi oqaatigaa. 

"Nunaminertap annertuup periarfissarpassuallip ineriartortinneqarsinnaanera pillugu periusissiamik pitsaanerpaamik nassaarniarluta anguniagaqarluta sulivugut. Nunaminertami ilaatigut aatsitassarsiorfikumi Black Angelimi aatsitassarsiornissaq periarfissaavoq."

Suliffeqarfik "String of Pearls"-imik taasamik periusissiamik atuisarpoq. Pioreersunik attaveqaasersuutinik atorluaanikkut sumiiffimmi arlalinni aatsitassanik piiaanissamut periarfissaasut annertusarneqarnissaat tassani siunertarineqarpoq. Taamaalilluni aatsitassarsiorfimmik ataatsimik ingerlatsinissaq pinnagu, aatsitassarsirfiit minnerit arlallit pilersinneqarnissaat anguniarneqarpoq.

Maarmorilimmi ineriartortitsinissamut tunngavissat sinaakkutissallu suliffeqarfiup Namminersorlutik Oqartussanut nassiuppai.

inngili qernertoq amaroq minerals aatsitassarsiorneq inuussutissarsiutit placed zinki maarmorilik

Atorfiit tamaasa takukkit

PODCASTI

Powered by Labrador CMS