- Nalunaarut
nutaaq atulersoq nuannaarutigisorujussuuarput. Taanna
ingerlatseqatigiiffitsinnut aningaasatigut pitsaanngitsumik
kinguneqaatissaqanngilaq, maannamummi aalisariaaseq ingerlatarput
attatiinnartussanngorparput.
Taama
aalisartitseqatigiiffimmi Sikuaq Trawlimi Nuummiittumi allaffissornermi
pisortaq Stine Petersen oqarpoq.
- Nalunaarut
nutaaq atulersoq nuannaarutigisorujussuuarput. Taanna
ingerlatseqatigiiffitsinnut aningaasatigut pitsaanngitsumik
kinguneqaatissaqanngilaq, maannamummi aalisariaaseq ingerlatarput
attatiinnartussanngorparput.
Taama
aalisartitseqatigiiffimmi Sikuaq Trawlimi Nuummiittumi allaffissornermi
pisortaq Stine Petersen oqarpoq.
Taama Qeqertarsuup
eqqaani iluanaarnartumik pingaarutilimmillu sinerissap qanittuani raajarniarneq
pillugu aalisarnerup teknikikkut iluarsartuussivigineqarnera pillugu
Namminersorlutik Oqartussat nalunaarutaat pillugu oqaaseqarneratigut pivoq.
Nalunaarut ulloq 1. April atuutilerpoq.
Taamaalillutik
aalisartitseqatigiiffissuaq Polar Seafood Sikuarlu Kalaallit Nunaata kitaani
raajarniarnerup malittarisassiorneqarnera pillugu saqitsaannermi ajugaasutut
inissipput. Ingerlatseqatigiiffiit marluk kilisaataataasa tunisassiortut
angisuut, kilisaammi tunisassiorsinnaanerminnut akuersissummik
tigumminniinnarnissaat tamatuma kinguneraa, tamannalumi ingerlatseqatigiiffiit
annertuumik kissaatigisaraat.
40 mio. koruuninik
sinneqartoortoq
Sikuaq Trawl,
ilaatigut pisortamit Carl Christensenimit pilersinneqarlunilu pigineqartoq,
piffissami 2001-mit 2012-imut Kalaallit Nunaata kitaani sinerissap qanittuani
raajartassanik pisiortorpoq. Pisassiissutit taakku kilisaatini 75 procentinik
tunisassiorsinnaatitaallutik aalisarneqartarput. Kilisaatit Steffen C. aamma
Svend C. ukiuni 2006-2016 aamma 2017-mit ulloq manna tikillugu pisassiissutit
annertunersaat Qeqertarsuup eqqaani aalisartarpaat.
2024-mi Sikuaq Trawl
Svend C-mik piginnillunilu ingerlatsisoq taamaalilluni 40 million koruunit
angungajallugit akileraarutinut akileereerluni sinneqartoorpoq, 282 million
koruuninillu kaaviiaartitaqarluni. Tamanna ukiumoortumik naatsorsuutini
takuneqarsinnaavoq. Ingerlatseqatigiiffillu ukiup siuliani aamma taama annertutigisumik
sinneqartoorpoq.
Ajugaasut
Aalisartitseqatigiiffiit
namminersortut politikerillu akornanni nalunaarutissamut missingiummik
assortuussutaaqisumik saqitsaanneq, aalisartitseqatigiiffiit ajugaallutik
kilisaassuarminnit tunisassiortunit tamakkiisumik
tulaassisussaatitaasussaajunnaarnerannik inerneqarpoq. Naalakkersuisuusimasut
Inatsisartunilu amerlanerussuteqarsimasut taamatut piumasaqaraluarput.
Tamatuma Sikuaq
Trawlip kilisaataata Svend C-p, Polar Seafoodillu kilisaataata Polar Qaasiutip
Qeqertarsuup eqqaani sinerissap qanittuani raajarniarnerminnut atatillugu
umiarsuit pigineqarnerat tamakkerlugu kilisaammi tunisassiorsinnaatitaanerit
pigiinnassavaat.
Kilisaatit tunisassiortut
basisliniamit 3 sømilit iluanni aalisarnerminni pisamik 75 procentii kilisaammi
tunisassiarisinnaavaat, sinnerilu nunami tunisassiorfinnut tunisussaallugit.
Kilisaatillu
tunisassiorfiit ukiorpassuit qaangiuppata nutaanik taarserneqarneranni,
aalisartitseqatigiiffiit marluk taakku, aalisartitseqatigiiffiit allat
assigalugit kilisaatit minnerit atorlugit taamaallaat aalisarsinnaapput.
