Aaja: Namminiilivinnissap inatsisilerinikkuinnaq apeqqutitut oqallisiginissaa imakillunilu pimoorussisuunngilaq
Namminiilivinneq inatsisilerinikkut apeqqutaannaanngilaq, aammali Kalaallit Nunaanni aningaasaqarnikkut siuariartornermik pilersitsinissamik, atugarissaarnermillu attassiinnarnissamik annertuumik imaqarpoq, taama Folketingimut ilaasortaq Aaja Chemnitz (IA) oqarpoq.
Namminiilivinneq annertuumik aningaasaqarnermut atugarissaarnermullu tunngasoq, Aaja Chemnitz isumaqarpoq. (Assi Folketingetip marlunngornermi ammaanersiorneraneersoq)
Assi: Liselotte Sabroe/Ritzau Scanpix
Folketingip ammarnersiorneqarnera pillugu sisamanngornermi oqallinnermi, Aaja Chemnitz (IA) isumalioqatigiissitamik nutaamik pilersitsinissaq pillugu suliaqarneq, Kalaallit Nunaata namminiilivinnissaa pillugu apeqqutip inatsisilerinermut tunngasortaanik misissuisussamut, sakkortuuliorpoq.
Inatsisilerineq sammineqarpallaartoq, politikeri isumaqarpoq:
- Namminiilivinneq inatsisilerinermi apeqqutaannartut isigaanni, oqallinneq imakillunilu pimoorussisuunngitsoq isumaqarpunga.
- Apeqqut annertuumik aningaasaqarnermut, inuiaqatigiinni kalaallini imminut napatittumik aningaasaqarnermut annertuumik aamma tunngassuteqarpoq, politikeri oqaluttuarfimmit oqarpoq.
Aaja: Atugarissaarneq namminiilivinnerlu imminnut akerleriittariaqanngillat
§ 21-mut isumalioqatigiissitaq, Namminersorneq pillugu inatsimmi § 21-p qanoq Kalaallit Nunaata namminiilivinnissaanik aallartitsisinnaaneranik qulaajaasussaq, politikerip isornartorsiorpaa. Isumalioqatigiissitap aningaasaqarnermut pissutsit, minnerunngitsumillu Danmarkimik aningaasaqarnikkut atassuteqaatit isiginianngissinnaagai siunnerfigineqarpoq.
Namminiilivinnermi innuttaasut atugarsissaarnissaat qularnaarneqartariaqartoq, Aaja Chemnitz isumaqarpoq. Atugarissaarneq akisuvoq, taamaammallu Nunatta Karsiata isertitaasa affaanit amerlanerusut Danmarkimeersuutigalugit, aningaasaqarnermut apeqqutit isiginngitsuusaarneqarsinnaanngillat:
- Innuttaasut atugarissaarnerat namminiilivinnerlu imminnut akerleriittariaqanngillat. Kalaallit Nunatsinni peqqinnissaqarfik ilungersunartorsiorfiusoq, atuarfiit meeqqeriviillu isasooqqajaasut, isumaginninnikkullu aaqqissuussineq isajartortoq. Pissutsit taamaattut innuttaasorpassuarnut piviusuupput.
- Amerlasuujusugut namminiilivinnissaq siunnerfigaarput, namminiilivinnerli uatsinnut meeqqatsinnullu inuunerinnerulernermik pilersitsisoq, politikeri oqaluttarfimmit oqarpoq.
Peqqinnissamut immikkoortoq pillugu suleqatigiinnerup annertusineqarnissaa neriuutigaa
Sooq namminiilivinnissamik apeqqummik Folketingimi qaqilerneranik, Kalaallit Nunatsinni pissutsit ingerlanerluttut politikikkut aallunneqarnissaasa pisariaqarnerannik, Aaja Chemnitz Sermitsiamut akivoq.
Danmarkip assersuutigalugu peqqinnissaqarfimmut immikkoortumi Kalaallit Nunaat ikiorsinnaagaa, taanna isumaqarpoq, taassumalu ilaatigut Nunanut Avannarlernut sanilliullugu Kalaallit Nunaanni nappaatip kræftip annertunerujussuarmik toqussutaasarnera innersuussutigaa.
Qallunaat naalakkersuisuisa nunatsinni peqqinnissaqarfimmut ikiuinissamut ukiuni sisamani tulliuttuni 140 mio. kr-t atornissaat siunnersuutigaat, amerlanerilli aggertut, Aaja Chemnitz oqarpoq:
- 140 mio. kr-t taakku aallaqqaataannaapput. Siammasinnerusumik suleqatigiittoqalernissaa ilimagaara, taanna oqarpoq.
