KL

DK

Arnani kalaallinilu nakorsaaneq siullerpaaq

Paneeraq Noahsen nakorsaaninngussaaq. Henrik L. Hansen qinnuteqaqqinniarnani aalajangerpoq.

Paneeraq Noahsen nakorsaanertut atorfinitsinneqarpoq. Coronap nunarsuarmi tuniluunneranit assit ilaat.
Thomas Munk Veirum
Tusagassiortoq
Saqqummersinneqarpoq

Paneeraq Noahsen, inuiaqatigiit peqqissusaannik nappaataannillu immikkut ilisimasalittut nakorsatut ilinniagaqarsimasoq, Nakorsaaneqarfimmi nakorsaanertut atorfinitsinneqarsimasoq, Naalakkersuisut paasissutissiipput.

Peqqissutsimut naalakkersuisoq Agathe Fontain (IA) arnamik kalaallimillu siullerpaamik nakorsaanermik atorfinitsitsinini tulluusimaarutigalugu oqarpoq:

- Paneeraq Noahsen maannakkut nunatta nakorsaanertaavatut atorfinitsissinnaagatsigu assut tulluusimaarutigaara.

- Inuiaqatigiit peqqissusaannik nappaataannillu immikkut ilisimasalittut nakorsaagami, atorfiup isumaginissaanut Paneeraq Noahsen tulluaqqissaartuuvoq, kalaallillu arnartaanni siullersaalluni Nunatta nakorsaanerilissavaa, Agathe Fontain oqarpoq.

Nakorsaaninngorlaaq Paneeraq Noahsen Nuummi inunngorlunilu peroriartornikuuvoq, nunatsinnilu peqqinnissaqarfimmit misilittagarpassuaqarluni. Dronning Ingridip Napparsimmavissuata immikkoortortaani tamani kiisalu Dronning Ingridip peqqissaaviani nakorsatut sulinikuuvoq.

Taakku saniatigut napparsimmavimmi nakorsatut kiisalu Danmarkimi Sundhedsstyrelsimi allaffissorluni nakorsatut sulinikuunerminit misilittagaqarpoq, tassani Inuiaqatigiit peqqissusaannik nappaataannillu immikkut ilisimasalittut ilinniakkami ilaa naammassisimavaa.

Henrik L. Hansenimut qujassuteqangaartoq

Atorfinitsitsineq aammattaaq Henrik L. Hansenimik, maanna nakorsaanermik, inuulluaqqusinissamik malitseqarpoq. Henrik L. Hansen coronap nunarsuarmi tuniluunnera pissutigalugu nunatsinni ilisimaneqarluarpoq, tusagassiortunik katersortitsinerni kisissaanngitsuni eqqissisimalluni aalajangersimalluinnarlunilu peqqinnissaqarfimmi pissutsinik naliliinerminik saqqummiussisarnini pissutigalugu.

Henrik L. Hansen ulloq 1. oktober 2017-imili nakorsaaneruvoq, taannalu pillugu naalakkersuisoq nuannersumik oqaaseqarpoq:

- Periarfissaq iluatsillugu nakorsaanermut soraartussanngortumut, Henrik L. Hansen-imut, qujassuteqarumavunga, ukiorpassuit ingerlaneranni qasusueqaluni suliarpassuinut.

- Nunatta nakorsaaneqarfiani ilinniartutut atorfiit nakorsanut kalaallinut qulakkeerneqarnissaat Henrik-up sulinermini pimoorussimavaa, taamaattumillu maanna nakorsaanermik kalaallimik siulliusumik atorfinitsitsisinnaanitsinnut sunniuteqarsimaqaluni, Agathe Fontain oqarpoq.

Ukiuni aalajangersimasuni atorfeqarnini ulloq 1. oktober 2024-imi naammat, nakorsaanerup Henrik L. Hansen-ip qinnuteqaqqinnginnissani toqqarpaa.

Taamaalilluni Paneeraq Noahsen oktobarip aallaqqaataani atorfinissaaq.

samfund sundhedssektoren inuiaqatigiit landslæge landslægeembedet naalakkersuisut paneeraq noahsen

ATORFIIT Se alle jobs

Powered by Labrador CMS