2024 Issittumi ukiut kiannerpaat pingajoraat
Europami Issittumilu kissatsikkiartuinnarpoq. Issittumi kissassuseq siorna agguaqatigiissillugu kissassusermit gradimik ataatsimik kissarneruvoq, silaannaap kissatsikkiartornera pillugu nalunaarusiami saqqummeqqammersumi allassimavoq.
Siunissami sakkortuumik unammillernartumillu silarluttarumaarpoq, sila pillugu ilisimatuut mianersoqqusipput.
Assi: Oscar Scott Carl
Sila kissatsikkiartuinnarlunilu sakkortusigaluttuinnartoq 2024-mut kisitsisit erseqqissarpaat. Europa 2024-mi oqaluttuarisaanermi aatsaat taama kiatsigisutut nalunaarsorneqarpoq.
Ingammik Europap kujammut kangiani kisitsisit immikkorluinnaq ittuupput, aasakkut nalinginnaasumit 3 gradinik kiannerulluni. Copernicus Climate Change Service-p Europami silap pissusaa pillugu nalunaarusiaani saqqummeqqammertumi allassimavoq.
– Europami silap pissusianik misissuisarfiup nalunaarusiaani saqqummeqqammersumi paasisat nammineq oqaluttuaramik qangali ilisimariikkatsinnik erseqqissaapput, Mark Payne, DMI-p silap pissusianik misissuisarfiani ilisimatuussutsikkut pisortaq, oqarpoq.
Issittoq ukiut siuliini agguaqatigiissillugu 1,11 gradinik kiannerusoq nalunaarusiami aamma allassimavoq. Tassa ukiut kiannerpaat pingajuattut inissisimavoq. DMI eqqartuineq pillugu nittartakkamini oqaaseqarpoq:
- Silap kianneruleriartornerata kingunerisaanik avannarpasinnerusumi sermeqarpallaarunnaariartorlunilu aputeqarpallaarunnaariartorpoq.
- Siku apullu qaamasut immamit taartumit, kiassuarmik tigooraanerusartumit, seqernup qinngornerinik utertitsisinnaanerummata imminik sakkortusaataasumik kinguneqassaaq, taamaammallu kiannerulersitsillunilu aakkiartuinnartitsissaaq, DMI allappoq.
Assigiinngissutit maluginiarnartut
Kiatsikkiartornera ingammik Svalbardimi malunnarpoq, tassanimi siku annertuumik annikillisimavoq. Siorna sermersuaq aatsaat taama millitigaaq, tamannalu aasakkut kiannerusalerneranik pissuteqarunarpoq.
Kalaallit Nunaannili ukiup kiassusia nunap immikkoortuini amerlanerni agguaqatigiissillugu kiassutsip nalinganiiginnapajaarpoq. Nunalli avannarpasissuani, ilaatigut Qaanaami avannaatalu kangiani, nalinginnaasumit kianneruvoq.
Danmarkimittaaq kisitsisit nalinginnaanngillat. Tassani DMI-mi silasiortut naapertorlugit 2024 nalunaarsukkani kiannerpaat siallernerpaallu tulleraat.
– Siunissami silaannaap allanngoriartornera pissutigalugu illut attaveqaasersuutillu ninngunerusariaqarput, taamaalillutalu uagut aamma inuttut nukittunerusariaqarluta. Qujanartumilli silarlorujussuartarnerata anigornissaanut akiornissaanullu pikkorissigaluttuinnartugut nalunaarummi paasisat aamma ersersippaat, Mark Payne oqarpoq.
