POLITIIT
Arnat marluk hashi 4 kilo sinnerlugu annertussusilimmik eqqusseriaraluartut
Arnat taakku marluk eqqusseriaraluarnerat Kangerlussuarmi akitsuuserisunit paasineqarpoq, taakkulu Kalaallit Nunaanni Politiinut ingerlaannaq suliassanngortitsipput. Arnat tigusarineqarput kingusinnerusukkullu ullumi Nuup eqqartuussiviani sassartinneqassapput.
Asseq (toqqorsivimmit): Leiff Josefsen
Kangerlussuarmi akitsuuserisut katillugit hashi 4 kilo sinnerlugu annertussusilik ippassaq arfininngornermi nassaarivaat, taakku arnanit marlunnit timmisartumut ilaallutik Danmarkimit tikittunit nassaarineqarput.
Akitsuuserisut nassaarinninniariarlutik Kalaallit Nunaanni Politiinut pisoq nalunaarutigaat, arnallu taakku ingerlaannaq tigusarineqarput. Arnat eqqusseriaraluartut ullumi kingusinnerusukkut Nuup eqqartuussiviani sassartinneqassapput.
- Arnaq siulleq hashimik 2,4 kilomik annertussusilimmik eqqusseriaraluarpoq arnallu aappaa 2 kilo ataatilaarlugu hashimik eqqusseriaraluarluni, Kalaallit Nunaanni Politiini nakkutilliisuutitat pisortaat, Jørgen Madsen oqaluttuarpoq.
Arnat suli eqqartuussivimmut saqqummiunneqanngimmata, vagtchefip oqaatigisinnaanngilaa qanoq ilillutik arnat taakku marluk hashimik eqqusseriarsimanersut. Taamaattorli oqaluttuaraa arnat pineqartut imminnut attuumassuteqanngitsut.
