Lars Erik Gabrielsenip, Avannaata Kommuniani borgmesterip, Trumpip Kalaallit Nunaannut immikkut aallartitaa Jeff Landry nakorsarluunniit Amerikamiu Joseph (Joe) Griffin Nuummiittut ataatsimeeqatiginissai pilersaarutiginngilai.
Aamma Nuummi sinniisoqarfiup nutaap atoqqaartinneqarneranut peqataassanngilaq. Sermitsiamut taama oqarpoq.
Lars Erik Gabrielsenip, Avannaata Kommuniani borgmesterip, Trumpip Kalaallit Nunaannut immikkut aallartitaa Jeff Landry nakorsarluunniit Amerikamiu Joseph (Joe) Griffin Nuummiittut ataatsimeeqatiginissai pilersaarutiginngilai.
Aamma Nuummi sinniisoqarfiup nutaap atoqqaartinneqarneranut peqataassanngilaq. Sermitsiamut taama oqarpoq.
Borgmesteri Landryp atorfilittaaniit ataatsimeeqatiserineqarluni saaffigineqarsimalluni, sulilu aalajangersimanani, Sermitsiamut ataasinngormat oqarpoq.
– Jeff Landry ataatsimeeqatigissanngilara, tamannalu aamma Naalakkersuisut siulittaasuannut Jens-Frederik Nielsenimut oqaatiginikuuara. Aamma nakorsaq angalaqataa ataatsimeeqatigissallugu isumaqatigiissuteqarfiginikuunngilara, Gabrielsen oqarpoq, nangipporlu:
– Equngasoqangaatsiarpoq
– Tamatumali saniatigut nunatta qanoq ingerlanera pillugu assigiimmik oqaluttariaqarpugut. Peqqinnissaqarfik inuussutissarsiornerlu eqqarsaatigalugit assigiimmik atugassaqartariaqarpugut, innuttaasut iluaqutigisaannik inuiaqatigiillu aningaasaqarnerullu siuarsarnissaanut. Peqqinnissaqarfik eqqarsaatigalugu suli equngasoqartoq isumaqarpunga.
Lars-Erik Gabrielsen pissutsit Amerikami pissutsinut eqqaanartut isumaqarpoq:
- Qanitagisavut amerlavallaartut annaanikuuagut. Taamaattumik peqqinnissaqarfik eqqarsaatigalugu assigiinngittoqarnera maanna sammineqarnerulermat pitsaasuuvoq. Kalaallit Nunaanni pissutsit Amerikami pissutsinut assingupput. Sillimateqarluaraanni Danmarkimi namminersortuni katsorsartittoqarsinnaavoq. Inuppassuit taanna periarfissarinngilaat. Kalaallit Nunaanni peqqinnissaqarfimmi arlaannik pisoqassasoq neriuutigaara. Tamanna pisariaqartipparput, Lars Erik Gabrielsen oqarpoq.
Sinniisoqarfiup nutaap sisamanngorpat atoqqaartinneqarnissaanut peqataassavit?
– Ulloq taannarpiaq Ilulissanut utissaanga. Angerlarsilaarama sinniisoqarfiup ammaanersiornissaanut peqataanissara siunertaralugu bilitsima allanngortinnissaa pilersaarutiginnilara. Periarfissaasimasuuppalli peqataasimasinnaagaluarpunga, borgmesteri oqarpoq.
