Campus
Kujallermi takornarialerinermi kiffartuussinermut ilinniartut qulit, USA-mi
Portlandimi University of Southern Mainemi qaammatini marlunni
ilinniagaqareerlutik uteqqammerput. Atuartitsinermut suliffimmillu
misiliinermut peqataasimapput.
Ilinniartut
USA-miinnerminni misilittagaqalerlutillu takornariartitsinermik
kiffartuussinermillu ilisimasaqarnerulerput, maannalu Nunatsinni
ilinniakkaminnik ingerlatitseqqinnissaminni atorsinnaavaat, Aaju Simonsen
Arctic Education Alliance aqqutigalugu ilinniartitsisutut angalaqataasoq taama
oqaluttuarpoq.
Campus
Kujallermi takornarialerinermi kiffartuussinermut ilinniartut qulit, USA-mi
Portlandimi University of Southern Mainemi qaammatini marlunni
ilinniagaqareerlutik uteqqammerput. Atuartitsinermut suliffimmillu
misiliinermut peqataasimapput.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Ilinniartut
USA-miinnerminni misilittagaqalerlutillu takornariartitsinermik
kiffartuussinermillu ilisimasaqarnerulerput, maannalu Nunatsinni
ilinniakkaminnik ingerlatitseqqinnissaminni atorsinnaavaat, Aaju Simonsen
Arctic Education Alliance aqqutigalugu ilinniartitsisutut angalaqataasoq taama
oqaluttuarpoq.
- Piffissartornarsimavoq
piareersarluarneqarsimallunilu, kisianni imminut akilersinnaavoq, ilinniartummi Amerikamiut qanoq ittuunerat,
aamma takornarianik qanoq sullissinerat, uagutsinnit allaanerulluinnartoq,
paasisaqarfigaat, Aaju Simonsen oqarpoq.
Ilinniartut
USA-miinnerminni USA-mi takornariaqarneq qanoq ingerlanneqartarnersoq
paasiniarpaat, taamaalillutik takornarialerisutut ilinniagaqartut nunami maani
takornariaqarnermut neqeroorutit naleqqussarsinnaaniassammatigik.
-
Takornariartitsineq USA-mi allaanerulluinnarpoq, taamaattumik Amerikamiut
takornariat Kalaallit Nunaannut tikeraartut qanoq ililluta
attaveqarfigisinnaanerivut ilinniarniarsaraarput.
- Anguniagaq pingaarneq tassaavoq ilinniartut
USA-mi takornariartitsinermik, ulluinnarni inuunermik kiffartuussinernillu
paasisaqarnerulernissaat, Aaju Simonsen oqarpoq.
Assigiissuterpassuit
USA-mi
ilinniartitsineq takornariartitsinermik „nunaqavissut atugaannut
naleqqussagaavoq“-mik qulequtaqartoq, ilaatigut peqatigiiffik Wabanaki Public
Health and Wellness, nunap inoqqaavinit Wabanaki-nit pilersinneqartoq, pillugu
ilinniartitsissutigineqarpoq.
- USA-mi
takornariartitsinerup nunap inoqqaavinut tulluarsarneqarnera siuariartorpoq,
misigisassaqarnerulersitsisumik. Ilinniartut nunap inoqqaavinut tulluarsaaneq
qanoq paasisariaqarnersoq ilinniartinneqarput, aamma nunap inoqqaavi
takornariartitsinermi qanoq peqataatinneqarsinnaanersut, nunani killermiut
sunniuteqarpallaarunnaarsillugit, Aaju
Simonsen oqarpoq.
Wabanakit Inuillu assigiissuterpassuaqartut,
taanna oqaluttuarpoq.
-
Naggueqatiminnut ulluinnarni inuunerup pitsanngorsarnissaa pingaartitaraat,
tamannalu takullugu isumassarsinarluarluni. Oqaloqatigiinnerit aqqutigalugit
nunap inoqqaavinut ilaasutut misigivunga, tamannalu ilinniarfigilluarpara.
- Kulturikkut assigiissuterpassuaqarpugut,
sorpassuimmi naleqqiussinnaagatsigik. Misigisaq nuannerluinnarpoq. USA-mi
inuuneq naallugu ikinnguteqalerpugut, ilaatigut Wabanaki-nik, Aaju Simonsen
oqarpoq.
Suleqatigiinneq ilinniarfigalugu
- Suliniut Campus Kujalliup, University of
Southern Mainep aamma Arctic Education Alliancep qanimut suleqatigiillutik
pilersitaraat, tassanilu USA-p Kalaallit Nunaatalu inuussutissarsiornermut
tunngasunik ilinniagaqartitsinermi suleqatigiinnerat pineqarpoq.
Ilinniartut
qaammammi siullermi Mainemi universitetimi takornariaqarneq pillugu
ilinniartinneqarput.
- USA-mi
angalasarpugut, akunnittarfiit takornariallu ornittagaat tikeraartarlugit,
allaallu takornariaqarneq qanoq ingerlanneqarnersoq takuniarlugu qeqertamiilluta.
Campus
Kujallermi ilinniartut siullermeerlutik USA-mut tikeraarput.
- Ukioq
manna suleqatigiinnermik siullerpaamik misiliigatta isumaqarpugut
ingerlalluartoq. Ilaatigulli eqqumaffigisassaqarpugut. Aqqutaani
isumagisassanik unammilligassarpassuaqarpoq, ilikkagaqarluarpugullu.
Assersuutigalugu USA-mi nunap ilaani naalagaaffiup suliniut
aningaasaleeqataaffigimmagu, ilinniartut USA-mi ukiuni tulliuttuni marlunni
ilinniagaqarsinnaanngillat. Tamanna isumaqarpoq siunissami ilinniartut kikkut
USA-mut aallartittassanerlugit eqqarsaatigisariaqaripput, Aaju Simonsen
oqarpoq.
Ingerlaannassasoq
neriuutigineqartoq
Suleqatigiinneq
ingerlaannassasoq taassuma neriuutigaa, aamma USA-mit Naalakkersuisunillu
aningaasaliissuteqartoqarsinnaanissaa sulissutigineqarpoq.
- Aamma
misissorpavut ilinniartut qanoq ilillutik Danmarkip Nuummilu konsuuleqarfiup
avataatigut aallartissinnaanertigit, aqqusaagassarpassuaqarmammi.
- Soorunami USA-mut
ilinniartitsiartortuarnissarput anguniagaraarput. Kulturinik nutaanik,
takornariartitseriaatsinik aamma nunap inoqqaavisa assigiissuterpassui, aamma
nunarsuarmut pissutsinullu isiginnittaaserput pillugit ilinniarneq
paasisaqarfiulluarpoq, Aaju Simonsen oqarpoq.
