Efterskolep oqoqarnerani iliuuserisassat inissipput
Maniitsumi Efterskoli ukiumi atuarfiusumi 2024/25-mi atuartut ikinnerutillugit atuartitsissaaq, aasallu ingerlanerani atuarfiup inaataasa ilaat oquiarneqassapput, aasaaneranilu atuanngiffeqareernerup kingorna atulersinnaassasut naatsorsuutigineqarpoq.
Ukiumi atuarfiusumi tulliuttumi Maniitsumi Efterskoli atuartunik ikinnerusunik atuartitsissaaq, aamma ulluunerani atuartunik arlariinnik atuartitsisarniarpoq.
Assiliisoq: Dorthea Reimer-Johansen
Maniitsumi efterskolimi pissutsit ajorseriarput, atuarfiup siornatigut imermik ajoquserneqarsimanera pillugu annertuumik iluarsaanneqartariaqartoq paasineqarmat, tamannalu pissutigalugu atuarfiup illutaani kollegianilu oqoqarlunilu silaannaq peqqinnaallisimavoq.
Pissutsit ima ajortigisimapput allaat maajip aallartinnerani nalunaarutigineqarluni ilinniartitsisut atuartullu peqqissusaat eqqarsaatigalugu atuarfiup ilaanit kollegiallu ilaanit piaarnerpaamik qimagutsitsisoqartariaqartoq.
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik sisamanngormat atuarfiup atuartuisalu atugaat pillugit nutaarsiassaqarpoq. Efterskolemi atuartut 28-t kiserngoruttut tamarmik meeqqat atuarfianni allattariarsornermik soraarummeernerminnik naammassinnissimasut tassani ilisimatitsissutigineqarpoq. Atuartut arfineq-pingasut angerlarniarlutik aalajangersimasut kisiisa pinnagit.
Majoriap ilaanik attartuissasoq
Aamma ukiumi atuarfiusumi tulliuttumi atuartitsinissamut pilersaarutit piareerput, atuarfiullu illuutai ajungaarmata tamanna nalorninartorsiorfioqqaarnikuuvoq.
Maniitsumi Efterskoli nalinginnaasumik ukiumi atuarfiusumi ilivitsumi atuartunut 60-it missaanniittunut inissaqartitsisaraluarluni, suliani annikillillugit atuartunut ikinnerpaamik 36-inut efterskolertitsissaaq.
- Naak atuartut ikinneruleraluartut, taamaattoq silatusaartumik isumalimmillu efterskolertitsinissaq ingerlanneqarsinnaasoq Ilinniartitaanermut Aqutsisoqarfiup nalilerpaa.
Illoqarfiup Majoriaata kollegiartaata ilaanik efterskolertunik 36-nik ineqarfiusinnaasumik Efterskoli Maniitsup attartuiniarnera atuartitsiinnarsinnaanermut peqqutaavoq. Tamatuma saniatigut atuarfik Maniitsumit ulluunerani atuartunik atuartitsisarniarpoq.
Ukiumut atuarfiusumut 2024/2025-imut atuartut 39-it Maniitsumi Efterskolernissaminnik nalunaarfigineqarsimapput. Atuartut Maniitsumi Efterskolimi atualernissaminnut akuerisaasut ilaasa Efterskoli Villads Villadsenimi atualersinnaanerannut neqerooruteqarfigineqarsinnaanerat, Maniitsumi Efterskolip Efterskoli Villads Villadsenillu pisortaasa oqaloqatigiissutigivaat.
Init iluarsartuunneqassapput
Naalakkersuisoqarfik naapertorlugu 2024-p aasaanerani ilinniartitsisut inaanni klassinilu atuarfiusartuni oqoqarfiit annikinnerusut oquiarneqassapput, inillu taakkua aasami feeriareernerup kingorna atoqqinneqarsinnaalissapput.
Efterskolip illuutaasa qanoq oqoqarfiutiginerisa annertunerusumik misissorneqarnissaat Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup suliniutiginiarlugu aammalu iluarsartuussisoqarnissaanik, nutaamik sanasoqarnissaanik allarluinnarmilluunniit suliaqartoqarnissaanik pisariaqartitsineq pillugit aammattaaq Iluarsartuussinermut Aqutsisoqarfik suleqatigissavaa.
