MOTOORI
Tesla soqutigineeruttoq
Teslap biilii pisortaanerup Elon Muskip politikkimut akuliutereernerata kingorna nunarsuaq tamakkerlugu tunisaajunnaariartuinnarput. Kalaallit Nunaanni IT-mik ingerlatsivik Comby biiliminut Teslanut marlunnut nipitittakkanik ”I bought this before Elon went crazy”-mik, kalaallisit „Elonip ingattarsilinnginnerani pisiaraara“-mik, allassimasulinnik pisisimavoq.
Comby siorna Teslamik marlunnik suliffeqarfimmut pisivoq. Pisortap Brian Torpip maannamut allanik piseqqinnissaminik pilersaaruteqannginnerarluni, biilili nuannaralugu oqaluttuaraa.
Assi: Mona Steenholdt
Biililiorfimmi
Teslami piginneqataassutit nalingi qaammatit pingasut qaangiutiinnartut
affaannanngorsimapput, USA-milu biilit Teslameersut ikuallanneqarlutik,
qalipanneqartarlutillu aserorterneqartarput.
Pisortaanerup
Elon Muskip præsident Trumpimut tapersersuinera suliffeqarfiup
iluarineqannginneranut, minnerunngitsumillu naalagaaffiup aallussanik
atorluaanermut immikkoortortaani, Department of Government Efficiency DOGE-mi
aqutsisutut sulinera pisortat atorfeqartitaannik tusindilinnik
soraarsitsinermik kinguneqartoq pissutaavoq.
Nuummi biilit attartortakkat
Biilinik Teslameersunik Europami tunisisarneq aamma appariangaatsiarpoq,
Norgemilu biilit nutaat 2024-mi tunineqartut 19 procentii
Teslameersimagaluartut maanna 2025-mi 9 procentiinnanngorsimapput.
Biilinut Teslanut allagartaq nipitittagaq inuppassuarnit nippussuunneqartoq, Elon Muskimut, Teslap pisortaaneranut, uumissuinermut ersiutaasinnaasoq
Assi: Stefan Boness/IPON
Nuummi
Teslat qulit missaanniittut aqqusinermi angalaartarput – nunatsinnimi Teslanik
iluarsaassiveqanngimmat tamarmik namminersortumit pisiarineqartut. Teslat
ataatsit Nuuk Rentalimiit attartorneqarsinnaapput, marlullu qarasaasialerinermi
suliffeqarfimmit Comby-mit pigineqarput.
Biili taamaaginnartoq
Brian Torpip, Combymi pisortaasup, Tesla suli nuannaralugu, maannakkulli
allanik piseqqinnissaminik kissaateqanngikkallarluni oqarpoq.
– Biilimi allanngornikuunngilaq. Piseqqikkusunngilangali. Piginneqataassutit
nalingi taamaaginnassappata Teslap pisortani soraarsikkumaaraa
naatsorsuutigisariaqarparput. Politikki inuussutissarsiornermut
akulerutsinneqaraangat eqqumiittuaannarpoq, inunnullu taama
attuumassuteqartigitillugu soorlu Teslamut Elon Muskimullu tunngatillugu, Brian
Torp oqarpoq, taannalu aamma biilinut nipitittakkanik nuannarineqarluartunik
ima allassimasulinnik inniminniisimavoq: „I bought this before Elon went
crazy.“
Taamaaliortuni
kisiartaanngilaq. Maannami nipitittakkat millionilikkaat nunarsuaq tamakkerlugu
Etsy-mi, Amazon-imi allarpassuarnilu tuniniarneqarput, taamaalillutik Teslanik
piginnittut allagartamik qulaani allassimasutut ittumik imaluunniit ”I love my
Tesla, not the CEO”, kalaallisut „Teslara nuannaraara,
pisortaaneraanngitsoq“-mik allagartalimmik Elon Musk USA-lu akuerinagit
ersersissinnaavaat.
USA-mi akerliuneq
Brian Torpili Nuummi biiliminik aserorterisoqarneranik
isornartorsiuisoqarneranilluunniit misigisaqarsimanngilaq.
USA-mi illoqarfippassuarni Teslamut akerliussutsimik takutitsisoqarpoq. Uani Teslap New Yorkimi niuertarfiata saani.
Assi: Jeenah Moon
– Naamik,
naamerluinnaq. Kalaallit Nunaanni taamaanngilaq. USA-mi Teslamut akerliuneq
Elon Muskip DOGE-mi aqutsisutut pisortani sulisunik soraarsitsiortorneranik
pissuteqartoq ilimagaara. Tamanna kamannermik akerliussutsimillu
takutitsinermik kinguneqarpoq, tamannalu Teslamut ajoqutaavoq.
Biilit
marluk Combyp pisiarisimasai Y-mik taaguuteqarput, taakkulu assakaasut sisamat
atorlugit ingerlasarput, ataasiaannarlugillu orsersoreeraanni 533 kilometerit
ingerlasinnaapput.
Allaaserisaq Motoorimi saqqummersinneqarpoq. Motoori uani atuarneqarsinnaavoq
