1968-ernisap Ando Møllerip kunngi Frederik assiliseqatigaa

Kunngikkormiut arfininngormat Pituffimmi, Qaanaami Aasiannilu tikeraareerlutik Kalaallit Nunaanni angalanerat kujammut ingerlaqqippoq. Sapaatiummat Qeqertarsuarmut tikipput.

Tassani innuttaasut amerlasuut kunngimik dronningimillu ilassinninnissamut piareersimapput. Taakkua ilagaat Ando Møller, ullormut immikkut suliassalik. Kunngi Frederittut 1968-imi inunngorpoq, 2009-milu taanna allallu marluk 1968-imi inunngortut kunngi assiliseqatigaat.

Taamaattumik Ando Møllerip ullormi tassani tikeraartoqarnerani taakku sisamat ukiut 15-it matuma siorna assilissami sanileriiaarnerat assigalugu assilisinniarsariniarluni imminut neriorsorsimavoq.

Sapiissuseqalersoq

Qeqertarsuarmi kunngikkormiut ikaartarfiatigut Frederik Marylu pisutsillutik ikaarneranni Ando Møller piareersimavoq.

- Siullersaallunga apeqquteqarfiginiarlugu sapinngisara tamaat iliorniarlunga eqqarsarpunga. Assi pillugu aperiniarlunga sapiissuseqalerpunga, marloriarlungalu aperivara, iluatsitsivungalu, nuan! Ando Møller oqarpoq.

Kunngip qanoq tiguaa?

- Aperivoq: Allanik 1968-ernisaqarpa? Taamaattumik tigulluarpaa, Ando Møller oqarpoq.

 - Kunngikkormiut uagutsinnut immikkut ittuupput

Kommune Qeqertalimmi borgmesterip Ane Hansenip, kommunalbestyrelsimut ilaasortat Simigaq Heilmannip aamma Karl Thue Nathanielsenip kiisalu meeqqat siunnersuisoqatigiivinut sinniisup NajaNuka Brobergip kunngikkormiut ikaartarfianni kunngikkormiut tikilluaqquaat, tamatumalu kingorna Hotel Qeqertarsuarmi ilassinnittoqarpoq.

Frederiup Maryllu kunngikkormiutut Kalaallit Nunaannut angalaqqaarnerminnut atatillugu Qeqertarsuaq aqqusaarmassuk pingaaruteqarluinnarpoq, Ando Møller oqaluttuarpoq.

- Pingaartumik peqaannguarigatsigu, tamatumanilu peqatigiiaarneq pingaaruteqarpoq. Peqatinik naapitsitilluni nuannaalertoqartarpoq, Ando Møller nuannaarluni oqarpoq.

Ilaqutariittut arpanneq aallartikkaa

Aallaqqaammut assi 1968-imi inuusut Facebookimi gruppiannut ilineqassaaq, kingusinnerusukkullu immaqa assiliaq naqiterneqassaaq sinilerneqarlunilu.

- Maani takullugit misigisaq nuannerluinnarpoq, kunngikkormiummi uagutsinnut kalaallinut immikkut ittuupput, Ando Møller oqaluttuarpoq.

Ulloq taanna kunngi Frederik dronning Marylu meeraallu prins Vincent prinsesse Josephinelu Qeqertarsuarmi angalaarput, Issittumilu Stationip sulinera pillugu paasissutissiivigineqarlutik. Illoqarfimmi suliniut Inoqatikka pillugu ilisarititsisoqarpoq, aallannginnerannilu Qeqertarsuaq Race - Family Mile kunngip aallartippaa. Tassani prinsi prinsesselu arpaqataapput.

Kunngikkormiut ataasinngornermi Attumut tikissapput.