Ukiumut raajanik
9.000 tonsinik kilisattartut
Inatsisartuusimasut
2024-mi aalisarnermut inatsimmik suliarinninnerannut atatillugu Polar Seafoodip
Sikuaq Trawlillu kilisaataataasa tunisassiorsinnaanermut akuersissutaannik
pingaarutilimmik, kilisaatit imminnut akilersinnaalluarnerannut toqqammaviusumik
arsaarnissaat Naalakkersuisut kissaatigaat.
Siunissami kilisaatit
pisaat tamakkerlugit tulaanneqartarnissaat Naalakkersuisut piumasaqaatigaat.
Ukiuni kingullerni Qeqertarsuup eqqaani sinerissap qanittuani pisassaqarfimmi
angisuumi raajat 9.000 tonsit missaat pisarineqartarput.
Aningaasanik
annaasaqarnissaat aarlerinartoq
Nalunaarutissatut
siunnersuut politikerit kissaataat malillugu piusunngorsimassagaluarpat,
aalisartitseqatigiiffiit Qeqertarsuup eqqaani aalisarnermi isaatitsinermut
toqqammaviat annertuumik allanngorsimassagaluarpoq, pisammi tamakkerlugit
tunineqartussanngoraluarput. Allatut oqaatigalugu Namminersorlutik Oqartussat,
kommunit, aalisartitseqatigiiffiit inuttallu aningaasarpassuarnik
annaasaqarsimassagaluarput.
- Aalisarnerup
teknikikkut iluarsartuussivigineqarnera pillugu Namminersorlutik Oqartussat
nalunaarutissaattut siunnersuut taamanikkut ilusimisut iluseqartillugu
akuersissutigineqarsimasuuppat, tamanna nunatsinnut, inuussutissarsiortunut,
aalisartitseqatigiiffinnut, aalisartitseqatigiiffiit inuttaannut kommuninullu
annertuumik aningaasatigut kinguneqaateqarsimassagaluartoq, Sikuaq Trawlip
pisortaa Carl Christensen ulloq 19. December 2024-mi Aalisarnermut
Piniarnermullu Naalakkersuisoqarfimmut tusarniaanermut akissummini allappoq.
Polar Seafoodillu
isornartorsiuinera ima nipeqarpoq:
- Piviusorsiortumik
tunngaveqarnani taamak annertutigisumik aningaasaqarnikkut
kinguneqaateqartussamik aalisarnermik allannguerujussuarnissaq Polar Seafoodip
akisussaassuseqanngitsutut isigaa, ingammik aalisarnerup maannakkutut
ilungersunartorsiornerani.
Polar Seafoodip
naatsorsuusiai malillugit, kilisaatit namminersortunit pigineqartut marluk
piffimmi aalisarnerminni ukiumut 10-100 millionit koruuninik nunatta karsianut
akitsuutinik akiliisarput.
Inuttat ukiumut
katillugit 50-60 million koruuninik akileraarutinut A-nut akiliisarput.
Taakkulu saniatigut ingerlatseqatigiiffinnut akileraartoqartarpoq,
taamaalillunilu akileraarutinut ukiumut ilapittuutit 90-t 160 million
koruunillu akornanniipput.
Nalunaarut ukioq
manna 6. februar aalisarnermut piniarnermullu naalakkersuisuusimasumit Kim
Kielsenimit atsiorneqartoq, ulloq 1. april atuutilerpoq.
- Ingerlatsisut
nalunaarutip atuutilernera sioqqullugu Qeqertarsuup eqqaani pisaminnik
tunisassiorsinnaanermut akuersissuteqareersut, angallat atuinnarlugu
akuersissummik pissarsitinneqaqqipput. Ingerlatsisut angallamminnik
taarsiippata, piffissalluunniit ilaani angallat akuersissummut
attuumassuteqartinngippassuk, akuersissut atorunnaarsinneqassaaq.
Taama aalisarnerup
teknikikkut iluarsartuussivigineqarnera pillugu Namminersorlutik Oqartussat
nalunaarutaanni nutaami § 5, imm. 4-mi allassimasoqarpoq.
Sikuakkut
iluarisimaarinnittut
- Nalunaarut
nutaaq iluarisimaartupilussuuarput, matumanimi ingerlatseqatigiiffiup
ingerlaannarnissaa pineqarpoq, Sikuaq Trawlimeerrsoq Stine Petersen oqarpoq.
Polar Seafoodimi pisortap Miki Brøns ingerlatseqatigiiffiup nalunaarutissatut
missingiutaanut akerliliinerata kinguneqarnera iluarisimaarneraa Sermitsiap
apeqqutigaa:
- Suliaq
manna nunatta karsianut annertunerpaamik isertitatigut
kinguariartoorfiusussaagaluarpoq, taamaammallu politikerit nalunaarummik
inaarutaasumik allannguisariaqarsimapput, taanna oqarpoq.
