Jens-Frederik Nielsen: Sinniisoqarfiup ammarneqarnerani peqataassanngilanga

Jens-Frederik Nielsen Amerikamiut sinniisoqarfiata nutaap sisamanngornermi ammarneqarnerani peqataanaviarani Sermitsiamut oqarpoq.

Naalakkersuisunut ilaasortat allat peqataassanersut oqaatigisinnaanngilaa, namminerli peqataanissamut naaggaarluinnarpoq.

- Ataatsimoorluta aalajangiussaqanngilagut, kisianni uanga peqataassanngilanga, oqarpoq.

Sinniisoqarfiup sisamanngorpat ammarnera nalliussiniarlugu Nuummi illoqarfiup qeqqani inini nutaani ilassinninnissamut qaaqqusisoqarpoq.

Sermitsiap paasissutissaatai naapertorlugit qaaqqusat ilarpassui qujaannarsimapput, tamannalu politikkikkut pissutsit ilungersunartut, tassa USA-mi præsidentip Donald Trumpip Kalaallit Nunaat pigilerusullugulu aqukkusullugulu kissaateqarnera, pissuteqarsinnaavoq.

Folketingimut ilaasortaq Naaja H. Nathanielsen (IA) Amerikamiut sinniisoqarfianniit aaqqissuussanut assigiinngitsunut qaaqqusissutit itigartissimallugit Facebookimi ataasinngornermi allappoq:

- Tamatumunnga nassuiaatiginikuuara nunatta marluk akornanni pissutsit maannakkorpiaq ajornakusoornerat, Nathanielsen Facebookimi allappoq.

Amerikamiut Nuummi sinniisoqarfiat Issittumi Sakkutooqarfik illoqatigalugu 2020-mi ammaqqimmat, Naalakkersuisunut ilaasortat arlallit peqataapput – ilaatigut Jens-Frederik Nielsen, taamanikkut inuussutissarsiornermut aatsitassanullu naalakkersuisuulluni.