Aatsitassarsioqatigiiffiup isornartorsiuinera Naalakkersuisut ilisarisinnaanngilaat — nutserneqarnerata naammassininssaa utaqqineqartariaqarpoq

Aatsitassarsioqatigiiffiup Energy Transition Mineralsip (ETM) Naalakkersuisut Kuannersuarni aatsitassanik piiaanissamut pisinnaatitaaffik pillugu eqqartuussineq kinguarsarniarlugu malersuinerarlugit sapaatip-akunnerani kingullermi unnerluutigai.

Naalakkersuisut akissutip eqqartuussivimmut tunniunnissaanut killigititap sivitsorneqarnissaanik qinnuteqarsimanerat pissutigalugu, pisuutitsineq pivoq. Eqqartuussinerup sivitsorneqarnissaanut qinnuteqarneq, akissuteqaatit Kalaallisut nutserneqarnissaanik aallaaveqarpoq.

AAMMA ATUARUK

Kuannersuarni suliaq pillugu aatsitassarsioqatigiiffiup Kalaallit Nunaat sakkortuumik isornartorsiorpaa

Nunanut Allanut, Inuussutissarsiornermut Aatsitassanullu Naalakkersuisoq Múte B. Egede (IA) tusagassiuutitigut nalunaarummi akissuteqarpoq.

Suliffeqarfiup isornartorsiuinera ETM-ip nunami suliffeqarfigisaminut isiginnittaatsiminik ersersitsisoq, taassuma oqaatigaa:

– Kalaallit Nunaannut inuiannullu kalaallinut paasinnissinnaannginneq ataqqinninnginnerlu ingerlatseqatigiiffiup suliap ingerlanera tamaat takutitsisimanini nangillugu pivoq, Múte B. Egede oqarpoq nangillunilu:

– Suliassami eqqartuussivimmi allakkiat aalajangiisuulluinnartut kalaallisut pigineqartariaqarnerat pissusissamisoorpoq. Imarisai tamakkiisumik ilisimanagit, suliassami taama pingaaruteqartigisumi allakkianik naalakkersuisut akuersissuteqarnissaat piumasarineqarsinnaanngilaq. Tamanna ingerlatseqatigiiffimmut arlaannulluunniit, nunami sumiluunniit suliaqarnissamik kissaateqartumut, ersarilluinnartariaqaraluarpoq.