Enoksenip toqunera inuppassuarnit qisuariarfigineqarpoq: – Nunatsinnut ernerulluartumik annaasaqarpugut
Erik Jensenip Hans Enoksen maligassaalluartutut taavaa, taamatuttaarlu aalisartut piniartullu illersuisortik annaagaat KNAPK allappoq.
Erik Jensenip (S) Sara Olsvigillu Hans Enoksen, maanna toqukkut qimaguttoq, suleqatigisimavaat.
Assi: Leiff Josefsen
Siumumi siulittaasuusimasoq Erik Jensen Hans Enoksen pillugu eqqaaniummik Facebookimi allappoq. Hans Enoksen 69-inik ukioqarluni toquvoq.
Hans Enoksenip Naleraq pilersinngikkallaramiuk Siumumi ilaasortaallunilu siulittaasuusimavoq.
- Nunatsinnut kalaallinullu ernerulluartumik annaasaqarpugut. Annaasaq angeqaaq, Erik Jensen allappoq.
Taassuma Hans Enoksenip Siumumi Nunattalu oqaluttuarisaanerani sunniuteqarluarsimanera erseqqissarlugulu maligassiuisutut ilungersuuteqallaqqissutullu taavaa.
- Asasara Hans Enoksen apuuffissannut apuulluarina. Qujanarujussuarlu uatsinnut sunniuteqarluartumik tinnersaallutillu suleqatigiissimanitsinnut. Assorujussuaq maqaasissaqaatsigit .
Taanna Hans Enoksenip ilaqutaanut misiginneqataalluni allappoq.
Sara Olsvig: Maqaasissavatsigit
ICC-p siulittaasua Sara Olsvig Hans Enoksenip toquneranut atatillugu aamma Facebookimi qisuariarpoq.
Inuit Ataqatigiinni siulittaasuunikuuvoq, taamaammallu Hans Enoksen Inatsisartuni Naalakkersuisunilu suleqatiginikuuaa.
- Unnuaq Hans Enoksen-ip qimagussimanera paasillugu inuttaata nunatsinnut tunniussarpassui, suliarpassui, oqaloqatigiinnerpassuit - isumaqatigiittarsimanerit isumaqatigiinngittarsimanerillu - eqqarsaatinni sarsuapput. Misigisaq annerpaaq uanni takkuttoq tassaavoq qujamasunneq. Naggaterpiaa tikillugu nunarput, inuiaat inuiaqatigiillu ajunngitsumik anguniagaqartuarluni sullittuarpai, taanna allappoq.
Hans eqqaaniarlugu ullaaq manna ujamini ICC-p 2006-imi Utqiagvik-mi ataatsimeersuarnerani Naalakkersuisunut Siulittaasutut peqataanerani oqaluttaasimanerminut qujalluni tunniunnikuusaa atisimallugu oqaluttuarpoq. Ujameq erfalasutta seqinertaatut iluseqarpoq.
Hans inuuvoq inunnik allanik inissaqartitsiuartoq, ukiunilu kingullerni naapinneri tamaasa uannut oqaasii: “maqaasinarputit” maanna utertitassanngorput. Hans, maqaasissavatsigit. Eqqaaneqarnerit ataqqinartuuli, Sara allappoq.
KNAPK: Nunarput, Hansip toquneratigut, piitsunnguallappoq
Aalisartut Piniartullu Kattuffiat KNAPK Facebookimi quppernermini Hans Enoksen pillugu eqqaaniaalluni allappoq.
Enoksenip politikkimik suliaqarnermini ilaatigut aalisartut piniartullu illersorpai.
- Nunarput, Hansip toquneratigut, piitsunnguallappoq. Aalisartut piniartullu naalakkersuinikkut illersuisorput qimaguppoq, KNAPK-p siulittaasua Nikkulaat Jeremiassen allappoq.
Hans Enoksenip sulinera, Itillimi nunaqarfiup aqutsisuini aallartittoq taavalu Inatsisartuni Naalakkersuisunilu ingerlaqqittoq oqaluttuaraa.
- Hansip qinikkatut sulinermini aalisartut, piniartut, savaatillit, nunaqarfiit, isorliunerusut, inuiaat kalaallit tamaasa iluunngarluni illersugarivai. Toqussi tikillugu.
