- 2017-imi soraarninngorama eqqarsarpunga: Naamik, unittoornianngilanga, iliuuseqartariaqarpunga. Taamaalillunga Nuummi utoqqarnut timersoqatigiittartunut ilannguppunga.
Else Kleist, sapaatip-akunnera ataaseq qaangiuppat utoqqarnik timersoqatigiittartunik 270-inik Nunatta ilarujussuaneersunik tikilluaqqusisussaq taama oqaluttuarpoq. Taanna komité 24-mi siulittaasuuvoq, taakkualu Timersoqatigiiffik Qeersaat, Nuummi Utoqqaat Timersortartut Peqatigiiffiat, aamma kajumissutsiminnik suleqataasut 50-it peqatigalugit katerisimaarneq aaqqissuuppaat, tikittussarpassuarnullu suut tamaasa ataqatigiissaarnissaat isumagalugu.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
- 2017-imi soraarninngorama eqqarsarpunga: Naamik, unittoornianngilanga, iliuuseqartariaqarpunga. Taamaalillunga Nuummi utoqqarnut timersoqatigiittartunut ilannguppunga.
Else Kleist, sapaatip-akunnera ataaseq qaangiuppat utoqqarnik timersoqatigiittartunik 270-inik Nunatta ilarujussuaneersunik tikilluaqqusisussaq taama oqaluttuarpoq. Taanna komité 24-mi siulittaasuuvoq, taakkualu Timersoqatigiiffik Qeersaat, Nuummi Utoqqaat Timersortartut Peqatigiiffiat, aamma kajumissutsiminnik suleqataasut 50-it peqatigalugit katerisimaarneq aaqqissuuppaat, tikittussarpassuarnullu suut tamaasa ataqatigiissaarnissaat isumagalugu.
Utoqqaat 270-it sapaatip akunnerata aappaa avillugu ataatsimoorniarlutik aalajangermata, utoqqarnut timersortartunut unammiuaarnerinnaassanngilaq, aammali katerisimaarfiussalluni. Inuussivimmi floorballimik (arsaasamik natermi anaalerilluni unammineq) assammik arsarnermillu unammisoqassaaq, isernerlu akeqassanngilaq. Unammiuaarnerit juulip aqqaneq-aappaanni aallartissapput, puljekkaarluni siullermi unamminerit ingerlanneqassallutik, aammali nuannisartoqassaaq.
- Arlaannattaluunniit unamminermi ajorsarnissaq toqqaannartumik anguniarnavianngilaa, uagullu Nuummeersut nuannisarnissarput pinerullugu arsaattarpugut. Paamiuni 2021-mi pokalinnakkatta tupaallappugut. Coronalli atuukkunnaaqqammernerani peqataasorpassuaqanngitsoq ajugaavugut. Ajorsaraluaruttaluunniit aningaaserivimmi suli aningaasaateqassaagut, Else Kleist illarluni oqarpoq.
Taassuma oqaatigaa, utoqqaat timersoqatigiiffianni peqataanini periarfissatut nutaatut isigisimallugu, tamannalu qujamasuutigalugu.
PISUSSAT
Juulip 14-ianni nalunaaqutaq qulinut Hans Egedep Oqaluffiani naalagiaqatigiittoqassaaq. Tamatuma kingorna Inussivimmi pisortatigoortumik ammaanersiortoqassaaq. Kommunalbestyrelsimut ilaasortaq Uju Petersen unammiuaarnermut illersuisuuvoq.
Juulip 12-iannit 18-iannut assammik arsarnermik aamma arsaasamik natermi anaalerilluni unammiuaartoqassaaq. Isiginnaarusuttut tikilluaqqusaapput, iserneq akeqanngilaq.
Kangillinnguit Atuarfianni juulip 19-iannit 22-annut sungiusaasutut, qarasaasialerinermut aamma uummammik aallartitsinermut pikkorissaanernik aaqqissuussisoqassaaq.
Inoqatit peqatiginerat
- Suligallarama suliannut tunngasunik eqqarsarnerusarama. Ilinniartitsisutut sulinera pingaartittorujussuugakku. Maanna utoqqalinersiaqartutut ukioqalerninni inoqatikka allaalluinnartumik isigisarlugit misigisimavara. Ammaneruvunga misigisimallungalu inuit naapittakkama assigiinngissutaat akuerisariaqarlugit. Taamaalillunga oqarsinnaavunga utoqqaat timersornerannut peqataanera uannut inuttut isinnik ammaassisimasoq, aamma taamaalillunga timiga aalatittarpara, naak utoqqalinermut atatillugu ajoqutit takkutillattaaleraluartut, Else Kleist 73-inik ukiulik oqarpoq.
Timersoqatigiiffik Qeersaanit, utoqqaat timersortartorpassuit tikilluaqqunissaat qilanaarineqarpoq. Utoqqaat Kangillinnguit Atuarfianni najugaqassapput. Unammiuaarnerit juulip 14-ianni naalagiaqatigiinnikkut pisortatigoortumik aallartinneqassapput, tamatuma kingorna Inussivimmut ingerlaaqatigiittoqassalluni.
Aggustip 18-ianni naggataarnersiorluni Katersortarfimmi unnukkut nereqatigiittoqassaaq.
- Soorunami sinerissamit peqataasorpassuarnut Nunatsinni angalaneq akisuvoq. Ilaat timmisartorlutik, allat umiarsuarlutik tikissapput. Nunatsinni Timersoqatigiit Kattuffiannit ilaatigut aningaasaleeqataaffigineqarnerput nuannaarutigeqaarput, taamaanngippammi aaqqissuussineq taamaattoq piviusunngorsimassanngikkaluarmat, Else Kleist oqarpoq.
