2009-p kingorna inunngortunut tamanut tuluit naalakkersuisuisa tupa inerteqqutiginiarpaat
Illuatungiliuttut tapersersortigalugit inatsisissatut siunnersuut akuerineqassangatinneqartoq, tuluit naalakkersuisuisa pingasunngorpat saqqummiutissavaat.
Fra næste år må cigaretter ikke tændes på arbejdspladsen i Qeqqata Kommunia
Emil Helms/Ritzau Scanpix
Tupanik tunisassianik inunnut 2009-mi januaarip aallaqqaataata kingorna inunngorsimasunut tuniniaanerup inerteqqutaajuaannarnissaanik Tuluit Nunaanni naalakkersuisut inatsisiliorniarput.
Inatsisissatut siunnersuut Tuluit Nunaanni inatsisartut pingasunngorpat saqqummiutissavaat, tassani naalakkersuisut konservativiusut inuusuttut pujortartarunnaarnissaat pillugu neriorsuutiminnik eqquutitsiniarsarissallutik.
Inatsit atuutilersinneqarpat Tuluit Nunaat nunani tupamut tunngatillugu sukannernerpaamik inatsisiliortuniilersimassaaq.
Pujortartarneq inerteqqutaajunnaassanngitsoq naalakkersuisut oqarput, taamaammallu inerteqqutaanngitsumik tupamik pisisinnaasut eqqugaasussaanngillat.
- Meerartavut pitsaanerusumik siunissaqartikkusukkutsigit peqqiilliornermut, innarluuteqalernermut toqunermullu pissutaanerpaasoq pinngitsoorneqarsinnaanngitsoq iliuuseqarfigisariaqarparput: Pujortartarneq, Tuluit Nunaanni ministeriuneq Rishi Sunak, oqarpoq.
Isornartorsiuisartut oqarput inatsisissaq "isumatusaartumik isumaliortaaseqannginnerusoq", partiimilu naalakkersuisuutitaqartumi ilaasortat arlallit inatsisissatut siunnersuut akerlilerniarlugu oqarsimasut ministeriunerusimasoq Liz Truss ilagaat.
Naak akerlilersuisoqaraluartoq illuatungiliuttut partiiannit Labourimit, inatsip akuerinissaanik tapersersuiumasimasumit, inatsit tapersersorneqarluni akuerineqassangatinneqarpoq.
Februaarimi New Zealandimi naalakkersuisut nutaat inatsit assingusoq atorunnaarsippaat. Inatsit taanna januaarip aallaqqaataani 2009-p kingorna inunngortunut tupamik tuniniaanermik inerteqquteqalersitsivoq.
Tuluit Nunaanni naalakkersuisut naapertorlugit pujortartarneq tuluit peqqinnissaqarfiannut nunallu aningaasaqarneranut ukiumut 17 milliardit pund-inik naleqartarpoq.
Vape-nik imaluunniit puffbarinik taaneqartartunik atuisut amerliartupiloornerisa sukannernerusumik nakkutilliinissamik Tuluit Nunaanni naalakkersuisut eqqarsaatiginnittariaqalersissimavaat.
Pujortaatit pisiniarfinni qanoq nittarsaanneqarsinnaanersut, qanoq mamassuseqarsinnaanersut aamma qanoq poortorneqarsinnaanersut inatsip siunnersuutigineqartup aamma aalajangersassavaa.
Inuusuttut e-cigarettinik atuisut amerliartuinnarnerat unitsinniarlugu taamaaliortoqarpoq.
/ritzau/Reuters
