Tusassip periaasii nutaat qaartitsinikkut aallartinneqartut

Tusassip periusissiaani nutaami, 2028-p tungaanut atuuttussami, ingerlatsinerup pilersuinerullu isumannaatsuunissaat pingaarnerpaat ilagaat, tamannalu Nuummi qitiusumik qarasaasiaqarfimmi nutaami qulakkeerneqassaaq.

- Qaartitsineq una aallarnissutigalugu periusissiap piviusunngornissaa aallarnerparput. Qilanaarutigaaralu ukiumi 2027-imi naammassilluni atuutilersinnaanissaa, tassuunatigullu nuna tamakkerlugu attavinnik pitsaanerusunik isumannaannerusunillu pilersitsisinnaanissarput., Ulrik Blidorf, qaartitsinermik siullermik aallartitsisoq, oqarpoq.

Qarasaasianut atortorissaarutit sarfaarukkaangata sunnerneqaqqunagit qarasaasiaqrfiit sillimmasersorneqassapput. Aammattaaq qarasaasiatigut isumannaatsuunermut isumannaallisaanermullu sunniuteqassasoq Tusassip nittartagaani nassuiarneqarpoq.

Niuernerup ineriartortinnissaa

- Qarasaasiaqarfissuup pilersinneqarneratigut sullitatta pilersuinikkut isumannaallisaaneruneq naatsorsuutigisinnaassavaat. Tamatumalu saniatigut datacenteri Tier3-mut piumasaqaatinik naammassinninnikkut sineriammi suliffeqarfinnik inerisaaneq ikorfartorsinnaajumaarpaa. Teknologikkut suliffeqarfiit aammalu pilersuisut pisariallit, attaveqaatersuinermut pisariaqartunut piumasaqaatinik anngussisarnermikkut takutippaat atortorissaarutiminnik aammalu paasissutissaataallu Tier3 qarasaasiaqarfissuarmut inissiisinnaaneq pisariaqartoq. Qarasaasiaqarfissuup aammalu attaveqaasersuutinut pisarialinnut pilersaarutaasunut allanut ilanngulluni siunissami nunatsinni suliffeqarfinnut inerisaanermut ikorfartueqataasinnaajumaarpoq, Tusass ilisimatitsivoq.

Permagreen Polar El aamma HJ-Tek suleqatigalugit qarasaasianut atortoqarfimmik sanaartortussaapput, teknikkikkullu atortulersuineq Johnson Controls, PM Energi, Scanpotec aamma Opmatic isumagissavaat. Cowi Masanti Arkitemalu suleqatigalugit sanaartornermi siunnersuisuussaaq.