Aviâja Egede Lynge Meeqqat Oqaaseqartartuattut uteqqissanngilaq

Aviâja Egede Lynge Meeqqat Oqaaseqartartuattut atorfeqarnermini isumaqatigiissut naappat atorfeqarunnaassaaq. Taama nammineq Facebookimini nalunaaruteqarluni allappoq.

Sermitsiap oqaaseqartinniarlugu attavigaa, napparsimaninili peqqutigalugu sulinngiffeqarami pisortatigoortumik apersorneqarsinnaanani nalunaarutigaa. Facebookimili allataa aallaavigalugu Sermitsiaq allaaserinninnissaminut akuerineqarpoq.

Aviâja Egede Lunge imatut ilaatigut allaaserisaqarpoq:

- Nalunaarutigisinnaanngorpara Meeqqat Oqaaseqartartuattut sulininnut uteqqissannginnama. Napparsimallunga sulinngiffeqannginnera naappat, atorfinni kontrakt naasussaavoq.Ukiut qulingajaat. Inuuninnut allanngueqisut. 

Aviâja Egede Lynge Meeqqat Oqaaseqartartuattut atorfeqarnermini nalunaarusianik imartuunik arlalinnik saqqummiussisarpoq, meeqqat atugaanik isornartunik pisortanut saqqummiussisarluni. 

Aviâja Egede Lynge oqaaseqartartuunermini ilaatigut nalunaarusianik tupaallannartunik arlalinnik suliaqarsimavoq, taakkunani nunatsinni meeqqat atugaat isornartut pisortanut saqqummiuttarlugit.

Takusat timimut nipporarsimapput

Aviâja Egede Lyngep Facebookimini nassuiaatigaa Meeqqat Oqaaseqartartuattut sulinermini inuiaqatigiinni meeqqat atugaat qanimut takullugillu misigisarsimallugit. Ilanngullugulu oqaatigaa takusat timaanut nipporarsimasut:

- Ukiuni taakkunani uniinnarusussimanngilanga. Takusimasakkali, ilisimalersimasakkali sakkortoqisut, meeqqat kikkulluunniit misigisussaanngikkaluagaat, ingerlarsorninni timinnut nipporarsimapput. Taamaammat maanna mamisartariaqalersimavunga,  Aviâja Egede Lynge allappoq nangillunilu:

-  Ugguanngisaannassaangali uummatiga malissimagakku, allanngortoqarnissaalu upperisimagakku.

Qujassuteqartoq

Aviâja Egede Lyngep maanna imminut inissaqartinnissani inissaqartissavaa:

- Maannali piffissaq nutaaq iserfigaara. Imminut inissaqartinnissaq, soqutigisallu allat aallutilerumaarpakka. Piareeruma. 

 - Ilaqutannguakka qujassutissaqarfigeqaassi. Atorfimmi kisimiinnarsinnaasumi tununniittuarsimagassi upperiuarsimallungalu. Asangaarpassi! Suleqatigisimasannguakka: ilisseqanngitsuuppat angusagut angusimassanngikkaluarpagut. Kammannguakkalu aalajaassimasuususi (kikkuunerlusi nalunngilarsi), uummatinniit aamma qujanaq!