USA-mi pissutsit nutaat atuutilersut

”Halleluja!”

Præsidentip tullersortiginikuusaa Kamala Harris Demokratit Senatimi Sinniisoqarfimmilu amerlanerussuteqalernerat qulakkeerneqarmat marlunngornermi taama oqarpoq.

Præsident Trumpi suli aqutsisuuvoq, politikkikkulli ukiuni marlunni aggersuni sakkortuumik akerlilerneqassaaq. Akerlilersuineq Demokratinit kisimi pissanngilaq, immaqali aamma Republikanerinit, MAGA-mik ingerlatsinerup republikaanerit ileqquusumik politikkiannut naapertuutinngitsutut isiginninngitsut akornanniit.

Tamanna USA-mut, nunarsuarmut Kalaallit Nunaannullu iluaqutaassaaq. Piffissanngorpormi.

Nunarsuarmi naalagaaffiit pissaaneqarnerpaat præsidentiat nunamini akerlilersorneqarnerulertussaavoq. Siulittoruminaatsuunerata uteqattaartumillu uukapaatitsiniartarnerata nunarsuaq tamakkerlugu – minnerunngitsumik Kalaallit Nunaanni – eqqissiviilliortitsisarlutillu toqqissisimajunnaarsitsisarpoq. Qinersinermi inernerit tamanna sakkukillisissagaat neriuutigiinnarsinnaavarput.

Trumpilli Kalaallit Nunaat nunarsuarmi ilisimaneqarnerulersikkaa nassuerutigisariaqarparput. Pingaartumik Danmarki, aammali EU, Canada nunallu allat arlallit siornatigornit annertunerujussuarmik aningaasaliinikkut suleqatigiinnermullu periarfissat nutaat aqqutigalugit Kalaallit Nunaannik soqutiginninnerulersillugit ineriartorneq siuarsaaqataaffigivaa. Tamanna Kalaallit Nunaannut iluaqutaavoq. Tamatuma saniatigut Kalaallit Nunaat nammineersinnaallunilu namminiilivikkumaartoq ineriartornerup nunanut allanut takutippaa.

USA-mi qinigaaffiup qiteqqunnerani qinersinermi oqaluttuarisaanermiilersumi, Inatsisartut USA-p, Kalaallit Nunaata Danmarkillu akornanni illersornissamut isumaqatigiissummik aappassaaneerinnipput. Siunnersuut Naleqqamit isornartorsiorneqaraluartoq Inuit Ataqatigiinnit, Demokraatinit Atassummillu kiisalu attaviitsumik ataatsimik tapersersorneqarpoq. Siumut napparsimasoqarnera sulinermullu atatillugu angalasoqarnera pissutigalugit taasissuteqarnermi peqataanngilaq. Partiilli illersornissamut isumaqatigiissut tamakkiisumik, tassa 100 procentimik, tapersersorlugu ilisimatitsissutigaa. Maanna isumaqatigiissutip Folketingimi ulloq novembarip aqqaneq-aappaani suliarineqarnissaa utaqqineqarpoq. Tassanilu akuerineqarnissaa ilimagineqarsinnaavoq.

Illersornissaq pillugu isumaqatigiissut tunngavigalugu USA Kalaallit Nunaanni sakkutooqarnerulernissamut periarfissaqarnerulerpoq. Tamatuma akerlianik Kalaallit Nunaat nunani tamalaani nukittunerusumik inissisimalernissaminut periarfissinneqarpoq. Tamanna aningaasaqarnikkut periarfissanik, soorlu kalaallit suliffeqarfiutaannut suliassanik, aningaasaliinernik kiisalu suliffissanik amerlanerusunik pilersitsinissamut periarfissanik nutaanik ammaassissaaq.

USA-mi politikkikkut oqimaaqatigiinnerusumik, siulittuutigineqarsinnaanerusumik inissisimalernikkut suleqatigiinnerup annertusarnissaanut qaninnerulernissaanullu periarfissat pitsaanerulissapput. Kalaallit Nunaalli nammineq periarfissanik tigusisinnaallunilu nammineq soqutigisani aalajangiusimalluarsinnaagunigit aatsaat taamaaliorsinnaassaaq.