Ilulissanut siunissami ilinniariassaguit pikkorissariassaguilluunniit containerini ineqartinneqarnissat ilimanaateqarluarpoq.
Avannaata Kommuniata, inissiat contaneriusut, najugaqarfigineqarsinnaasut, Munckimut pisiaraat. Taakkua 10.027.000 koruuneqartut kommuni Sermitsiamut allappoq.
Ilulissanut siunissami ilinniariassaguit pikkorissariassaguilluunniit containerini ineqartinneqarnissat ilimanaateqarluarpoq.
Avannaata Kommuniata, inissiat contaneriusut, najugaqarfigineqarsinnaasut, Munckimut pisiaraat. Taakkua 10.027.000 koruuneqartut kommuni Sermitsiamut allappoq.
Containerit taakkua ilaat mittarfimmit maanna nuunneqarsimalereerput. Ilulissat illoqarfiata qeqqani, arsaattarfiusimasumi, maanna uninngatikkallarneqarput.
Ineqarfittut atorneqartut
Containerinik pisinissaq kommunalbestyrelsip siorna novembarip 21-anni ataatsimiinnerminni akuerigaat, imaqarniliami aamma allaqqavoq.
Containerit taakkua Munckip Ilulissani mittarfiliornerani sulisunit inigineqarput, nerisarfigineqarput, iggavigineqarput allaffeqarfittullu aamma atorneqarlutik. Maanna atorunnaarput. Illoqarfimmiiginnassappullu.
- Containerit ilinniartut ineqarfiitut atorneqarnissaat siunertaavoq. Kisianni aamma pikkorissariartunut piffissami sivisunerusumi illoqarfimmiittussanut tulluarput, kommuni allappoq.
Sermitsiap Avannaata Kommuniani borgmesteri, Lars Erik Gabrielsen (S) suliaq pillugu apersorumanikuugaluarpaa, kommunimili atorfillit Sermitsiaq allakkatigut akissuteqarfigaat.
Sillimmasiisarfimmut nalunaarutigineqartut
Containerit mittarfiliortunit najugaqarfigineqarallaramik, ukiortaarsimatsiartoq, ikuallapput. Taamaalilluni nerisarfiit, iggaviit allaffeqarfiillu kommunimit tiguneqartussatut aamma isumaqatigiissutaagaluartut, ikuallassimanertik peqqutigalugu maanna atorneqarsinnaassanngitsut, kommuni ilisimatitsivoq.
Containerit 17-it allaffeqarfittut atortut, containerit 12-it nerisarfittut iggavittullu atortut ikuallannermi eqqugaapput. Taakkualu pillugit suliamik sillimmasiisarfimmi ingerlasoqartoq, kommuni ilisimatitsivoq. Containerit sinneruttut ikuallassimanngitsullu maanna 73-sut, ineqarfissatut atorneqarnissaat suliarineqarpoq.
Toqqavissaat suli piariinngitsoq
Containerit Ilulissani Paulus Kristensen-ip aqqutaaniissapput. Toqqavissaalli maanna suli piareerneqanngilaq. Taamaattumik containerit najugaqarfissat ilaat, Ilulissani arsaattarfiusimasumi maanna uninngatinneqarput.
- Toqqaviusussallu naammassineqarnissaata tungaanut utaqqiisaasumik arsaattarfitoqaq atorneqassaaq, kommuni allappoq.
Toqqavissap qaqugu naammassineqarnissaa kommunimit suli ilisimaneqanngilaq. Taamaattumik containerit qaqugumit atorneqalertussaanerat aamma ilisimaneqarani.
Kommuni: Sanaartornermi maleruaqqusat malinneqassapput
Containerinik inissiatut atuineq naliginnaasuunngilaq. Containerillu inissiatut atorneqassappata tamanna aamma sanaartornermi maleruaqqusat malillugit pisoqassaaq. Sanaartornermilu maleruaqqusat kommunip suliami matuma malikkai ilisimatitsissutaavoq.
- Sanaartornerit allat assigalugit sanaartornermi maleruaqqusat malinneqassapput, kommuni allappoq.
