Nunarsuaq
kaajallallugu angalanissamik takorluuisimasut amerlagunarpugut. Athena
Mathæussen 31-nik ukiulik takorluuiinnarani angalavoq.
-
Ukiorpassuarni takorluugarisimasara piviusunngorpoq. Nunarsuaq kaajallallugu
angalasimallunga oqarsinnaagama nuannaangaarama pilluarlungalu
upperiuminaatsippara, Athena Mathæussen nuannaartoq oqaluttuarpoq, taassuma
ukioq manna juunip aappaani angalanini naammassivaa.
Nunarsuaq
kaajallallugu angalanissamik takorluuisimasut amerlagunarpugut. Athena
Mathæussen 31-nik ukiulik takorluuiinnarani angalavoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
-
Ukiorpassuarni takorluugarisimasara piviusunngorpoq. Nunarsuaq kaajallallugu
angalasimallunga oqarsinnaagama nuannaangaarama pilluarlungalu
upperiuminaatsippara, Athena Mathæussen nuannaartoq oqaluttuarpoq, taassuma
ukioq manna juunip aappaani angalanini naammassivaa.
Tallimat
missaannik ukioqartoq ataataata nunat assigiinngitsut illoqarfiillu
pingaarnersaat pillugit ilinniartippaa. Taamanili misigisassarsiorusunnera
pinngorpoq.
- Nunarsuaq pillugu oqaluttuuppaanga,
sumiiffiit alutornartut takusariaqakkat pillugit. Tinguartilluinnarpunga,
Athena Mathæussen oqaluttuarpoq.
Ilulissani
inunngorfigisamini najugaqarpoq, nutserisutut ilinniarsimavoq ullumikkullu
namminersortutut sulisarluni.
- 2017-imi
nunarsuaq tamakkerlugu angalanissara siunertaralugu namminersortutut
sulilerpunga. Taamanili angorusutara angunialerpara, oqarpoq.
Suliffiit pingasut
Angalanissamut
takorluukkaminut periarfissaq angalanermi pisariaqartitat “tamaasa”
ilanngullugit timmisartortitseqatigiiffimmit nittartakkatigut
neqeroorutigineqartoq siorna takuaa.
NUNARSUAQ KAAJALLALLUGU
Nunarsuup
kaajallallugu isorartussusia milenngorlugu 24.901-iuvoq. Sikkileraanni
nunarsuaq tamaat kaajallallugu ukiut pingasut missaat ingerlasariaqarpoq,
ullormut 35-45 kilometerit ingerlaarfigalugit. Pisuinnarluni kaajallanniaraanni
ukiut qulingiluat qaammatillu marluk missiliorlugit ingerlaarfiussaaq, ullormut
kilometerit aqqaneq-marluk ingerlaarfigisarlugit.
Paasissutissat: Illustreret Videnskab.dk
-
"Nunarsuaq kaajallallugu angalanermut billetsi" TikTokimi siorna
takuara. Misigivungalu takorluukkama piviusunngortinnissaanut piffissanngortoq,
aningaasanillu katersillunga aallartippunga, Athena Mathæussen, pingasunik taamani
suliffeqarsimasoq, oqaluttuarpoq.
Bilitsi
arfinilinnut agguaqqavoq. Amerika kujallermut, Amerika avannarlermut,
Australiamut, Asiamut, Dubaimut Københavnimullu.
- Qaammatip
ataatsip misaani nunami aalajangersimasumiittarpunga nunamut allamut
ingerlaqqitsinnanga. Nunani assigiinngitsuni illoqarfiit suut tikissanerlugit
nammineerlunga pilersaarusiorpara, Athena Mathæussen nassuiaavoq. Taassuma
angalanera qaammatini tallimani sivisussuseqarpoq. Ukioq manna januaarip
17-iani allarpoq angalaneralu juunip aappaani naammassilluni.
Athena
Mathæussen qaammatit tallimat angalavoq. Ukioq manna januaarip 17-ianni
aallarpoq juunillu aappaani apuulluni.
Athena
Mathæussen Argentinami nunap immikkoortuani Tierra del Fuegomi illoqarfiit
pingaarnersaanni Ushuaiamiippoq, nunarsuarmi illoqarfiit kujasinnerpaat
ilaanni. Australiamiippoq qaarsoq Uluru takullugu, taanna nunarsuarmi
pinngortitamit pilersitanit tusaamasarsuit ilagaat, Australiamilu nunap
inoqqaavinut anersaakkut isumalerujussuulluni.
Beijingimiippoq,
Kinallu qarmarsuanik takuniaalluni. Tokyomilu aqquserngit
aliikkusersuisarfiusut, qullernik illulianik akunnittarfinnillu akisuunik
ulikkaartut, takuai.
Vietnamimi
illoqarfeeqqamut Ninh Binhimukarsimavoq, 40-nillu kiattoq Muap qaarusuliaani
majuartarfiit nuannarineqarluartut qaqivai, nunallu kusanaqisup qaqqai,
narsaatit kuussuaalu ujaqqanik qallersimasut qanimut takullugit.
- Ilumut
misigisimavunga suut TAMAASA takusimallugit — karnevalernerit alutornangaartut,
Amazonimi orpippassuaqarfiit, Yosemite National Park aamma Argentinami
nunarsuup isua. Misigisaq tupinnaqaaq. Ilaanni imminut eqqaasittariaqartarpunga
ilumut misigisimallugit, uppernanngingajammammi, illarpoq.
Suminngaanneeraluaraanniluunniit
ikinngutigiinneq
Athena
Mathæussen angalanermini ikinnguterpassuaqalerlunilu ilisarisimasaqalerpoq.
Angalasunut akunnittarfiit ataatsimoorfiusut nuannarillualerpai.
-
Nunarsuarmi tamarmi ineqarfinni assigiinngitsuni silaannaq
nuannarilluinnarpara. Inuit assigiinngitsunut nunarsuarmi tamarmeersut
soqutiginartut naapittarpakka, taakku inussiarnertaqaat ajunngisaartaqalutillu,
oqaluttuarpoq.
Athena
Mathæussen ullumikkut Danmarkimiippoq, qanittukkullu Tuluit Nunaannit
ikinngutini umiarsuarmi Sikuiuitsumi kujallermi naapissimasani ilagalugit
Poleniliassaaq.
- Angalaneq
uannut pingaaruteqartorujussuuvoq. Ueriffigisutullusooq pivunga inuuninnilu
pingaartittorujussuullugu, oqarpoq.
Athena
Mathæussenip nunarsuaq kaajallallugu angalarusuttunut, sulili qanoq
iliornissaminnik nalornisunut, siunnersuutissaqarpoq.
- Siullermik
aningaasanik katerseriarlutit aallaannassaatit! Aallaannapajullutit.
Angujuminaatsutut ippat illoqarfik nunaluunniit aalajangersimasoq
aallartiffigisinnaavat, qanoq innersoq misigeqqaarniarlugu.
Kaammattuutigisinnaavara, uerinaqaarlu, Athena Mathæussen oqaluttuarpoq.
