Siullermeerluni qinigassanngortittoq Nivi Rosing 144-nit
qinerneqarluni Inuit Ataqatigiit sinnerlugit Inatsisartunut
qinigaavoq.
Ilinniartup 21-nik ukiullip taassuma Ottawami Nunavut
Sivuniksavut Collegemi ilinniarnini unitsikkallarsimavaa – sulilu
uninngatikkallarniarlugu.
Siullermeerluni qinigassanngortittoq Nivi Rosing 144-nit
qinerneqarluni Inuit Ataqatigiit sinnerlugit Inatsisartunut
qinigaavoq.
Ilinniartup 21-nik ukiullip taassuma Ottawami Nunavut
Sivuniksavut Collegemi ilinniarnini unitsikkallarsimavaa – sulilu
uninngatikkallarniarlugu.
Nivi Rosing
pingasunngornermi qinersinerup aqaguani, Sermitsiamit
sianerfigineqarami ima oqarpoq: - Ilinniarnera allallu qanoq
ingerlateqqissanerlugit eqqarsaatiginissaannut
piffissaqanngilluinnarama, Nivi Rosing oqarpoq, tassa qinersinerup
aqaguani pingasunngornermi sianerfigineqarami.
Sapaatip akunnerini
pingasuni qineqqusaarneq sakkortusimasoq, qinigassanngorteqqaartoq
oqaluttuarpoq.
- Siullermeerlunga
qineqqusaarama, piffissarlu sivikimmat, qinersinerup kingorna qanoq
pisoqassanersoq eqqarsaatigisimanngilara, qineqqusaarnermi oqallinneq
qineqqusaarnerlu kisiisa eqqarsaatigisarakkit, Nivi Rosing illarluni
oqarpoq.
Taamaattorli IA-mut
ilaasortaq taanna nuannaartoq pissangasorlu 30-t allat peqatigalugit
Inatsisartuni nutaani ilaasortaasussanngorpoq.
- Naluara qanoq
qinersisoqarnissaa ilimagisimagaluarnerlugu, qinersinerulli inerneri
malinnaaffigalugit naggataagullu Inatsisartunut ilaasortanngorlunga,
paasigakku pissanganaqaaq, Nivi Rosing oqarpoq.
Kulturi
qitiutillugu
Qineqqusaarnermini pingaartitaasa ilagaat kulturimik
ilinniartitsinerup pingaartinneqarnerulernissaa.
- Meeqqat atuarfianni kulturi pillugu ilinniartitsinermi tamanna
sammineqarnerusinnaavoq, soorunami aamma meeqqat atuarfiata avataani
kulturi pillugu ilinniartitsineq ingerlanneqartariaqarpoq, Nivi
Rosing oqarpoq, taassumalu aamma kissaatigaa Issittumi Inuit
suleqatigiinnerulernissaat.
- Misilittakkakka
misigisartakkalu naapertorlugit, Inuit ataqatigiinnerulernissaannik
aallartitsiniarnermi iliuuseqartoqarpallaartariaqanngilaq. Akilinermi
Inuit 70-it atuaqatiginikuuakka, takuaralu soqutiginninneq qanoq
annertutiginersoq, amerlasuulli Kalaallit Nunaata
ataatsimeersuarnernik amerlanerusunik qaaqqusinissaa utaqqivaat,
imaluunniit ataatsimiititaliani oqaloqatigiinnerit
amerlanerulernissaat, Nivi Rosing oqarpoq.
Silap pissusia
aamma pinngortitaq
Siunissami inuusuttut amerlanerusut politikimik soqutigisaqarnerulernissaat
neriuutigaa.
Takuneqarsinnaavormi
qinigassanngortittut pingasut qinigaanerpaat inuusuttuusut,
taamaattumik isumaqarpunga inuusuttut politikimut akuunerulernerat
siuariarnerusoq, Nivi Rosing oqarpoq.
Naak Nivi Rosing
nuna tamakkerlugu politikimut ilannguteqqammeraluarluni,
ukiorpassuarni najukkamini pissutsit nunallu Issittumiittut
sammisarsimavai. Ilaatigut silap pissusia pinngortitarlu pillugit
suliniuteqartarsimalluni – sammisat tamakkua aamma politikikkut
sulinermini ilanngukkusuppai.
- Silap pissusia
oqallisigigaangatsigu uagut nunap inoqqaavisut isiginnittaaserput
aallaavigalugu pisassaaq. Silap pissusia pillugu ilungersuuteqarnermi
suliniaqatigiiffiit angisuut naalakkersuinermut
attuumassuteqanngitsut eqqarsaatigeqqajaaneqartarput, uagulli maani
kinguaariit tulliuttut piniartoqarfiillu amerlanngitsunik inullit
eqqarsaatigeqqajaanerusarpavut.
Inuit Ataqatigiit
marlunngormat qinersinermi Inatsisartuni arfineq-marlunnik
ilaasortaatitaqalerput.
