Frankrigip sissani naatsiiviliarsuarnilu pujortarneq inerteqqutigilerpaa

Sapaammiit aallartittumik cigarettimik ikitsisinnaaneq sissani naatsiiviliarsuarnilu (parker) Frankrigimi inerteqqutaaler.

Meeqqat soriarsinnaanngitsut tupamik najuussutinneqarunnaarnissaannik qulakkeerunniarlugit inerteqquteqarneq inatsit nutaaq taanna pilersinneqarpoq. Taamatuttaaq siuariarneruvoq anguniakkamut, tassami  Frankrigip siunertaraa kinguaariit 2032-miit tupatorfiussanngitsut.

Sissani naatsiiviliarsuarnilu pujortartoqaqqusaajunnaarnerata saniatigut inatsit atuuppoq bussinik utaqqisarfinni aamma atuakkanik atorniartarfiit silataanni  10 meterinik ungasissusilerlugit atorniartarfinni, naluttarfinni atuarfinnilu.

Inatsit atuutilerpoq, atuarfiit Frankrigimi sapaatip aasarsiorfissanngortinnagit sapaatip akunnera sioqqullugu.

Frankrigip peqqinnissamut ministeriaqarfimmit nalunaarutigineqarpoq, ulluni aggersuni pujortartoqaqqusaannginneranik allagartat ikkussorneqassasut, sumiiffiit qanoq ungasitsigisuni pujortarsinnaaneq nalunaarsorneqassasoq.

Inerteqquteqarneq unioqqutinneqassappat akiliisitsisoqarsinnaavoq 135 aamma 700 europ akornanni. Taanna 1000 aamma 5000 koruunit missaanniippoq.

Peqqinnissamut ministeriaqarfiup naatsorsuutigaa piffissaq ikaarsaariarfiusoq, innuttaasut maleruagassat ilisimasaqarfigilissagaat.

- Meeqqat sumiiffigisartagannit tupa sumiiffinniit peerneqassaaq. Naatsiiviliarsuarni, sissami, atuarfinnilu - taakku sumiiffiupput meeqqat pinnguarnermik, ilinniarnermik anersaartorfittullu atorneqartarput - pujortarfiussanngillat, peqqinnissamut ilaqutariinnullu ministeri Catherine Vautrin oqarpoq.

Inerteqqut atuutinngilaq imerniartarfinnut neriniartarfinnullu. Aammattaaq sumiiffinni taakkunani inerteqqutaanngilaq e-cigaretit pujortassallugit.

Frankrigimi pujortartarnermik inerteqquteqalernissaq pillugu Komitép siulittaasua Yves Martinet inerteqquteqarneq pillugu oqarpoq eqqortumik alloriarnerusoq, kisianni suli naammanngitsoq.

Apeqqutaa pingaartumik, e-cigaretit nikotineqaraluartut inatsisip allassimaffiani taaneqanngimmata, tamannalu toqqaannartumik inuusuttunut sunniuteqartarpoq, taaassuma oqaatigaa.

- Alloriarneq sunniuteqarluartoq piumasarineqarpoq, ersarissumik - toqqaannartumik tunisassiat tupamik aamma/imaluunniit nikotinimik akulinnik kikkut tamarmik ornittagaanni inerteqquteqalernissaq ersarissuusariaqarpoq.

Frankrigimi inuit 3000-it 5000-illu akornanniittut tupamik naamasaqartitaaneq najuussuititaanerlu ukiumut toqussutigisarpaat, tamanna kisitsisit pisortatigoortut takutippaat.

Inuit ikiliartuinnartut nunami tassani, kisitsisit OFDT-meersut, Frankrigimi nakorsaatit atornerlunneqartarnerannut nakkutiginnittarfiusumit, takutippaat. Inersimasut 18-it 75-illu akornanni ukiullit sisamararterutaannaat 2023-mi pujortartarput.