– Assorujussuaq killitsisimavunga

Kunngi Frederik, nuannaarluni killitsisimallunilu, Dronning Mary peqatigalugu arfininngornermi juunip 29-ani Qaanaamut ullup qeqqata qaangilaarnerani tikippoq. Kunngikkormiut Qaanaarmiunit illoqarfimmiit mittarfiliarsimasunit erinarsoqatigiinnillu tikilluaqquneqarput naasunillu tunineqarlutik.

Qaanaami borgmesteriusimasoq Jens Danielsen Kunngikkormiunut oqalugiarpoq, tassanilu kunngip Qaanaamut attaveqarnera ersersillugu.

- Ullut nuannersut tamaasa suli eqqaamavagut, aammalu illoqarfimmiut allat assigalugit, nuannaartorujussuuvugut maanga tikissinnaagassi. Ataqqinartorsuaq, Kunngi Frederik, inuttut qanoq ittuunerit aammalu katersuuffigineqarsinnaanerit piginnaasaatit. Nuannaarutigaarput kingumut maanga tikissinnaagavit.

Kunngi Frederik ukiut 20 sinnerlugit matuma siorna Qaanaami qaammatini arlalinni najugaqarpoq Siriusimik ilisimasassarsiornissamut piareersarnerminut atatillugu.

- Taamani, ilissi kangiata sineriaanut kilometererpassuit aqqutigalugit ingerlaartussaallusi, piniarnermik inuussutissarsiuteqartut arlalissuit ikinngutitaarinikuuaatsit. Taakku ilai suli maaniipput, ilaallu ajoraluartumik akornatsinniikkunnaarnikuupput. Neriuutigaarput Kalaallit Nunaannut tikeraarnersi nuannaralugulu ilorrisimaarfigissagissi, kingumullu tikilluaqqoqqippassi, Kunngi Frederik qulingat aamma Dronning Mary, Qaanaamut tikilluaritsi, Jens Danielsen oqarpoq.

Uteqqilluni nuanneqaaq

Qaanaami timersortarfimmi Kunngikkut tikeraarnerannut atatillugu kaffillertoqarpoq, kaffillerfillu innuttaasunik takunninnissaminnik qilanaarsimasunik tikilluaqquseqataasunik ulikkaavippoq. Inersimasut meeqqallu amerlasuut kalaallisoorput, erinarsortoqarlunilu meeqqat inuusuttullu qitillutik takutitsipput. Kunngikkut qamummi Sirius 2000-mi atornikuusaminni issiapput kaffisorlutik takutitsisunillu isiginnaarlutik.

- Ukiut 20-it qaangiunneranni Qaanaamut tikeqqinnera misigisaavoq assut nuannersoq, aamma nuliara Mary ilagalugu, taannami  ukiut 20-it matuma siornatigut siullermeerluni maaniinninni peqataavoq, Kunngi Frederik oqarpoq.

Kaffisoqatigiinnerup kingorna Kunngi Dronningilu ilassiniarlugit tulleriaartut imaaginnavipput, taakkulu Qaanaami ukiukinnerit ilaannik peqateqarlutik assilisaqattaarput. Aallariartulinnginnerminni tunissutinik tunineqarput, Kunngi iperaatamik nulialu Dronningi iverutinik tunineqarlutik.

Kunngi Frederiup attortisimassutigaa illoqarfimmiunit qanimut attuumassuteqarfigisaminit tikilluaqquneqarnini.

- Ukiut 20-it qaangiunneranni Qaanaamut tikeqqinnera misigisaavoq assut nuannersoq, aamma nuliara Mary ilagalugu, taannami ukiut 20-it matuma siornatigut siullermeerluni maaniinninni peqataavoq. Ilisarisarpassuaqarpunga, maluginiarparalu kingullermik maaniinnerma kingorna inunngorsimasut aamma arlalissuusut.

- Illoqarfimmi innuttaasut naapinnerat nuannersuuvoq, tikeqqinneralu assorujussuaq nuannarivara, Kunngi Frederik tusagassiortunut oqarpoq.

Kunngikkormiut inuulluaqquneqarput danskit, kalaallit australiamiunillu erfalasunik erfatsitsisunit, kingornalu Aasiannut ingerlaarput. Tassani innuttaasut hundredelippassuit Kunngikkormiut malinnaaffigaat Kunngip umiarsuaanut Dannebrogimut qaniuillutik, tassanilu qitornatik marlulissat Prins Vincent Minik aamma Prinsesse Josephine Ivalo peqatigalugit umiarsuarmut ikipput.